ඊයේ (20) ඊශ්‍රායල හමුදා එහි පලස්තීන ජනතාවට වහා නිවෙස් අතැර පලා යන ලෙස දැනුම් දුන්නේය.
පසු ගිය ඔක්තෝබර මස සටන් විරාමය ක්‍රියාත්මක කිරීමෙන් අනතුරුව සිදු කළ පළමු සමූහ ඉවත් කිරීම මෙය වේ. ඊශ්‍රායල හමුදා සිය පාලන කලාපය පුළුල් කිරීමේ ප්‍රයත්නයක නිරත බව හමාස් සංවිධානය චෝදනා කරයි.
ඛාන් යුනිස් හි නැගෙනහිරට වන්නට පිහිටි බානි සුහයිලා ප්‍රදේශයට ඊශ්‍රායල හමුදා සඳුදා (19) ගුවනින් ඉවත්වීමේ නියෝග හෙළූහ.
"හදිසි නිවේදනයයි. මෙම ප්‍රදේශය ඊශ්‍රායල හමුදා පාලනය යටතේ පවතී. ඔබ ඉන් වහා ඉවත්විය යුතුයි," යනුවෙන් එහි සඳහන් විය. අරාබි, හීබෘ සහ ඉංග්‍රීසි යන භාෂා ත්‍රිත්වයෙන්ම එම නියෝග නිකුත් කර තිබිණි.
එම ප්‍රදේශයෙන් පලස්තීනුවන් බලහත්කාරයෙන් ඉවත් කෙරෙන බවට චෝදනා ඊශ්‍රායල හමුදා ප්‍රතික්ෂේප කරති. ගුවනින් දැන්වීම් හෙළූ බව සත්‍යය වුව, හමාස් සංවිධානය සමග ක්‍රියාත්මක යුධ විරාම රේඛාව අතික්‍රමණය නොකරන ලෙස පලස්තීනුවන්ට අනතුරු ඇඟවීම පිණිස එසේ කළ බව එම හමුදා පැවසූහ.
ගාසා සටන් විරාමය එහි පළමු අදියරෙන් ඔබ්බට ගොස් නැතැයි රොයිටර්ස් පුවත් සේවය පවසයි.
මිලියන 2කට අධික සමස්ත පලස්තීන ජනගහනය තවමත් ගාසා තීරයේ තුනෙන් එක් කොටසක "ගාල්" කර සිටිති. එම බහුතරය ද වෙසෙන්නේ තාවකාලික කූඩාරම් සහිත කඳවුරු සහ යුද්ධයෙන් විනාශව ශේෂ වූ ගොඩනැගිලි කොටස් තුළ ය. හමාස් නායකත්වයෙන් යුත් පරිපාලනයක් තුළ ජන ජීවිතය යළි ඇරඹී තිබේ.
(සටහන |Reuters ඇසුරින්; හර්ෂ උදයකාන්ත පීරිස්)
1/21/2026
(harshaprs@yahoo.com)
මුලාශ්‍රය :
Israel orders Gaza families to move in first forced evacuation since ceasefire
