ප්‍රංශ ජනාධිපතිවරයා ජූලි 24 වැනිදා එක්ස් (ට්විටර්) පණිවුඩයක් නිකුත් කරමින් ඔහුගේ එම තීරණය ප්‍රසිද්ධ කළේ ය.
ලබන සැප්තැම්බර් මාසයේ දී පැවැත්වෙන එක්සත් ජාතීන්ගේ මහ මණ්ඩල සැසිවාරයේ දී පලස්තීනය රාජ්‍යයක් ලෙස පිළිගන්නා බව නිල වශයෙන් නිවේදනය කරන බව ද ප්‍රංශ ජනාධිපතිවරයා සිය ට්විටර් පණිවුඩය මඟින් නිවේදනය කළේ ය.
මැද පෙරදිග කලාපයට සාමය ගෙන ඒමේ අරමුණින් මෙම තීරණය ගත් බව ද ප්‍රංශ ජනාධිපතිවරයා සිය ට්විටර් පණිවුඩයේ සඳහන් කර ඇත.
කෙසේ නමුත් ප්‍රංශයේ මෙම තීරණය ප්‍රංශයේ මිත්‍ර රටවල් ලෙස සැලකෙන ඇමෙරිකා එක්සත් ජනපදයේ සහ ඊශ්‍රායලයේ කෝපයට හේතු වී තිබේ.
පලස්තීන ජනාධිපති මහ්මූද් අබ්බාස්ට යවන ලද ලිපියක් ද සමඟ ප්‍රංශ ජනාධිපතිවරයා එම ට්විටර් පණිවුඩය නිකුත් කර තිබිණි.
“මැදපෙරදිගට දිගුකාලීන සාමය සහ යුක්තිය ගෙන ඒම සඳහා අපගේ ඓතිහාසික කැපවීම තහවුරු කරමින්, පලස්තීනය රාජ්‍ය පිළිගැනීමට මම තීරණය කළා” යැයි ප්‍රංශ ජනාධිපතිවරයා සිය ට්විටර් පණිවුඩයේ සඳහන් කර තිබිණි.
“ලබන සැප්තැම්බර් මාසයේ පැවැත්වෙන එක්සත් ජාතීන්ගේ මහ මණ්ඩල සැසියේ දී මෙම ඓතිහාසික තීරණය ප්‍රකාශයට පත් කරනවා” යැයි ද එහි දැක්විණි.
යුරෝපයේ විශාලතම යුදෙව් ප්‍රජාව සහ මුස්ලිම් ප්‍රජාව ජීවත් වන්නේ ප්‍රංශයේ වන අතර පලස්තීනය රාජ්‍යයක් ලෙස පිළිගත් පළමු ප්‍රධාන බටහිර රට වන්නේ ද ප්‍රංශයයි.
ඊශ්‍රායලයේ මෑතකාලීන ක්‍රියාකාරම් ‘කුඩා’ රටවල් රැසක දැඩි විවේචනයට ලක්වූ අතර එවැනි බොහෝ රාජ්‍යවල මැදිහත් වීම ද ඇතුළු ව මේ වනවිට ලොවපුරා ඊශ්‍රායලයට එරෙහිව දැවැත්ත විරෝධතා ව්‍යාපාරයක් නිර්මාණය වී තිබේ. ප්‍රංශයේ මෙම තීරණය එම විරෝධතා ක්‍රියාමාර්ගයට එක්තරා ආකාරයකින් ඉහළට ඔසවා තැබීමක් යැයි ද දේශපාලන විචාරකයන්ගේ අදහස වී තිබේ.
“මෙම තීරණය ත්‍රස්තවාදයට සහාය දීමක්. ඒ වගේම තවත් ඉරාන ප්‍රොක්සි රාජ්‍යයක් නිර්මාණය කිරීමක්” යැයි ප්‍රංශයේ තීරණයෙන් කෝපයට පත් ඊශ්‍රායල අග්‍රාමාත්‍ය බෙන්ජමින් නෙදන්යාහු පැවැසීය.
ප්‍රංශය, ඊශ්‍රායලයේ මිත්‍ර රටක් වන අතරම ජී7 කණ්ඩායමේ ද සාමාජිකයෙකි.
දැන් තිබෙන තත්ත්වයෙන් පලස්තීනය රාජ්‍යයක් ලෙස පිළිගැනීමෙන් සිදුවන්නේ, ඊශ්‍රායලය විනාශ කිරීමක් යැයි ද වත්මන් පලස්තීනය, ඊශ්‍රායලය විනාශ කිරීමට මඟ පෑදීමක් යැයි ද ඊශ්‍රායලය අග්‍රාමාත්‍යවරයා චෝදනා කළේ ය. වර්තමානයේ තිබෙන පලස්තීනය සමඟ සාමයෙන් ජීවත් විය නොහැකි යැයි ද හෙතෙම පැවැසීය.
“අපි පැහැදිලිව කතා කරමු. පලස්තීනය, ඊශ්‍රායලය සමඟ වෙනම රාජ්‍යයක් ඉල්ලන්නේ නැහැ. ඔවුන් ඉල්ලන්නේ ඊශ්‍රාලය, වෙනුවට පලස්තීන” රාජ්‍යයක් යැයි ද ට්විටර් පණිවුඩයක් නිකුත් කරමින් බෙන්ජමින් නෙදන්යාහු චෝදනා කළේ ය. වර්තමානයේ පවතින තත්ත්වය මත සාමකාමී සහ ද්විත්ව රාජ්‍ය විසඳුමකට යා නොහැකි බව ඊශ්‍රායල අග්‍රාමාත්‍යවරයා එමඟින් සඳහන් කළේ ය.
