ඩොනල්ඩ් ට්‍රම්ප් ජනාධිපතිවරයාගේ අපේක්ෂාව සාමය උදා කිරීම බවත්, තවදුරටත් සිදුවන ජීවිත හානි හා විනාශයන් ඔහු අනුමත නොකරන බවත් ඇය සඳහන් කළාය.
කෙසේ වෙතත්, ඉරානය මේ වන විට හමුදාමය වශයෙන් පරාජයට පත්ව ඇති බවත්, පවතින යථාර්ථය පිළිගැනීමට ඉරානය අපොහොසත් වුවහොත් පෙර නොවූ විරූ ආකාරයේ ප්‍රහාරයකට මුහුණ දීමට සිදුවන බව ජනාධිපති ට්‍රම්ප් සහතික කර ඇති බවත් ධවල මන්දිර මාධ්‍ය ලේකම්වරිය පවසා සිටියාය.
ධවල මන්දිරයේ ඊයේ (25) පැවති මාධ්‍ය හමුවේදී එක්සත් ජනපද සාම සැලැස්ම ප්‍රතික්ෂේප කිරීමට ඉරානය කටයුතු කළහොත් ගනු ලබන ක්‍රියාමාර්ග සම්බන්ධයෙන් මාධ්‍ය වෙත අදහස් දක්වමින් ඇය මේ බව ප්‍රකාශ කළාය.
ඉරානයට එල්ල කරන ප්‍රහාර නතර කිරීම සඳහා අමෙරිකානු ජනාධිපති ඩොනල්ඩ් ට්‍රම්ප් විසින් ඊයේ දිනයේ දී සටන් විරාම කොන්දේසී ප්‍රකාශයට පත්කරනු ලැබීය.
අදාළ සටන් විරාමය සඳහා කොන්දේසී 15ක් අමෙරිකාව විසින් ඉරානයට ඉදිරිපත් කර ඇති අතර එම කොන්දේසීවලට කැමැත්ත පල කරන්නේ නම් සටන් විරාමයකට සූදානම් බව අමෙරිකානු ජනාධිපතිවරයා ප්‍රකාශ කළේය.
ඉරානය ට්‍රම්ප් ගේ යෝජනා ප්‍රතික්ෂේප කරයි
ඉරාන විදේශ කටයුතු අමාත්‍ය අබ්බාස් අරගච්
කෙසේවෙතත් අදාළ සටන් විරාම යෝජනා ප්‍රතික්ෂේප කරන ඉරාන විදේශ කටයුතු අමාත්‍ය අබ්බාස් අරගච් ප්‍රකාශ කර සිටියේ, අමෙරිකාව සමඟ කිසිදු සාකච්ඡාවක් පැවැත්වීමට ඉරානය අදහස් නොකරන බවය.
අමෙරිකා එක්සත් ජනපදය විසින් මැදිහත්කරුවන් හරහා විවිධ පණිවුඩ යොමුකළ ද ඉරානයට අවශ්‍ය වන්නේ ස්ථීර අවසානයක් බව ඉරාන විදේශ අමාත්‍යවරයා ප්‍රකාශ කර තිබේ.
ඒ සඳහා ඉරානයට සිදුවු විනාශය සම්බන්ධයෙන් වන්දි ලබාදීම ඇතුළු ඉල්ලීම් 5ක් යොමුකිරීමට ද ඉරාන බලධාරීන් පියවර ගෙන ඇති බව විදෙස් මාධ්‍ය වාර්තා කළේය.
මෙම මැදපෙරදිග පවතින්නේ ඉරාන යුද්ධයක් හෝ අමෙරිකානු යුද්ධයක් නොවන අතර ඊශ්‍රායලයේ අවශ්‍යතාවයට අමෙරිකාව කටයුතු කරමින් සිටින බව ඉරාන විදේශ අමාත්‍යවරයා පවසයි.
අමෙරිකාව බලාපොරොත්තු වු පරිදි ඉරානය යුදමය වශයෙන් පරාජය කිරීමට නොහැකි බවත් අසල්වැසි රටවල් ආරක්ෂා කිරීම සම්බන්ධයෙන් අමෙරිකානු උත්සාහය අසාර්ථක වී ඇති බවත් ඔහු ප්‍රකාශ කර තිබේ.
සබැඳි පුවත් :
ඉරානය, අමෙරිකානු යෝජනා ප්‍රතික්ෂේප කරයි
අමෙරිකාවේ සාම යෝජනාව පකිස්ථානය හරහා ඉරානයට
මුලාශ්‍රය :
Live Updates: White House says Trump will "unleash hell" if Iran doesn't make deal
Iran war live: US demands Tehran accept defeat; Israel pounds Lebanon
Is Trump any closer to an Iran exit strategy?
