නව අනුමැතිය යටතේ යුදෙව්වන්ට එහි ඉඩම් මිලදී ගැනීමේ අයිතිය හිමිවේ. එය සිය නිජබිම බලහත්කාරයෙන් ඊශ්‍රායලට ඈඳා ගැනීමකැයි, පලස්තීන ජනයා කියා සිටිති.
පලස්තීනුවෝ බටහිර ඉවුරේ අනාගත ස්වෛරී රාජ්‍යයක් ඉදි කිරීමේ සිහිනයක පසුවෙති. වත්මන එහි බහුතර පාලනය ඊශ්‍රායල හමුදා යටතේ පවතී. පලස්තීන ස්වයං පාලනය යටතේ පවත්නේ සීමිත සුළුතර කොටසකි. එය බටහිර සාහාය හිමි පලස්තීන අධිකාරිය විසින් පාලනය කෙරේ.
මෙම වසර අග ඊශ්‍රායල අග්‍රාමාත්‍යවරයා ජාතික මැතිවරණයකට මුහුණ දෙන්නේය. බටහිර ඉවුරේ පලස්තීන රාජ්‍යයක් බිහිවීම ඊශ්‍රායලයට ප්‍රබල තර්ජනයක් බව ඔහු කියා සිටී. බටහිර ඉවුරේ ජනාවාසයන්හි පදිංචි බහුතර යුදෙව් ජනයා ඔහුගේ සන්ධාන රජයේ පාක්ෂිකයෝ වෙති.
1967 පැවති මැද පෙරදිග යුද්ධයෙන් පසු ඊශ්‍රායලය බටහිර ඉවුර බලහත්කාරයෙන් අත්පත් කර ගත්තේය. බයිබලයට සහ ඓතිහාසික සාධක අනුව එය යුදෙව් රාජ්‍යය සතු බව ඊශ්‍රායලය කියයි.
"බටහිර ඉවුරේ අපගේ විප්ලවය අඛන්ඩයි. එහි සියලු භූමි ප්‍රදේශයන්හි අපගේ පාලනය තවදුරටත් ශක්තිමත් කෙරෙමින් පවතී," ඊශ්‍රායල මුදල් අමාත්‍ය, බෙසලෙල් ස්මොට්‍රිච් කියා සිටී.
බටහිර ඉවුරේ ඉඩම් ලියාපදිංචිය එරට ජාතික ආරක්ෂාවේ අත්‍යවශ්‍ය කරුණක් බව ආරක්ෂක අමාත්‍ය, ඉශ්‍රයෙල් කැට්ස් පවසයි. පලස්තීන අධිකාරිය විසින් ප්‍රවර්ධිත අනීතික ඉඩම් ලියාපදිංචි ක්‍රියාවලියට ප්‍රතිචාර ලෙස එය ක්‍රියාත්මක කරන බව ඔහු අවධාරණය කරයි.
(සටහන |Reuters ඇසුරින්; හර්ෂ උදයකාන්ත පීරිස්)
2/17/2026
(harshaprs@yahoo.com)
මුලාශ්‍රය :
Israeli cabinet approves West Bank land registration, Palestinians condemn 'de-facto annexation'
