ඉරානයේ බැලස්ටික් මිසයිල හෝ න්‍යෂ්ටික අවි වැඩසටහන නැවත පණ ගන්වන්නේ නම්, සහ හමාස් සංවිධානය අවි බිම නොතබන්නේ නම්, ඊට එරෙහිව දැඩි පියවර ගැනීමට නොපැකිලෙන බව, ඔහු එහිදී අවධාරණය කළේය.
එක්සත් ජනපද ජනපතිවරයා මේ අදහස් පළ කළේ ෆ්ලොරීඩා හිදී ඊශ්‍රායල අග්‍රාමාත්‍ය, බෙන්ජමින් නෙතන්යාහු හමුවීමෙන් අනතුරුවය. පසුගිය ජුනි මස එල්ල කළ එක්සත් ජනපද ගුවන් හමුදා ප්‍රහාර නොතකා, ඉරානය සිය අවි වැඩසටහන යළි සක්‍රීය කර ඇති බවට ජනපතිවරයා චෝදනා කළේය.
" කට්ටිය අවි සහ තවත් දේ නිෂ්පාදනය ආයේ පටන් අරන් කියල මට ආරංචියි. එහෙම නම්, ඒ අපි ගහපු තැන්වල වෙන්න බැහැ, හැබැයි, වෙනත් වැඩ බිමක වෙන්න පුළුවන්. අපි ටක්කෙටම දන්නවා, ඔවුන් කොහෙද යන්නෙ, මොනවද කරන්නෙ කියලා. සමහරවිට, ඔවුන් වරදක් නොකරාවි. අනවරතයේ, B-2 යානා වලට ඉන්ධන නාස්ති කරගන්න අපට අවශ්‍ය නෑ. එහෙ ගිහින් එන්නම පැය 37ක් යනවා.... එච්චර ඉන්ධන නාස්ති කරගන්නෙ මොකට ද?" මාධ්‍යවේදීන් ඇමතූ ජනපති, ට්‍රම්ප් කියා සිටියේය.
පසුගිය ජුනි මස ඉරානයේ සිදු කළ එක්සත් ජනපද ගුවන් ප්‍රහාර
පසුගිය ජුනි මස ඉරානයේ සිදු කළ එක්සත් ජනපද ගුවන් ප්‍රහාරයන්ට යොදා ගැනුණේ, අති ප්‍රබල B-2 බෝම්බ ප්‍රහාරක ජෙට් යානා ය.
අග්‍රාමාත්‍ය නෙතන්යාහු සමග සිදු කළ සාකච්ඡා පූර්ණ ලෙස, ඉදිරි ගාසා සාම සැලැස්ම සහ ඉරානය හා ලෙබනනයේ හිස්බුල්ලා සංවිධානය පිලිබඳ ඊශ්‍රායල වැඩපිළිවෙළ සම්බන්ධයෙන් බව ද හෙතෙම පැවසීය.
ජුනි මස ඉරානය සහ ඊශ්‍රායලය අතර දින 12ක යුද ගැටුම් පැවතියේය. මෙම මස තුළ දෙවන වරටත් මිසයිල අත්හදා බැලීම් සිදු කළ බව, ඉරානය ඉකුත් සතියේ කියා සිටියේය.
ඉරානය හා යළි ගැටුමකට යාමේ අදහසක් නැතත්, ටෙහෙරානයේ එම ක්‍රියා පිලිබඳ ඊශ්‍රායලය විමසිල්ලෙන් පසු වන බව, අග්‍රාමාත්‍ය, නෙතන්යාහු පැවසීය.
ගාසා සටන් විරාමයේ දෙවන අදියර කඩිනම් කළ යුතු බව, ජනපති ට්‍රම්ප් අවධාරණය කළේය. එහි අවසන, ඊශ්‍රායලය මුළුමනින්ම පලස්තීන භූමියෙන් ඉවත් විය යුතු බව සහ හමාස් සංවිධානය පූර්ණ වශයෙන් අවි බිම තබා ගාසා පාලනය අත් හළ යුතු බව, ට්‍රම්ප් ගේ මතයයි.
(සටහන |Reuters ඇසුරින්; හර්ෂ උදයකාන්ත පීරිස්)
