හොං කොං හි අහස සූරණ මැදුරු සංකීර්ණයක් ගින්නෙන් දැවේ

අනතුරින් මේ වන විට පුද්ගලයින් සිව් දෙනකු ජීවිතක්ෂයට පත්ව ඇතැයි, වාර්තා වේ. උතුරේ පිහිටි ටායි පෝ (Tai Po) දිස්ත්‍රික්කයේ එම අනතුර සිදු විය.

ගිනි ගෙන දැවෙන උස් ගොඩනැගිළි තුළ පුද්ගලයින් කිහිප දෙනෙක් සිරව සිටිතැයි RTHK රාජ්‍ය ගුවන් විදුලිය දන්වා සිටී.  පිළිස්සුම් තුවාළ ලද දෙදෙනකුගේ තත්ත්වය බරපතල බව, පොලීසය සඳහන් කරයි.

ගින්න සමනය කිරීමට ලඟා වූ ගිනි භටයින් කිහිප දෙනෙක් ද තුවාළ ලබා ඇතැයි වාර්තා වේ. සෑම ගොඩනැගිල්ලක්ම  මහල් 31කින් සැදි නිවාස සංකීර්ණයේ හට ගත්  ගින්න මැඩ පැවැත්වීමට සහන කාර්ය මණ්ඩල   විශාල  වෙහෙසක් දරමින් සිටිති.

නිවාස සංකීර්ණය පාමුල ගිනි රථ සහ ගිලන් රථ විශාල සංඛ්‍යාවක් කැඳවා තිබේ. නිවාස සංකීර්ණය තුළ  සිරවී සිටින්නන් පිලිබඳ තවමත් නිශ්චිත තොරතුරු නැතැයි, ගිනි නිවීමේ සේවා දෙපාර්තමේන්තුව පවසයි.

එරට වේලාවෙන් අද ප.ව.2.51ට ගින්න හට ගෙන තිබේ. එය දෙවන පෙල අධි අවදානම්  තත්ත්වයක් බව ප්‍රකාශයට පත් කර ඇත.

ගින්නට හසු වූ වැඞ් ෆුක් කොර්ට් (Wang Fuk Court) මහල් නිවාස සංකීර්ණය, උස් ගොඩනැගිලි  8කින් සමන්විතය.  එහි නිවාස ඒකක   2000කට ආසන්න සංඛ්‍යාවක් පවතී. එහි ඇතැම් ඒකක  වටා පිටතින්, උණ ලී පලංචි සවි කර තිබේ. හොං කොං,  ඉදිකිරීම් සඳහා උණ බට  ආශ්‍රිත පලංචි භාවිතා කරන ලොව අවසන් රටවල් කිහිපය අතුරින් එකකි.

ගින්න හේතුවෙන් එහි ප්‍රධාන මාර්ග දෙකින්   එකක් මේ වන විට මුළුමනින් වසා දැමීමට පියවර ගෙන තිබේ.

(සටහන | Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
11/26 /2025

Fire engulfs Hong Kong residential building killing at least 14 people, trapping others