ඒ අනුව, එරට විදෙස් ශ්‍රමිකයින් බ්‍රිතාන්‍යයේ ස්ථිර පදිංචියට සුදුසුකම් ලැබීමට වසර 10 ක පොරොත්තු කාලයක් රැඳී සිටිය යුතු බව රජය ඊයේ (20) නිවේදනය කළේය.
වෛද්‍ය වෘත්තිකයින් සහ හෙද සේවයේ නියුතු වූවන් වෙනුවෙන් ව්‍යතිරේක නීර්ණ සම්පාදනය කෙරේ. නව නීති යටතේ, ඇතැම් නීති විරෝධී සංක්‍රමණිකයින්ට ඒ වෙනුවෙන් රැඳී සිටීමට ගතවන කාලය වසර 30ක් ලෙස දීර්ඝ කර තිබේ.
බ්‍රිතාන්‍ය දේශපාලනය තුළ දශකයකට අධික කාලයක සිට සංක්‍රමණික ගැටලුව විවාදිතව පවතී. බලයට පත් විවිධ රජයන් නීති විරෝධී සංක්‍රමණ නවතාලීමට පියවර වශයෙන් ප්‍රතිපත්ති සම්පාදනයේ යෙදුණ ද, ගැටලුව සහමුළින් අවසන් කිරීමට නොහැකි විය. මෑතකදී, බ්‍රිතාන්‍යය වීසා නීති දැඩි කළ අතර විදෙස් ශ්‍රමිකයින් හට වේතන සීමා පැනවීමට ද පියවර ගත්තේය.
එරට ඉහළ වැටුප් ලබන සහ ව්‍යාපාර ක්ෂේත්‍රයේ නියුතු විදේශිකයින්ට නව නීති සීමා අදාල නොවේ. ඔවුන් හට බ්‍රිතාන්‍යයේ ස්ථිර පදිංචිය අනුමත කිරීම, කඩිනම් වැඩපිළිවෙළක් යටතේ සිදු කෙරේ. රජයේ ජාතික සෞඛ්‍ය සේවයේ නියුතු විදෙස් වෛද්‍යවරුන් සහ හෙදියන් වෙනුවෙන් වන එම කාලය, මේ තාක් පැවති වසර පහක පොරොත්තු කාල සීමාවේ නොවෙනස්ව පවතී.
බ්‍රිතාන්‍යය තුළ ජාතික සෞඛ්‍ය සේවයේ නිරත වෛද්‍ය වෘත්තිකයින්ගෙන් තුනෙන් දෙකකට අධික පිරිසක් විදේශිකයෝ වෙත්. එම හෙද සේවයේ නිරත හරි අඩකට ආසන්න පිරිසක් ද විදෙස් වෘත්තිකයින්ය. එම පිරිස් හට බ්‍රිතාන්‍යයේ ස්ථිර පදිංචිය පිරිනැමීමේ පොරොත්තු කාලසීමාව තව දුරටත් දීර්ඝ කළහොත්, 50,000කට අධික විදෙස් හෙද සේවක සේවිකා පිරිසක් බ්‍රිතාන්‍යය හැර යාමේ අවදානමක් පවතින බව, ප්‍රධාන හෙද වෘත්තීය සමිතිය විසින් අනතුරු අඟවා තිබේ.
නව නීති කඩ කරන්නන් වෙත දඩ පැනවේ. සහන මත පමණක් රැඳී සිටින විදේශිකයින් හට ස්ථිර පදිංචිය පිරිනැමීමේ පොරොත්තු කාලය වසර 20ක් තෙක් දීර්ඝ කෙරේ. එය යුරෝපයේ ඊට අදාළ වැඩිම කාලය වේ. අනීතිකව සංක්‍රමණය වූ හෝ වීසා කල් ඉකුත් වූ විදේශිකයින් හට වසර 30ක් තෙක් පොරොත්තු කාලයක රැඳී සිටීමට සිදු වේ.
නව නීති හඳුන්වාදීමට පෙර, 2026 සහ 2030 කාලය තුළ බ්‍රිතාන්‍යයේ ස්ථිර පදිංචිය පතා එරට රැඳී සිටින පිරිස මිලියන 1.6ක් බවට රජය විසින් ගණන් බලා තිබේ. 2023 මාර්තු මස වන විට, එරට විදෙස් සංක්‍රමණ, 944,000ක උපරිමයට ලඟා විය.
බ්‍රිතාන්‍යයේ සරණාගත ප්‍රතිපත්ති වෙනස් කිරීමටද රජය ඉකුත් සතියේ පියවර ගත්තේය. ඒ අනුව, එරටට සංක්‍රමණය වන විදේශිකයින්ට පිරිනැමෙන්නේ තාවකාලික සරණාගත තත්ත්වයකි. නීති විරෝධී විදෙස් සංක්‍රමණිකයින් පිටුවහල් කිරීම ද කඩිනම් කෙරේ.
බ්‍රිතාන්‍ය ඡන්ද බලය හිමි මිලියන 69ක ජනගහනයෙන් බහුතරය, විදෙස් සංක්‍රමණ හේතුවෙන් පොදු සේවා පීඩනයට පත්ව ඇතැයි චෝදනා කරයි. සෞඛ්‍ය සහ සමාජ සත්කාර ක්ෂේත්‍රයන්හි ඔවුන්ගේ සේවය අත්‍යවශ්‍ය බව අනෙක් පාර්ශ්ව අවධාරණය කරති.
(සටහන | Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
11/21 /2025
මුලාශ්‍රය :
Most foreign workers in UK face longer wait for settled status
