වෙනිසියුලානු ජනාධිපති අල්ලා ගත් හැටි ට්‍රම්ප් කියයි

විදෙස් මාධ්‍යයක් වෙත අදහස් දක්වමින් ට්‍රම්ප් පවසා ඇත්තේ ඔහුව අල්ලා ගන්නා විට ඔහු සිට ඇත්තේ නිවසක නොව බලකොටුවක් වැනි ස්ථානයක බවය.

එමෙන්ම ඔහුව අල්ලා ගන්නා විට තමන් එය සජීවීව නැරඹූ බවත් අමෙරිකානු ජනාධිපතිවරයා පවසා තිබේ.

එමෙන්ම මෙම ප්‍රහාර මීට දින 4කට පෙර සිදුකිරීමට නියමිතව තිබුණද කාලගුණික තත්ත්වය හමුවේ එය වෙනස් වූ බවත් කාලගුණය යහපත් වූ වහාම ඒ සඳහා ක්‍රියාත්මක වන ලෙස තමන් දැන්වූ බවත් අමෙරිකානු ජනාධිපතිවරයා එම මාධ්‍ය වෙත පවසා ඇත.

කෙසේ නමුත් ප්‍රහාරයට සති කිහිපයකට පෙර මධුරෝට යටත් වන ලෙස දැන්වූ බවද අමෙරිකානු ජනාධිපතිවරයා එහිදී පවසා තිබේ.

වෙනිසියුලා ජනාධිපති මදුරෝ යු.එස්.එස් ඉවෝ ජිමා (USS Iwo Jima) නෞකාවේ රඳවා සිටින අයුරු දැක්වෙන බව කියන ඡායාරූපයක් ද ජනපති ට්‍රම්ප් සමාජ මාධ්‍ය වෙත මුදා හැර තිබේ.

මේ අතර අමෙරිකා එක්සත් ජනපදයේ මෙරීන් බළකාව විසින් අල්ලාගත් වෙනිසියුලානු ජනාධිපති මධුරෝ සහ ඔහුගේ බිරිඳ නිව්යෝර්ක් බලා යමින් සිටින බවද ඩොනල්ඩ් ට්‍රම්ප් එම මාධ්‍ය වෙත පවසා තිබේ.

එහිදී අදහස් දක්වමින් ට්‍රම්ප් සඳහන් කර ඇත්තේ ඔවුන් බොහෝ මිනිසුන් සහ අමෙරිකානුවන් විශාල ප්‍රමාණයක් මත්ද්‍රව්‍ය භාවිතයෙන් මරා දැමූ බවත් ඒ අනුව මෙම චෝදනා මත ඔවුන් දෙපළට නිව්යෝර්ක් හිදී අධි චෝදනා ගොනු කර ඇති බවය.

මේ අතර වෙනිසියුලාවේ පවතින තත්ත්වය මත එරට බලය අත්පත් කරගැනීම සඳහා විපක්ෂය නායිකාව වන මාරියා කොරිනා මචාඩෝට සහාය ලබා දීම සම්බන්ධව සොයා බැලිය යුතු බව ට්‍රම්ප් පවසා තිබේ.

උප ජනාධිපතිනී ඩෙල්සි රොඩ්රිගස් 
මෙහිදී වෙනිසියුලාවේ දැනට උප ජනාධිපතිවරියක් සිටින බවත් ඔවුන් කුමන ආකාරයේ කටයුතු ඉදිරියට සිදුකරන්නේද යන්න තමන් නොදන්නා බව පැවසා ඇති අමෙරිකානු ජනාධිපතිවරයා පවසා ඇත්තේ රට තුළ ඉතිරිව සිටින ඕනෑම මධුරෝ පාක්ෂිකයෙකුට එරෙහිව දෙවන රැල්ලකට එක්සත් ජනපදය සූදානම් බවය.

එමෙන්ම ඉදිරියේදී වෙනිසිලාවේ තෙල් සහ යටිතල පහසුකම් නැවත ගොඩනැගීම සඳහා අමෙරිකානු සමාගම් දැඩි ලෙස සම්බන්ධ වනු ඇතැයි තමා විශ්වාස කරන බවද ට්‍රම්ප් පවසා තිබේ.

වෙනිසියුලාව සමඟ එක්සත් ජනපද "හවුල්කාරීත්වය" වෙනිසියුලාවේ ජනතාව "පොහොසත්, ස්වාධීන සහ ආරක්ෂිත" බවට පත් කරනු ඇතැයි ට්‍රම්ප් කියා සිටියේය.

ඒ අනුව මත්ද්‍රව්‍ය ජාවාරම හරහා ත්‍රස්තවාදී කටයුතුවලට අනුබල දීම, ඇමරිකාව තුළට විශාල වශයෙන් කොකේන් මත්ද්‍රව්‍ය ගෙන්වීමට කුමන්ත්‍රණය කිරීම, මාරක අවි සහ පුපුරණ ද්‍රව්‍ය ළඟ තබා ගැනීම, මැෂින් තුවක්කු සහ විනාශකාරී උපකරණ ඇමරිකාවට එරෙහිව භාවිතා කිරීම සඳහා ළඟ තබා ගැනීම සහ ඒ සඳහා කුමන්ත්‍රණය කිරීම ආදී චෝදනා ඊට අයත් බව විදෙස් මාධ්‍ය පෙන්වා දෙයි.

 

වෙනිසියුලාව කොකේන් ප්‍රවාහනය කරන ප්‍රධාන මාර්ගයක් බවත්, ඇමරිකාවේ 'ෆෙන්ටැනයිල්' අර්බුදයට දායක වන බවත් ට්‍රම්ප් තර්ක කරයි. ඔහු වෙනිසියුලානු අපරාධ කල්ලි දෙකක් වන 'ට්‍රෙන් ඩි අරගුවා' සහ 'කාර්ටෙල් ඩි ලොස් සෝල්ස්' විදේශීය ත්‍රස්තවාදී සංවිධාන ලෙස නම් කර ඇත. 'කාර්ටෙල් ඩි ලොස් සෝල්ස්' කල්ලිය මෙහෙයවන්නේ මදුරෝ විසින් යැයි ද ට්‍රම්ප් චෝදනා කර ඇත. කෙසේ නමුත් මෙම සියලු චෝදනා වෙනිසියුලා ජනාධිපති මදුරෝ සහ බිරිඳ ප්‍රතික්ෂේප කර ඇතැයි ද පැවැසෙයි.