එරට නාවිකයින් සහ ගුරු සේවය ද ඊට එක් විය. ඔවුහු, සියලු සේවා වලින් ඉවත්ව ඇතන්ස් (Athens) පාර්ලිමේන්තුව වෙත පෙළපාලියෙන් ගමන් කළ අතර එහිදී සිය ඉල්ලීම් ලබා දෙන ලෙස උද්ඝෝෂණයේ නිරත වූහ.
ග්‍රීක රජය විසින් ඉදිරිපත් කර ඇති, නව කම්කරු ප්‍රතිසංස්කරණ සහ දිගු දෛනික රාජකාරී කාල නිර්ණ නීතීන්ට එරෙහිව එම වැඩ වර්ජනය ක්‍රියාත්මක විය.
එරට පුද්ගලික සහ රාජ්‍ය අංශයේ සුවිසල් වෘත්තීය සමිති එක්ව වැඩ වර්ජනය සංවිධානය කර තිබිණි.
සේවකයින් රාජකාරියේ යොදවන කාලය දිනකට පැය 13ක් තෙක් දීර්ඝ කිරීමට අවසර දෙමින් රජය විසින් ඉදිරිපත් කරන ලද නව නීති කෙටුම්පත මගින් අට පැය සේවයේ, එක් රැකියාවක පමණක් නියුතු පුද්ගලික අංශයේ සේවකයින්ගේ පවා කම්කරු අයිතීන් උල්ලංඝනය වන බව, වෘත්තීය සමිති නායකයෝ ප්‍රකාශ කළහ.
එම "යකාගේ පනත" හකුලා ගන්නා ලෙස උද්ඝෝෂකයෝ හඬ ගා කියා සිටියහ. වහල් සේවයට එක හෙළා විරෝධය පළ කරන බව ඔවුහු පැවසූහ.
නව නෛතික ප්‍රසම්පාදන යටතේ, හාම්පුතුන්ට කෙටි කාලීන කුලී පදනම යටතේ සේවකයින් බඳවා ගැනීමට ද අවසර හිමි ය. එමෙන්ම, පුද්ගලික අංශයේ වාර්ෂික සේවක නිවාඩු පිලිබඳ නීති රෙගුලාසිද සංශෝධනය කර තිබේ.
එම පනත් කෙටුම්පත මෙම මස පාර්ලිමේන්තුවට ඉදිරිපත් කිරීමට නියමිතය.
නව ප්‍රතිසංස්කරණ සැලසුම්, අනිවාර්ය නොවන බවත්, වාර්ෂිකව දින 37ක කාලයකට යටත්ව පමණක් ක්‍රියාත්මක බවත් රජය කියා සිටී. එමගින්, සේවකයින්ට 40% ක අතිකාල දීමනා හිමි වන බවද රජය පෙන්වා දෙයි. වඩා නම්‍යශීලී ශ්‍රම වෙළඳපොළක් ඉලක්ක කර සේව්‍ය, සේවක දෙපාර්ශ්වය විසින් ඉදිරිපත් කරන ලද ඉල්ලීම් සලකා බැලීමෙන් අනතුරුව එම පියවර ගත් බව රජය පවසයි.
ග්‍රීසිය උග්‍ර ණය අර්බුදයකට ලක් වූ 2009 - 2018 වකවානුව තුළ, සේවක වැටුප් සහ විශ්‍රාම වැටුප් කප්පාදුවකට ද පියවර ගැනිණි. රට තුළ රැකියා හිඟය සීග්‍රයෙන් ඉහළ ගියේය. මේ වන විට, අදියර කීපයක් යටතේ ලබා දුන් සීමිත සේවක වැටුප් වර්ධක මගින්, සාපේක්ෂ ජීවන තත්ත්වය වර්ධනය පිණිස සාධනීය පියවර ගෙන ඇති අතර ග්‍රීසිය මන්දගාමීව, එහෙත්, යථා තත්ත්වයට පත් වෙමින් පවතී.
කෙසේ වුව, එරට නිවාස සහ ආහාර මිල තවමත් පවත්නේ ඉතා ඉහළ අගයකය. ග්‍රීක ජනතාව සතු මිලදී ගැනීමේ ශක්‍යතාව ද තවමත් ප්‍රශස්ත අගයක නැතැයි ආර්ථික විශ්ලේෂකයෝ පවසති.
කම්කරු අයිතීන් උල්ලංඝනය කරමින්, පවුල් ආදායම් බිඳ දමන, ශ්‍රම දූෂණයට මග පාදන අණ පනත් පනවනවා වෙනුවට, රජය මේ මොහොතේ සේවක වැඩුප් වැඩි කිරීමට වහා පියවර ගත යුතු බව රාජ්‍ය සේවකයෝ කියා සිටිති.
(සටහන | Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
10/1/2025
මුලාශ්‍රය
Greek ferries and trains halted as thousands protest over working hours
