ට්‍රම්ප්, ඉරානය සමග සටන් විරාමය දින නියමයක් නොමැතිව දීර්ඝ කරයි

මෙය ප්‍රකාශයට පත් කෙරුණේ කලින් ප්‍රකාශයට පත් කර තිබූ සටන් විරාමය අවසන් වීමට පැය කිහිපයකට පෙරයි.

දහස් ගණනකගේ ජීවිත බිලිගනිමින් සහ ගෝලීය ආර්ථිකයට දැඩි බලපෑම් එල්ල කරමින් මාසයකට අධික කාලයක් පුරා පැවති මෙම යුද්ධය අවසන් කිරීම සඳහා දෙරට අතර සාම සාකච්ඡා අඛණ්ඩව පවත්වාගෙන යාම මෙහි අරමුණ බව වාර්තා වෙයි.

සටහන් විරාමය අවසන් වූ පසු ප්‍රහාර එල්ල කරන බවට තර්ජනය කර තිබුණද, පසුව එම ස්ථාවරයෙන් බැහැර වූ ට්‍රම්ප් ජනාධිපතිවරයා ප්‍රකාශයක් නිකුත් කරමින් කියා සිටියේ, සාම සාකච්ඡා සඳහා මැදිහත්කරු ලෙස කටයුතු කරන පාකිස්තානය කළ ඉල්ලීමකට තමන් එකඟ වූ බවය.

ඒ අනුව, "ඉරාන නායකයින් සහ නියෝජිතයින් එක්සත් යෝජනාවක් ඉදිරිපත් කරන තෙක් ඉරානයට එල්ල කිරීමට සැලසුම් කර තිබූ ප්‍රහාර නතර කිරීමට" තීරණය කළ බව අමෙරිකානු ජනාධිපති ඩොනල්ඩ් ට්‍රම්ප් සඳහන් කර තිබේ.

කෙසේ වෙතත්, ඉරාන වරායන් අවහිර කිරීම දිගටම කරගෙන යන බව ජනපතිවරයා සඳහන් කර ඇත.

 

"බලාපොරොත්තු වූ පරිදිම ඉරාන රජය බරපතල ලෙස බිඳ වැටී ඇති බව පෙනෙන්නට තිබීමත්, පාකිස්ථානයේ ෆීල්ඩ් මාර්ෂල් අසීම් මුනීර් සහ අග්‍රාමාත්‍ය ෂෙහ්බාස් ෂරීෆ්ගේ ඉල්ලීම මතත්, ඉරානයේ නායකයින්ට සහ නියෝජිතයින්ට ඒකාබද්ධ යෝජනාවක් ඉදිරිපත් කිරීමට හැකි වන තෙක් එම රටට එල්ල කරන ප්‍රහාරය නතර කරන ලෙස අපෙන් ඉල්ලා ඇත.

එබැවින්, අවහිර කිරීම දිගටම කරගෙන යන ලෙසත්, අනෙකුත් සෑම අංශයකින්ම සූදානමින් සිටින ලෙසත් මම අපගේ හමුදාවට උපදෙස් දී ඇත්තෙමි. ඒ අනුව, ඔවුන්ගේ යෝජනාව ඉදිරිපත් කර සාකච්ඡා අවසන් වන තෙක් මම සටන් විරාමය දීර්ඝ කරමි." යනුවෙන් ජනපතිවරයා සඳහන් කර ඇත.

මුලාශ්‍රය :

US will indefinitely extend ceasefire, unclear if Iran agrees

Trump says he will extend Iran ceasefire until negotiations conclude

Trump extends ceasefire indefinitely as Iran says it won’t join talks now