ගාසා තීරයේ උද්ගතව ඇති නවතම තත්ත්වය සම්බන්ධයෙන් සාකච්ඡා කිරීමට කටාර් රාජ්‍යයේ අනුග්‍රහයෙන් මෙම හදිසි ඉස්ලාමීය - අරාබි සමුළුව කැඳවා තිබේ.
පසුගියදා කටාර් රාජ්‍ය වෙත එල්ල කෙරුණු, ඊශ්‍රායල ප්‍රහාරය දැඩි ලෙස හෙළා දකිමින්, සමුළුව පැවැත්වේ. එම ප්‍රහාරයත් සමග කලාපීය රටවල ද්වීපාර්ශ්වීය සබඳතා සහ සහජීවනයට එල්ල කර ඇති තර්ජන එහිදී, අවධාරණය කෙරෙනු ඇත.
කටාර් රාජ්‍යය වෙත කලාපීය සහයෝගය පිළිබිඹු කරනුවස්, සමුළුව එරට දෝහා අගනුවරදී පැවැත්වේ.
ඉකුත් 09 වන දා, හමාස් සාමාජිකයන් ඉලක්ක කර ඊශ්‍රායල හමුදා විසින් කටාර් රාජ්‍යයට එල්ල කළ ගුවන් ප්‍රහාරයෙන්, හමාස් සාමාජිකයන් 05 දෙනෙක් ඝාතනය වූහ. සිය මුල් පෙළ නායකයින් ප්‍රහාරයෙන් දිවි ගලවාගත් බව හමාස් සංවිධානය කියයි.
2020 වසරේ සිට සාමාන්‍යත්ත්වයෙන් පැවති, එක්සත් අරාබි එමීර් රාජ්‍යය සහ ඊශ්‍රායලය අතර ද්වීපාර්ශ්වීය සබඳතා එම ප්‍රහාරයත් සමග අර්බුදයට ලක්ව ඇතැයි, මැද පෙරදිග නායකයෝ පවසති.
කටාර් රාජ්‍යයට එල්ල කළ කෲර ඊශ්‍රායල ගුවන් ප්‍රහාරය සහ ගාසා තීරයේ ඊශ්‍රායලය විසින් සිදු කරන ජන සංහාරය, වාර්ගික සමූලඝාතනය, සාගතය, කඩාවැදීම් සහ යටත්විජිතකරණ ක්‍රියාකාරකම් ඇතුළු සතුරු ක්‍රියාවන්හි අඛණ්ඩත්ත්වය සහ එහි ව්‍යාප්තිය, කලාපයේ සාමය සහ සහජීවනය පිළිබඳ අපේක්ෂාවන්ට තර්ජනයක් බව, අද, අරාබි-ඉස්ලාමීය සමුළු ප්‍රකාශන කෙටුම්පතෙහි දැක්වෙතැයි, විදෙස් මාධ්‍ය පවසයි.
(සටහන | Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
9/15/2025
මුලාශ්‍ර :
Arab-Islamic summit to warn Israeli attacks threaten normalisation of ties, draft resolution shows
