මෙම සති අන්තයේ, එක්සත් ජනපද - ඉරාන සටන් විරාමයේ මීලඟ වටයේ සාකච්ඡා ආරම්භ වීමට නියමිත බව ද ජනපති ඩොනල්ඩ් ට්‍රම්ප් පැවසීය. ඉරාන යුද්ධය නුදුරේදීම අවසන් වනු ඇතැයි ඔහු කීය.
න්‍යෂ්ටික අවි සන්තක කර ගැනීමේ වැඩපිළිවෙළක් නැතැයි ඉරානය විසි වසරක් තිස්සේ පවසන බව ජනපති ට්‍රම්ප් පැවසීය. "අපි බලමු මොකද වෙන්නෙ කියල. මේක ඉක්මනට ඉවර වේවි", හෙතෙම කියා සිටියේය.
ඊශ්‍රායල සහ එක්සත් ජනපද ප්‍රහාර හමුවේ පසුගිය පෙබරවාරි 28 දා ඉරාන යුද්ධය ඇරඹිණි. මේ වන විට ඉන් පුද්ගල ජීවිත දස දහස් සංඛ්‍යාවක් අහිමිව පවතී. ලෝක වෙළඳපොල තෙල් මිල දැරිය නොහැකි අයුරින් ඉහළ ගියේය. යුද්ධය හේතුවෙන් බහුතර රටවල උද්ධමනය ද සීග්‍රයෙන් වර්ධනය විය.
ලෙබනන සටන් විරාමය මගින් ඉරානය සමග සාම ගනුදෙනුවකට මග විවිර කෙරේ නම්, එය ට්‍රම්ප් පරිපාලනය ලද ජයග්‍රහණයකි. හෝර්මුස් සමුද්‍ර සන්ධිය ඔස්සේ නෞකා ගමනාගමනය යථාවත් වන අතර, ඉරාන න්‍යෂ්ටික වැඩපිළිවෙළට තිත තැබීමටද අවස්ථා උදාවනු ඇත.
ඊයේ රාත්‍රී 12 පසුවනවාත් සමග ලෙබනනයේ බීරුත් නගරය පුරා සැමරුම් වෙඩි හඬ රැව් දුන්නේය. සටන් විරාම උදාව සමරනුවස් ලෙබනන අහසට මුදාහල රොකට් හඬින් අවට ප්‍රදේශය ගිගුම් දුන්නේය. එම වෙඩි හඬ, පුරා අඩ හෝරාවක් පැවති බව රොයිටර්ස් පුවත් සේවය කීය.
කෙසේ වෙතත් එය වහා බිඳෙනසුළු සටන් විරාමයකි. ඊශ්‍රායලය අදත් (17), දකුණු ලෙබනනයේ ගම්මාන කිහිපයක් ඉලක්ක කර ෂෙල් ප්‍රහාර එල්ල කළේය. එහි සිය හමුදා යොදවා ඇතැයි ඊශ්‍රායලය කීය. හිස්බුල්ලා සන්නද්ධ ක්‍රියාකාරකම් මැඬලීම පිණිස එම පියවර ගත් බව ඊශ්‍රායල හමුදා පැවසූහ.
සටන් විරාමයට වහා අනුගත වන ලෙස දන්වා ජනපති ට්‍රම්ප් සමාජ මාධ්‍ය ඔස්සේ හිස්බුල්ලා සංවිධානය වෙත පණිවුඩයක් ද නිකුත් කළේය.
(සටහන, Reuters ඇසුරින්; හර්ෂ උදයකාන්ත පීරිස්)
2026.04.17
Israel and Lebanon begin ceasefire, Trump says Iran may meet US over weekend
