නවතම සම්බාධක හමුවේ, කිසිදු නෞකාවකට ඉරාන වරාය වෙත පිවිසීම හෝ ඉන් පිටවීම එක්සත් ජනපදය විසින් තහනම් කර තිබේ.
ඕමාන ගල්ෆ් තුඩුවේ පිහිටි ඉරානයට අයත් චබහාර් වරායෙන් පිටත් වූ එම නෞකා වෙත එක්සත් ජනපද යුද නැවක සිට ගුවන් විදුලි සංනිවේදන ඔස්සේ ගමනාන්තය අවලංගු කර වහා යලි හරවා යෑමට නියෝග නිකුත් කෙරිණි.
මෙම නව සම්බාධක මගින් ගෝලීය ඉන්දන ප්‍රවාහනයේ 20%ක් සිදු කෙරෙ හෝර්මුස් සමුද්‍ර සන්ධිය නැවත විවෘත කිරීමට සහ එක්සත් ජනපද යෝජනාවලියට අනුගතව සටන් විරාම සාකච්ඡා සඳහා යලි පිවිසීමට ඉරානයට බල කෙරේ.
දැනට ක්‍රියාත්මක දෙසතියක එක්සත් ජනපද - ඉරාන සටන් විරාමය එන සතියේ කල් ඉකුත් වීමට නියමිතය.
කලාපයේ යාත්‍රා කරන නෞකා සියල්ල එක්සත් ජනපද හමුදා නියෝගයන්ට අනුගත බව එම හමුදා දන්වා සිටිති. එම සම්බාධක ක්‍රියාත්මක කිරීම පිණිස 10,000කට අධික හමුදා භට පිරිසක් යොදවා තිබේ. හෝර්මුස් සමුද්‍ර සන්ධිය පසු කරන ඉරානයට අයත් නොවන සියලු නෞකා සඳහා අවශ්‍ය ආරක්ෂක සහාය සලසන බව එක්සත් ජනපද හමුදා කියති.
ඉරාන වරාය වෙත යන එන නෞකා අවහිර කිරීම යුද ප්‍රකාශ කිරීමකැයි ජාත්‍යන්තර විශ්ලේෂක මතයයි. එය සටන් විරාමයෙන් ක්ෂණිකව ඉවත්ව, එක්සත් ජනපද සහ සන්ධාන මර්මස්ථාන වෙත ප්‍රති ප්‍රහාර එල්ල කිරීමේ තැනට ටෙහෙරානය ප්‍රකෝප කිරීමකි.
ඉරානයේ දහසකට අධික ඉලක්ක වෙත එල්ල වූ එක්සත් ජනපද ගුවන් ප්‍රහාර හමුවේ, එරට බහුතර හමුදා ශක්තිය පිරිහී පවතී.
නව සම්බාධක තව දුරටත් ක්‍රියාත්මක වුවහොත් ඉරානය ප්‍රති ප්‍රහාර පිණිස පසුබට නොවනු ඇත.
(සටහන, Reuters ඇසුරින්; හර්ෂ උදයකාන්ත පීරිස්)
2026.04.15
මුලාශ්‍රය :
US destroyer interdicts two oil tankers attempting to leave Iran, official says
