ඒ අනුව, එක්සත් ජනපද හමුදාවට අයත් 82 වැනි ගුවන් භට ඛණ්ඩයේ (82nd Airborne Division) සෙබළුන් එම කලාපය වෙත පිටත් කර හැරීමට නියමිතය.
ටෙහෙරානය සමග එකඟතාවෙන් යුද්ධය අවසන් කිරීම පිලිබඳ ජනපති ට්‍රම්ප්ගේ අදහස් ප්‍රකාශ කිරීම් අතරතුර මෙම නව පියවර, ඉරානයට එරෙහි යුද්ධය තවත් උත්සන්න කර තිබේ.
ඉරාන අභ්‍යන්තරය වෙත දහස් සංඛ්‍යාත එක්සත් ජනපද හමුදා භට පිරිසක් පිටත් කර හැරීමට සැරසෙන බවට මීට පෙර ද ප්‍රකාශ විය.
මැද පෙරදිග යුද්ධයේ සිව් වන සතියයි මේ. යුද උණුසුම හේතුවෙන් ගෝලීය වෙළඳපොළ දැඩි ව්‍යාකූලත්වයකට පත්ව තිබේ. උද්ධමනය සීග්‍රයෙන් ඉහළ යමින් පවතී.
කලාපය වෙත නවතම එක්සත් ජනපද හමුදා පිටත් කිරීමේ කාලවකවානු පිලිබඳ තවමත් නිශ්චිතව ප්‍රකාශව නැත. එම සියළු නිවේදන පෙන්ටගනය විසින් නිකුත් කෙරෙනු ඇත. කලාපයේ එක්සත් ජනපද සන්නද්ධ ක්‍රියාන්විත පිලිබඳ ඕනෑම තීරණයක් ගැනීමේ සහ ක්‍රියාත්මක කිරීමේ බලය ජනපති ට්‍රම්ප් සතු ය.
කෙසේ වෙතත්, ඉරාන අභ්‍යන්තරය වෙත එම බලඇණි පිටත් කිරීමේ කිසිදු හදිසි තීරණයක් නැතැයි එක්සත් ජනපද හමුදා ආරංචි මාර්ග පවසයි. දැනට සිදු කෙරෙන්නේ ඉදිරි යුද්ධය පිණිස මැද පෙරදිග කලාපයේ එක්සත් ජනපද හමුදා ශක්තීන් තර කිරීමකි. එක්සත් ජනපද හමුදා භටයින් 3000ත් 4000ත් අතර සංඛ්‍යාවක් ඒ වෙත පිටත් කර හැරීමට නියමිතය.
එක්සත් ජනපදයට අයත් උභය ප්‍රහාරක යාත්‍රාවක් වන යූ. එස්. එස්. බොක්සර් (USS Boxer) මගින් කලාපය වෙත දහස් සංඛ්‍යාත නාවුක බලඇණියක් පිටත් කර හැරීමේ සූදානමක් පිලිබඳව ද රොයිටර්ස් පුවත් සේවය ඉකුත් 20 දා වාර්තා කළේය. ඒ සමග තවත් යුද නෞකා රැසක් ද එම කලාපය වෙත පිටත් කර හැරීමට නියමිත විය.
එම අමතර බලඇණි පිටත් කර හැරීමට පෙරාතුව ඒ වන විටත් කලාපය වෙත එක්සත් ජනපද හමුදා භටයින් 50,000කට අධික පිරිසක් මුදා හැරීමට පෙන්ටගනය විසින් පියවර ගෙන තිබිණි.
ඉරානය හා ඵලදායී සාකච්ඡා පැවති බවත්, එරට බලශක්ති මර්මස්ථාන වෙත පහර දීමේ සැලසුම් කල් දැමූ බවත් ජනපති ට්‍රම්ප් විසින් ප්‍රකාශ කර දිනකට පසුව නව හමුදා බලඇණි පිටත් කර හැරීම පිලිබඳ නිවේදනය කෙරිණි.
පෙබරවාරි 28 දා ඉරානය වෙත ඊශ්‍රායල - එක්සත් ජනපද සභාග ප්‍රහාර ආරම්භ වීමෙන් අනතුරුව, මේ වන විට එක්සත් ජනපද හමුදා ඉරානයේ ඉලක්ක 9000ක් වෙත ප්‍රහාර එල්ල කර ඇත.
(සටහන |Reuters ඇසුරින්; හර්ෂ උදයකාන්ත පීරිස්)
මුලාශ්‍රය :
US expected to send thousands more soldiers to Middle East, sources say
