වොෂින්ටනයේ ජාතික හදිසි තත්ත්වයක් පනවනවා - ජනපති ට්‍රම්ප් අනතුරු අඟවයි

නගරාධිපතිනි,    මියුරියෙල් බවුසර් (Muriel Bowser) විසින් නිවේදනය කිරීමත්  සමග, එහි ජාතික හදිසි  තත්ත්වයක් ප්‍රකාශ කර ෆෙඩරල්කරණයට නතු  කරන බව, ජනපති ඩොනල්ඩ් ට්‍රම්ප් (Donald Trump) අද (15) අනතුරු ඇඟවීය.

නීති විරෝධීව එක්සත් ජනපදයට ඇතුළුවන සහ එහි වෙසෙන පුද්ගලයින් පිලිබඳ තොරතුරු සම්පාදනය පිලිබඳ නියාමන, මෙම ගැටලුවට මූලික වී තිබේ. කෙසේ වෙතද, ජනාධිපතිවරයා ෆෙඩරල් ප්‍රසම්පාදන ඉක්මවා ක්‍රියාකරමින් ඇතැයි, දේශපාලන විශ්ලේෂකයෝ පෙන්වා දෙති. වොෂින්ටන් නගරයේ මුර සංචාරයට හමුදා භටයින් 2000කට අධික පිරිසක් යොදවා ඇතැයි, විදෙස් මාධ්‍ය පවසයි.

 අගනුවර, නීතිය, සාමය සහ මහජන ආරක්ෂාව ප්‍රතිස්ථාපනය ජාතික ආරක්ෂක බලකාය (National Guard) අත පත් කිරීමත් සමග, නව අර්බුදය පැන නැගිණි. මෙම මස මුල,  දහස් ගණන් ජනතාව ඊට එරෙහිව වීදි බටහ. අපරාධ රැල්ල  නගරයේ ස්නායු පද්ධතිය  ආක්‍රමණය කර ඇතැයි, ජනපති ට්‍රම්ප් චෝදනා කරයි.  

"තව සති කීපයයි. නගරය මුළුමනින්ම පිබිදෙනවා.. දශක ගණනකට පස්සෙ පළමු වතාවට අථත්ය ලෙස අපරාධයෙන් විනිර්මුක්ත නගරයක්,"  ටෘත් සමාජ මාධ්‍ය ජාලයේ   (Truth Social) සටහනක්  තබමින් ඔහු පැවසීය.

ජනපති ට්‍රම්ප් මීට පෙර, නාගරික පොලිස් දෙපාර්තමේන්තුව සෘජු ෆෙඩරල් පාලනයට යටත් කළ අතර, නගරයේ  ෆෙඩරල් නීතිය බලාත්මක කිරීමේ අධිකාරී බලය ආගමන හා රේගු නිලධාරීන් ඇතුළු පොලිසිය වෙත පැවරීමට පියවර ගත්තේය. මෙහෙයුම, දින නියමයකින් තොරව ක්‍රියාත්මකය.

වොෂින්ටන් නගරාධිපතිනිය, එක්සත් ජනපද ආගමන සහ රේගු නියාමනයන්ට යටත් නොවන බව රජයට දන්වා  යවන තැනට  පත් කිරීම සම්බන්ධයෙන්, ජනපති ට්‍රම්ප්  එරට රැඩිකල් වාමාංශික  ප්‍රජාතන්ත්‍රවාදීන්ට දෝෂාරෝපණය කළේය. පොලිසිය විසින්  ආගමන සහ රේගු බලාත්මක කිරීම් නොසලකා හරින්නේ නම්, අපරාධ රැල්ල දෙගුණ, තෙගුණ වී යළි වීදි බසිනු ඇතැයි, ඔහු අවධාරණය කර සිටී.

" වොෂින්ටන් වාසීන්ට සහ එහි සියලු ව්‍යවසායකත්වයට මා කියා සිටිනවා..  බිය නොවන්න. මා, ඔබ සමගයි. මේක සිද්ධ වෙන්න මම කොහෙත්ම  ඉඩ තියන්නේ නෑ. අවශ්‍ය නම්,  හදිසි තත්ත්වයක් ප්‍රකාශ කරලා, ෆෙඩරල්කරණය කරලා දානවා," ජනපති ට්‍රම්ප් පවසයි.

කෙසේවෙතත්, මීට පෙර අවස්ථාවකදී  ජනපති ට්‍රම්ප්,  වොෂින්ටනයේ, ෆෙඩරල් නීතිය  බලාත්මක කිරීම සම්බන්ධයෙන් බවුසර්  නගරාධිපතිනියගේ ප්‍රශංසාවට ලක් විය. එම බලාත්මක කිරීමෙන් අනතුරුව, එහි   අපරාධ රැල්ල  ප්‍රශස්ත ලෙස  පහත වැටුණු අතර,  නගරයේ ෆෙඩරල් නීතිය බලාත්මක කිරීම සම්බන්ධයෙන් ගිවිසුමක් ද අත්සන් තැබිණි.

එක්සත් ජනපද ජාතික ආරක්ෂක බලකාය   එරට ප්‍රාන්ත 50 ක ආණ්ඩුකාරවරු යටතේ ක්‍රියාත්මක සන්නද්ධ  බලකායකි. රාජ්‍ය සේවය උදෙසා  අවශ්‍ය ඕනෑම මොහොතක ඔවුන්ව ෆෙඩරල් සේවය වෙනුවෙන් කැඳවීමේ හැකියාව පවතී.  ජාතික ආරක්ෂක බලකාය, එක්සත් ජනපද ජනපති වෙත සෘජුව වගකීම් දරන සන්නද්ධ කණ්ඩායමකි.

(සටහන | Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
9/15/2025


මුලාශ්‍රය :

Trump vows national emergency in Washington, DC over ICE dispute