එම සටන්කාමීන්, කලාපයේ කිතුණු ජනයා ඉලක්ක කර ප්‍රහාර එල්ල කරන බවට සැලසුම් අනාවරණය වීමත් සමග එක්සත් ජනපද හමුදා විසින් එම මෙහෙයුම දියත් කර තිබේ.
" හමුදා ප්‍රධානියා ලෙස මගේ අණින්, අද රාත්‍රී එක්සත් ජනපද හමුදා වයඹ දිග නයිජීරියාවේ අයිසිස් ත්‍රස්ත කුණු කන්දට ප්‍රබල වූත්, මරණීය වූත් දැවැන්ත ප්‍රහාරයක් එල්ල කළා. ඔවුන් සිතා මතාම සහ මූලිකව, අහිංසක කිතුණු ජනයා ඝාතනය කිරීමේ සැලසුමින් සිටි බව අනාවරණය වූවා. වසර ගණනක් යන තෙක් ඇතැම් විට, පෙර ශතවර්ෂ ගණනක් අපට ඔවුන්ගේ සියුම් වැඩපිළිවෙළ හරි හැටි නිරීක්ෂණය වූයේ නැහැ," ට්‍රම්ප් ටෘත් (Truth) සමාජ ජාලයේ සඳහන් කළේය.
නයිජීරියානු බලධාරීන්ගේ ඇරයුමින්, එරට සොකොටෝ (Sokoto) ප්‍රාන්තයේ දියත් කළ එම ප්‍රහාර මාලාවෙන් අයිසිස් ත්‍රස්තයින් විශාල සංඛ්‍යාවක් ඝාතනය කළ බව, එක්සත් ජනපද හමුදා අප්‍රිකානු මූලය සඳහන් කළේය.
නයිජීරියාව තුළ කිතුනු ජනයා වඳ වීමේ තර්ජනයට ලක්ව ඇතැයි, ජනපති ට්‍රම්ප් ඉකුත් ඔක්තෝබරයේ ප්‍රකාශ කළේය. එහිදී, එරට කිතුවන්ට නිසි ආරක්ෂාව සැලසීමට අපොහොසත් වීම පිලිබඳ නයිජීරියානු හමුදා ඔහුගේ උදහසට ලක් විය.
නොවැම්බර අග භාගයේ සිට එක්සත් ජනපද හමුදා විසින්, නියමුවන් රහිත ඔත්තු යානා මගින් නයිජීරියාවේ ඉහළ අහසේ සිට ඒ පිලිබඳ බුද්ධි තොරතුරු රැස් කෙරිණි.
ඊයේ ප්‍රහාර, එක්සත් ජනපද හමුදා හා එක්ව දැනට ක්‍රියාත්මක හමුදා මෙහෙයුමේ කොටසක් ලෙස ක්‍රියාවට නැංවූ බව, නයිජීරියා විදේශ අමාත්‍යංශය පැවසීය. බුද්ධි තොරතුරු හුවමාරුව සහ සන්නද්ධ කණ්ඩායම් ඉලක්ක කළ සම්බන්ධීකරණය ඔස්සේ එය ක්‍රියාත්මක විය.
එම මෙහෙයුම පිණිස නයිජීරියානු රජය දුන් සහයෝගය සම්බන්ධයෙන් එක්සත් ජනපද ආරක්ෂක ලේකම් පීට් හෙග්සෙත් සිය ස්තුතිය පුද කළේය. වැඩි දුර ඉදිරි ප්‍රහාර අපේක්ෂාවෙන් සිටින ලෙස ද ඔහු දැනුම් දුන්නේය.
මුස්ලිම් ජනයාද අයිසිස් ත්‍රස්ත තර්ජනයන්ට මැදිව ඇතැයි නයිජීරියා රජය පවසයි. එරට උතුරු ප්‍රදේශයන්හි බහුතර මුස්ලිම් ජනගහනයක් පවතින අතර බටහිර කලාපයේ කිතුනු ජනයා වාසය කරති.
අයිසිස් බලපෑමට යටත්ව ඇති ඊශානදිග නයිජීරියාවේ ඊයේ සිදු වූ මරාගෙන මැරෙන ත්‍රස්ත ප්‍රහාරයකින් පුද්ගලයින් පස් දෙනෙක් ජීවිතක්ෂයට පත්ව තවත් 35 දෙනෙකුවත් තුවාළ ලදහ.
විවිධ ආගමික විශ්වාස සහිත ජන කොටස් අතර සාමය පවත්වා ගන්නා ලෙස ආයාචනා කරන බව, නයිජීරියානු ජනපති, බෝලා අහ්මෙඩ් ටිනුබු (Bola Ahmed Tinubu), එක්ස් (X) මත සිය නත්තල් පණිවුඩයෙන් කියා සිටියේය.
(සටහන |Reuters ඇසුරින්; හර්ෂ උදයකාන්ත පීරිස්)
(harshaprs@yahoo.com)
12/26/2025
මුලාශ්‍රය :
US says it struck Islamic State militants in northwest Nigeria
