මෙය ගතවූ මාසයක කාලය තුළ ට්‍රම්ප් පරිපාලනයේ සිදුවූ දෙවන ප්‍රධානතම කැබිනට් මට්ටමේ වෙනස් කිරීම ලෙස සැලකේ.
පෑම් බොන්ඩි පෞද්ගලික අංශයේ නව රැකියාවක් සඳහා යොමු වීමට නියමිත බැවින් ඇය සිය ධුරයෙන් ඉවත් වන බව ජනාධිපති ට්‍රම්ප් සිය 'ටෘත් සෝෂල්' (Truth Social) ගිණුමේ සටහනක් තබමින් තහවුරු කර ඇත.
පසුගිය වසර පුරා ඇය ඉටුකළ සේවය ඇගයීමට ලක්කර ඇති ජනාධිපතිවරයා, ඇය යටතේ අමෙරිකාවේ අපරාධ මර්දනය සාර්ථකව සිදු වූ බවත්, මිනීමැරුම් අනුපාතය 1900 වසරෙන් පසු අවම මට්ටමට පහත වැටුණු බවත් සඳහන් කර ඇති අතර, ඇයව "ශ්‍රේෂ්ඨ දේශප්‍රේමියෙක්" ලෙස ද ඔහු හඳුන්වා දී තිබේ.
විදෙස් මාධ්‍ය වාර්තා කරන පරිදි, මෙම හදිසි ඉවත් කිරීමට ප්‍රධානතම හේතුව වී ඇත්තේ ලිංගික අපරාධ චෝදනා ලැබ සිටින ප්‍රකට මූල්‍යකරුවෙකු වන ජෙෆ්රි එප්ස්ටයින්ට (Jeffrey Epstein) අදාළ රහසිගත ලිපිගොනු සම්බන්ධයෙන් පෑම් බොන්ඩි කටයුතු කළ ආකාරය පිළිබඳව ජනාධිපතිවරයා තුළ ඇති වූ දැඩි අප්‍රසාදයයි.
විශේෂයෙන්ම එප්ස්ටයින්ගේ "ගනුදෙනුකරුවන්ගේ ලැයිස්තුව" ප්‍රසිද්ධ කිරීම සම්බන්ධයෙන් ඇයට දැඩි විවේචන එල්ල විය.
පෑම් බොන්ඩිගේ ඉවත් වීමෙන් පසු පුරප්පාඩු වූ නීතිපති ධුරයේ වැඩ බැලීම සඳහා ජනාධිපති ට්‍රම්ප් විසින් නියෝජ්‍ය නීතිපති ටොඩ් බ්ලැන්ච් (Todd Blanche) පත් කර ඇත. ටොඩ් බ්ලැන්ච් මීට පෙර ඩොනල්ඩ් ට්‍රම්ප්ගේ පෞද්ගලික නීතිඥයෙකු ලෙස ද කටයුතු කර තිබේ.
එමෙන්ම ස්ථිර නීතිපති ධුරය සඳහා වත්මන් පරිසර ආරක්ෂණ ඒජන්සියේ (EPA) ප්‍රධානී ලී සෙල්ඩින් (Lee Zeldin) පත් කිරීමට බොහෝ දුරට ඉඩ ඇති බව ද ඇමරිකානු දේශපාලන ආරංචි මාර්ග පවසයි.
පසුගියදා ආරක්ෂක ලේකම් ක්‍රිස්ටි නොයෙම් (Kristi Noem) ධුරයෙන් ඉවත් කිරීමෙන් පසු සිදුවූ මෙම දෙවන ඉවත් කිරීමත් සමඟ ඇමරිකානු දේශපාලන කරළිය තුළ ට්‍රම්ප් පරිපාලන පිළිබඳ දැඩි කතාබහක් නිර්මාණය වී තිබේ.
මුලාශ්‍ර :
Trump removes US Attorney General Pam Bondi
Trump fires Pam Bondi as attorney general
Pam Bondi latest: Trump fires his attorney general
