ඉන්දීය දුම්වැටි මත නව බද්දක්

ලොව වැඩිම ජනගහනයක් සහිත රට වන ඉන්දියාවේ දුම්වැටි භාවිතා කරන්නන් සංඛ්‍යාව මිලියන 100 ඉක්මවයි.

ගෝල්ඩ් ෆ්ලේක් (Gold Flake) දුම්වැටි නිෂ්පාදනය කරන, එරට දුම්වැටි වෙළඳපොල ඉදිරියෙන්ම සිටින ඉන්දියානු දුම්කොළ සමාගමේ  කොටස් මිල 4.4%කින් පහත වැටිණි. එරට, මාර්ල්බොරෝ (Marlboro) දුම්වැටි බෙදා හරින ගොඩ්ෆ්‍රි ෆිලිප්ස් ඉන්ඩියා කොටස් මිල ද 7.75කින් පහත වැටී තිබේ.

 

ඒ අනුව, ඉන්දියානු දුම්කොළ සමාගමේ කොටස් විකුණුම් මිල ඉන්දියානු රුපියල් 385.25 ක් ලෙස සටහන් විය. එය ඉකුත් වසරේ ජුනි මස සිට වාර්තා ගත අඩුම මිල වේ. නිෆ්ටි 50 (Nifty 50) දර්ශකයේ විශාලතම කඩාවැටීම එම සමාගමෙන් වාර්තා  වේ.

පෙබරවාරි 1 දා සිට, දුම් වැටියක දිග ප්‍රමාණය අනුව, දුම්වැටි 1000කට ඉන්දියානු රුපියල් 2,050–8,500 අතර නිෂ්පාදන බද්දක් අය කෙරේ. දුම්වැටි භාවිතා කිරීමෙන් සීග්‍රයෙන් උද්ගතවන සෞඛ්‍ය ගැටළු හේතුවෙන්, කලින් කල ඒ මත පනවන බදු වැඩි කිරීමට රජය විසින් පියවර ගෙන තිබේ. දුම්වැටි පැකට්ටු මත සඳහන් එහි  අන්තරායකර බව දැක්වෙන දැන්වීම්, ප්‍රමාණයෙන් විශාල කර ප්‍රදර්ශනය කිරීමට ද නියම කර ඇත. පරිභෝජනය විශාල ලෙස අඩු කිරීම එහි අරමුණයි.

එරට දුම්වැටි සඳහා නව බදු පනවා ඇත්තේ, දැනටමත් ක්‍රියාත්මක 40% ක භාණ්ඩ හා සේවා බද්දට අමතරව වේ.  

ඒ අනුව ඉදිරියේ, සිල්ලර වෙළඳපොළ ඉන්දීය දුම්වැටි මිල ඉහළ යෑමක් අපේක්ෂා කෙරේ.

(සටහන |Reuters ඇසුරින්; හර්ෂ උදයකාන්ත පීරිස්)

මුලාශ්‍රය :

Indian tobacco stocks tank as government levies new tax on cigarettes