2023, ඔක්තෝබර 7 ඊශ්‍රායලයේ සිදු කළ ම්ලේච්ඡ හමාස් ත්‍රස්ත ප්‍රහාරයෙන් අනතුරුව ඇරඹි ගාසා යුද්ධය පිලිබඳ විමර්ශන සම්බන්ධයෙන් පහළ අධිකරණයක් විසින් ලබා දුන් තීන්දුවක් අවලංගු කරන ලෙස ඉල්ලා, ඊශ්‍රායලය කළ ඉල්ලීමක් එසේ ප්‍රතික්ෂේප කර තිබේ.
ඒ අනුව, ගාසා ජන සංහාරය පිලිබඳ ඊශ්‍රායලයට එරෙහි විමර්ශන මෙන්ම අග්‍රාමාත්‍ය, බෙන්ජමින් නෙතන්යාහු සහ ඔහුගේ හිටපු ආරක්ෂක අමාත්‍ය, යෝව් ගැලන්ට් අත්අඩංගුවට ගන්නා ලෙස ජාත්‍යන්තර අධිකරණය විසින් නිකුත් කළ නියෝග තවදුරටත් ක්‍රියාත්මක ය.
මේ අතර විනාශයට පත් ගාසා තීරයට මේ වන විට ඇද හැළෙන ධාරාණිපාත වැසි හේතුවෙන් යුද්ධයෙන් හානියට පත් ගොඩනැගිලි ඇද වැටීමට ඉඩ ඇතැයි, බලධාරීන් විසින් අනතුරු අඟවා තිබේ. පවතින දැඩි අයහපත් කාලගුණික තත්ත්වය හේතුවෙන්, සුන් බුන් යට සිරවූ පුද්ගල මළ සිරුරු සොයා සිදු කෙරෙන මෙහෙයුම් ද අඩපණව තිබේ.
සිකුරාදා (12), අර්ධ හානියට පත් ගොඩනැගිලි දෙකක් දැඩි කුණාටු අතර ඇද වැටීමෙන් පුද්ගලයින් 12 දෙනෙක් ජීවිතක්ෂයට පත් වූහ. අවතැන් කූඩාරම් රැසක් ජල ගැලීම් වලට හසු ව ඇත. අයහපත් කාලගුණික තත්ත්වයට නිරාවරණයව ගාසා පුද්ගල මරණ සංඛ්‍යාව තව දුරටත් ඉහළ යමින් පවතී.
සමස්ත ගාසා ජනගහනයම මේ වන විට අවතැන් ව සිටිති. ගාසා තීරය වෙත ගලා එන ආධාර ප්‍රමාණවත් පරිදි ඒ වෙත ලඟා නොවන බව, ජාත්‍යන්තර මානුෂීය සංවිධාන පවසති. එම ආධාර තොග හමාස් සංවිධානය විසින් පැහැර ගන්නා බවට ද චෝදනා පවතී.
අවතැන් පලස්තීනුවන්ට කූඩාරම් වෙනුවට ජංගම නිවාස සහ ලැගුම් පහසුකම් සහිත කැරැවෑන් රථ ලබා දෙන ලෙස ගාසා සිවිල් ආරක්ෂක ප්‍රකාශක, මහමුද් බසාල් (Mahmoud Basal) ජාත්‍යන්තර ප්‍රජාව වෙතින් විශේෂ ඉල්ලීමක් සිදු කළේය. අද දවසේ ගාසා වාසීන් නිසි ආරක්ෂාව නොලදහොත්, යුද්ධයෙන් හානි වූ ගොඩනැගිලි තුළ පුද්ගල මරණ තව දුරටත් ඉහළ යාම නොවැලැක්විය හැකි යැයි ඔහු පැවසීය.
ගාසා තීරයේ අවතැන් පවුල් තව දුරටත් අනතුරට පත්වීම වලකාලීමට නම්, ප්‍රමාදයකින් තොරව ඒ වෙත වැඩි දුර ආධාර ලඟා වීමට අවස්ථා සැලසිය යුතු බව, එක්සත් ජාතීන්ගේ පලස්තීන සරණාගත ඒජන්සියේ ප්‍රධානී ඊයේ (15) ප්‍රකාශ කළේය.
බයිරන් සුළි කුණාටුව සමග එන මහ වැසි සහිත දරුණු කාලගුණ තත්ත්වයෙන් ගාසා වාසීන් ශීතයෙන් ගල්ගැසී මරණයට පත් වෙමින් ඇතැයි, එම සංවිධානයේ මහ කොමසාරිස් ෆිලිප් ලසාරිනි, එක්ස් (X) සටහනක සඳහන් කළේය.
(සටහන | Reuters ඇසුරින්; හර්ෂ උදයකාන්ත පීරිස්)
