ඉරාන - එක්සත් ජනපද යුද්ධයක් පිලිබඳ අන්තරායය මධ්‍යයේ ඉන්දීය නායකයාගේ මෙම සංචාරය ජාත්‍යන්තර අවධානයට ලක්ව තිබේ. දෙරට අතර ද්වී පාර්ශ්වීය සබඳතා තර කිරීම සහ කලාපීය ප්‍රවණතා සාකච්ඡා කිරීම සංචාරයේ අරමුණයි.
ඉන්දීය අග්‍රාමාත්‍යවරයා ඊයේ ඊශ්‍රායල පාර්ලිමේන්තුව ඇමතීය. එහිදී, 2023 ඔක්තෝබර හමාස් ප්‍රහාරය පිලිබඳ ඊශ්‍රායලය වෙත සිය කණගාටුව ප්‍රකාශ කළ අගමැතිවරයා, ඉන්දියාව සෑම අවස්ථාවෙක ඊශ්‍රායලය සමග බව පැවසීය.
"ඔබ සේම අප ද ත්‍රස්තවාදය කිසිසේත් අනුමත කරන්නේ සහ දරා සිටින්නේ නැහැ. දෙබිඩි පිළිවෙතක් අනුගමනය කරන්නේ ද නැහැ," අගමැති මෝදි කීය.
ඊශ්‍රායල අග්‍රාමාත්‍ය බෙන්ජමින් නෙතන්යාහු ද ඊයේ පාර්ලිමේන්තුව අමතා කතා කළේය. දෙරටම ත්‍රස්තවාදයේ කුරිරු හස්තයට හසුව ඇති බව, ඔහු ප්‍රකාශ කළේය. රැඩිකල් ඉස්ලාම්වාදයෙන් ඊශ්‍රායලය මෙන්ම ඉන්දියාවද තර්ජනයට ලක්ව ඇතැයි ඔහු කියා සිටියේය.
ශ්‍රේෂ්ඨාධිකරණ ප්‍රධානීට ආරාධනා නොකිරීම මත ඇතැම් විපක්ෂ මන්ත්‍රීවරු එම විශේෂ පාර්ලිමේන්තු සැසිය අවස්ථාවේ සභා ගර්භයෙන් පිටව ගියමුත් අගමැති මෝදි සභාව අමතන අවස්ථාවේ යළි පැමිණියහ. පාර්ලිමේන්තු කතානායකවරයා අගමැති නෙතන්යාහුගේ දක්ෂිණාංශික රජයේ පක්ෂ සාමාජිකයෙකි. ඔහු සහ ශ්‍රේෂ්ඨාධිකරණය අතර විරසකයක් පවතී.
හින්දු ජාතිකවාදී මෝදි 2017 වසරේ ප්‍රථම වරට ඊශ්‍රායල සංචාරයක නිරත විය. එය ඉන්දීය ඉතිහාසයේ එරට අග්‍රාමාත්‍ය වරයකු විසින් සිදු කළ පළමු ඊශ්‍රායල නිල සංචාරය විය.
මෙවර ඔහු එහි සංචාරය කරන්නේ එක්සත් ජනපදය ඉරානයට පහරදීම පිණිස මැද පෙරදිග කලාපයේ යුද ශක්තිය තර කරන අතර වාරයේය. පෙන්ටගනය ඊශ්‍රායලයේ සහාය පිණිස එරට ආසන්නයේ මධ්‍යධරණී කලාපය වෙත ප්‍රහාරක යානා වාහක දෙවන යුද නෞකාවක් ද පිටත් කර තිබේ.
(සටහන |Reuters ඇසුරින්; හර්ෂ උදයකාන්ත පීරිස්)
2/26/2026
(harshaprs@yahoo.com)
මුලාශ්‍රය :
India's Modi visits Israel as US-Iran tensions mount
