විදේශිකයින්ට ජපානයෙන් නව පැකේජයක්; නීති තද වෙයි

එරට  පුරවැසි භාවය ලබා ගැනීම  පිණිස දැඩි කොන්දේසි  සහ රට තුළ අධික සංචාරක තදබදය  සීමා කිරීම උදෙසා පියවර ඊට ඇතුළත් ය.

අද (23) පැවති කැබිනට් හමුවක දී ඒ පිලිබඳ කෙටුම්පත් සාකච්ඡා කෙරිණි. ජපන් ජාතිකයින් ට සහ එරටට පැමිණෙන විදේශිකයින් ට  ආරක්ෂාකාරී පරිසරයක් නිර්මාණය කිරීම සහ එරට නීති රෙගුලාසි අනුව එක්ව කටයුතු කිරීමට මග සැලසීම එහි අරමුණයි.

නව ප්‍රතිපත්ති යටතේ, ජපාන පුරවැසි භාවය ඉල්ලීම  දැඩි කොන්දේසිවලට යටත් කෙරේ. එරට වෙසෙන විදේශිකයින්ට ජපන් බස සහ නෛතික රෙගුලාසි උගැන්වීමේ නව වැඩසටහනක් ද ආරම්භ කෙරේ. විදෙස් ඉල්ලුම්කරුවන්, එම අධ්‍යයන ක්‍රියාවලියට අනුගත වීමේ සහ අදාළ කරුණු  වටහා ගැනීමේ ප්‍රාමාණික බව අනුව පුරවැසි භාවය පිලිබඳ නිර්දේශ නිකුත් කෙරේ.  

ජපානයේදී වෛද්‍යාධාර බිල්පත් පියවීමට අපොහොසත් වන විදේශිකයින්  දැඩි නීති රීතින්ට යටත් කෙරේ. ඒ අනුව, ගෙවීම් පැහැර හරින විදේශිකයින්ගෙන්  එම මුදල් අය  කරගැනීම පිණිස, ආගමන අධිකාරිය හා එක්ව විශේෂ වැඩපිළිවෙළක් දියත් කෙරෙනු ඇත.  විදේශිකයින් විසින්  නොගෙවන ලද වෛද්‍ය බිල්පත් සම්බන්ධයෙන්, අදාළ වෛද්‍ය මධ්‍යස්ථාන හා කඩිනම් තොරතුරු හුවමාරුවට එමගින් ඉඩ සැලසේ.

පොදු නිවාස සංකීරණයන්හි    රැඳී සිටින නව විදෙස් නෙවාසිකයින් සම්බන්ධයෙන් සුවිශේෂී නිරීක්ෂණ ක්‍රියාවලියක් ද ආරම්භ කෙරේ.  ප්‍රධාන සංචාරක ආකර්ෂණ මධ්‍යස්ථාන වෙතින් පරිබාහිර වෙනත් ගමනාන්ත වෙත විදෙස් සංචාරකයින් යොමු කිරීම මගින් සංචාරක තදබදය අවම කිරීමට  පියවර ගැනේ.

ජපාන පුරවැසිභාවය හිමි විදෙස් ජාතිකයින් උදෙසා ප්‍රධාන නගර පාදක නව මහල් නිවෙස් සංකීරණ ඉදි කෙරෙන අතර කෙටිකාලීන ගෙවීම් පදනම මත පමණක් ඒවා ලබා දීමට කටයුතු කෙරේ.  අඥාත හිමිකාරිත්වයක් සහිත එරටට අයත් දුරස්ථ දිවයින් ජාතිකකරණය ට පියවර ගැනේ.

ජාත්‍යන්තර තත්ත්වයන් සැලකිල්ලට ගැනීමෙන් අනතුරුව එකී සංසන්දනාත්මක තත්ත්වයන් මත විදෙස් ජාතිකයින්  විසින් ජපානයේ  දේපළ මිලදී ගැනීමට අදාළ කොන්දේසි හඳුන්වාදීමට ද නියමිතය.

මේ සම්බන්ධයෙන් ජපානය මෙතෙක් මුහුණ පා ඇති අභියෝග පිලිබඳ අවධානය යොමු කොට නව ප්‍රතිපත්ති මාලාව ක්‍රියාත්මක බව, විදෙස්  ජාතිකයින් සම්බන්ධ ප්‍රතිපත්ති පිලිබඳ අමාත්‍ය, ඔනොදා කිමී මාධ්‍යවේදීන් හමුවේ පැවසීය. ඒ පිලිබඳ සියළු යාවත්කාලීන කිරීම් නොවලහා ජනතාව ඉදිරියේ තබන බවද ඇය කියා සිටියාය.  අදාළ අනෙකුත් අමාත්‍යංශ හා සම්බන්ධීකරණය කරමින් සිය අමාත්‍යංශ කාර්යාලය, නව  වැඩපිළිවෙල සම්බන්ධ නියමු මධ්‍යස්ථානය සේ ක්‍රියා කරන බව ඇය කීය.

(සටහන |NHK WORLD ඇසුරින්; හර්ෂ  උදයකාන්ත පීරිස්)
1/23/2026
(harshaprs@yahoo.com)

මුලාශ්‍රය :
Japanese govt. draws up basic policies on foreign nationals