එරට රජය මේ වන විට වසා දමා තිබේ.
රිපබ්ලිකන් පක්ෂයට සෙනෙට් සභාවේ ආසන 53ක් පමණක් ඇති අතර මෙවැනි පනතක් සම්මත කිරීමට ඡන්ද 60ක් අවශ්‍ය විය.
එබැවින්, ඔවුන්ට ඩිමොක්‍රටික් පාක්ෂිකයන්ගේ සහය අවශ්‍ය වී තිබේ.
රිපබ්ලිකන් සෙනෙට් සභික ජෝන් තූනේ චෝදනා කරන්නේ, ඩිමොක්‍රටික් පක්ෂය ජනතාව ප්‍රාණ ඇපයට ගෙන ඇති බව ය.
කෙසේ වෙතත්, ඩිමොක්‍රටික් පක්ෂයේ සෙනෙට් සභික චක් ෂූමර් පවසන්නේ, රිපබ්ලිකන් පක්ෂය 'අසත්‍ය ප්‍රකාශ කරන' බව ය.
ඇමෙරිකා රජයේ සියලු සේවා වසා තබනවා ද?
ඇමෙරිකානු කොංග්‍රසය වියදම් පනතක් සම්මත නොකිරීම හේතුවෙන් සියලු ම රාජ්‍ය සේවාවන් වසා නොදමනු ඇත.
දේශසීමා ආරක්ෂාව, රෝහල් තුළ වෛද්‍ය ප්‍රතිකාර, නීතිය ක්‍රියාත්මක කිරීම සහ ගුවන් ගමනාගමන පාලනය මෙම කාලය තුළ අඛණ්ඩව ක්‍රියාත්මක වනු ඇත.
සමාජ ආරක්ෂණ සහ මෙඩිකෙයාර් චෙක්පත් තවමත් නිකුත් කරනු ලැබුව ද, ප්‍රතිලාභ සත්‍යාපනය සහ නව කාඩ්පත් නිකුත් කිරීම නතර විය හැකි ය.
සාමාන්‍යයෙන්, වසා දැමීමකදී, අත්‍යවශ්‍ය සේවකයෝ සාමාන්‍ය පරිදි සේවාවල නිරත වෙති. (ඔවුන්ගෙන් සමහරුන් දැනට වැටුප් නොමැතිව)
අත්‍යවශ්‍ය නොවන බවට සැලකෙන රජයේ සේවකයින් තාවකාලිකව වැටුප් රහිත නිවාඩු මත තබා ඇත.
මෙම සේවකයින්ට පසුව වැටුප් ගෙවනු ඇත.
එයින් අදහස් කරන්නේ, ආහාර ආධාර වැඩසටහන, ෆෙඩ්රල් අරමුදල් සහිත පෙර පාසල්, ශිෂ්‍ය ණය නිකුත් කිරීම, ආහාර පරීක්ෂණ සහ ජාතික වනෝද්‍යානවල මෙහෙයුම් වැනි සේවාවන් සීමා කිරීමට හෝ වසා දැමීමට අපේක්ෂා කරන බව ය.
මීට පෙර මෙවැන්නක් සිදුවී තිබේ ද?
ඇමෙරිකා රජය මෙසේ තාවකාලිකව වසා දැමීමට සිදුව ඇත්තේ, 2018-19 වසරින් පසුව ය.
එක්සත් ජනපද රජය වසා දැමීම් වඩාත් සුලභ වෙමින් පවතින අතර, ඩොනල්ඩ් ට්‍රම්ප්ගේ පළමු ජනාධිපති ධුර කාලය තුළ එවැනි අවස්ථා තුනක් දක්නට ලැබේ.
ඊට ඇමෙරිකානු ඉතිහාසයේ දීර්ඝතම වසා දැමීම ඇතුළත් වන අතර එය දින 35ක් පැවතිණි.
ට්‍රම්ප්ට පෙර, බිල් ක්ලින්ටන් 1995 දී ජනාධිපතිවරයා ලෙස ඔහුගේ පළමු ධූර කාලය අවසන් වන විට දින 21ක වසා දැමීමක් සිදු විය.
ක්ලින්ටන්ගේ පළමු ධුර කාලයෙන් අඩක් ඇතුළත නියෝජිත මන්ත්‍රී මණ්ඩලය සහ සෙනෙට් සභාව යන දෙකෙහි ම පාලනය රිපබ්ලිකන් පක්ෂය දිනාගෙන තිබිණි.
ඒ හා සමානව, 2013 දී බැරැක් ඔබාමා දින 16ක වසා දැමීමක් අත්වින්දේ ය.
රිපබ්ලිකන් ජනාධිපතිවරයෙකු වූ රොනල්ඩ් රේගන්, ඔහුගේ ජනාධිපති ධූර කාලය තුළ වැඩි ම වසා දැමීම් අවස්ථා ගණනකට මුහුණ දුන්නේ ය. 1980 ගණන්වල ඔහුගේ ධූර කාලය තුළ එවැනි අවස්ථා අටක් වාර්තා විය. කෙසේ වෙතත්, ඒ සියල්ල සාපේක්ෂව කෙටි විය - ඔහු යටතේ දීර්ඝතම අරමුදල් නොලැබීමේ කාල පරාසය දින තුනක් පමණක් පැවතිණි.
| බීබීසී සිංහල
