ඊයේ (6), ධවල මන්දිරයේ පැවති මාධ්‍ය හමුවකදී ජනපතිවරයා සිදු කළ මෙම තර්ජනය, ට්‍රම්ප් පරිපාලනය විසින් මාධ්‍ය වෙත එල්ල කර ඇති පීඩනය තව දුරටත් උත්සන්න කරන්නක් බව විචාරකයෝ පවසති.
ඉරානය වෙත සිදු කෙරෙන එක්සත් ජනපද - ඊශ්‍රායල ප්‍රහාර සම්බන්ධ සෘණාත්මක විවරණ සහ වාර්තාකරණය සම්බන්ධයෙන් එරට ජනමාධ්‍යායතන සහ ප්‍රකාශන රැසක් ට්‍රම්ප් පරිපාලනයේ විවේචනයට බඳුන්ව පවතී.
පසු ගිය සිකුරාදා (3) ඉරාන අහසේ දී එක්සත් ජනපද ප්‍රහාරක යානාවක්යානයක් වෙඩි තබා බිම හෙලීමෙන් අනතුරුව එහි සිටි ගුවන් භටයින් දෙදෙනාගෙන් අයකු එක්සත් ජනපද හමුදා විසින් සාර්ථකව මුදා ගත් බව මාධ්‍ය රැසක් වාර්තා කළහ. එම අනාවරණය, දෙවන ගුවන් භටයා මුදා ගැනීම පිණිස දියත් කළ මෙහෙයුම අනතුරේ හෙළූ බවට ජනපති ට්‍රම්ප් චෝදනා කළේය. කෙසේ වුව, දැඩි පරිශ්‍රමයකින් සිදුකළ බිහිසුණු සන්නද්ධ මෙහෙයුමකින් අනතුරුව එම ගුවන් භටයා ද මුදා ගැනීමට එක්සත් ජනපද හමුදා සමත් විය.
"පැයක් යනකල් අපි, පළමුවෙනි ගලවාගැනීමේ මෙහෙයුම අනාවරණය කළේ නෑ. ඒ අතරෙ මොකෙක් හරි එකෙක් වැඩේ ලීක් කළා. අපි ඒ මිනිහවත් කොහොම හරි හොයා ගන්නවා. අපි ඕක එලි කරපු මාධ්‍ය ආයතනයට යනවා, ගිහින් කියනවා, 'ජාතික ආරක්ෂාව!', එක්කෝ ඕක වහල දාපල්ලා, නැත්තං, කල්දේරං බත් කාපල්ලා," ජනපති ට්‍රම්ප් පැවසීය.
ජනපතිවරයා ඇඟිල්ල දිගු කළේ කුමන ආයතනයක මාධ්‍යවේදියකුට දැයි තවමත් අනාවරණයව නැත. එහෙත්, එක්සත් ජනපද මාධ්‍යායතන කිහිපයක් විසින්ම, එම ගුවන් භටයා මුදා ගැනීමේ පුවත ඉතා කෙටි වේලාවක් තුළ වාර්තා කර තිබිණි. ද නිව් යෝර්ක් ටයිම්ස් (The New York Times), සී.බී.එස්. නිව්ස් ( CBS News) සහ ඇක්සියොස් (Axios) මාධ්‍යායතන ද ඒ අතර විය.
(සටහන |Reuters ඇසුරින්; හර්ෂ උදයකාන්ත පීරිස්)
මුලාශ්‍රය :
Trump threatens jail for reporter who revealed Iran airman rescue
