දශක පහක පමණ කාලයක් තමිල්නාඩු දේශපාලනය හසුරුවන ලද DMK සහ ADMK යන ප්‍රධාන දේශපාලන පක්ෂ අබිබවා යමින්, ප්‍රකට නළු විජේගේ තමිලග වෙට්ට්‍රි කසාගම් හෙවත් TVK පක්ෂය මේ වන විට කැපී පෙනෙන ඉදිරියක් ලබා ගැනීමට සමත්ව ඇති බව විදෙස් මාධ්‍ය වාර්තා කරයි.
නවතම නිල වාර්තාවලට අනුව, විජේගේ TVK පක්ෂය ආසන 100 සීමාව ඉක්මවා ඉදිරියෙන් සිටින අතර, තනි පක්ෂයක් ලෙස බහුතර බලය ලබා ගැනීමට ඉතා ආසන්නව සිටියි.
බහුතර බලය ලබා ගැනීමට නම් එක් පක්ෂයක් දිනා ගත යුතු මුළු ආසන සංඛ්‍යාව 118ක් වන අතර TVK පක්ෂය මෙතෙක් දිනා ඇති ආසන සංඛ්‍යාව 111 කි.
පාලක DMK පක්ෂය ආසන 71 සීමාව දක්වා ඇද වැටී ඇති අතර, ADMK පක්ෂය ද ආසන 51 කට පමණ පහත වැටී තිබේ.
භාරතීය ජනතා පක්ෂය සහ කොංග්‍රස් පක්ෂය ද ආසන 10කටත් වඩා අඩුවෙන් පසුවේ.
තලපති විජේට ඉන්දීය අග්‍රාමාත්‍ය නරේන්ද්‍ර මෝදි X සටහනක් තබමින් සිය සුභ පැතුම් එක් කරයි.
මහඇමති එම්.කේ ස්ටාලින් පරාජයට පත්වෙයි
ඉන්දියාවේ තමිල්නාඩු ප්‍රාන්තයේ වත්මන් මහඇමති එම්.කේ ස්ටාලින් මෙවර මැතිවරණයෙන් පරාජයට පත්වී තිබේ.
ඔහු මෙවර කොලතූර් මැතිවරණ ආසනයෙන් තරග කළේය.
එම්.කේ ස්ටාලින් පාලක පක්ෂයේ සිට පරාජයට පත් වූ සිව්වන මහඇමතිවරයා වන බව ඉන්දීය මාධ්‍ය වාර්තා සඳහන් කරයි.
ඔහු 2011 වසරේ සිට අඛණ්ඩව මෙම ආසනය ජයගෙන තිබීමත් විශේෂත්වයකි.
මෙවර මහඇමතිවරයා පරාජයට පත් වූයේ තමිලග වෙට්ට්‍රි කළගම් පක්ෂය නියෝජනය කරමින් තරග කළ වී.එස්. බාබු හමුවේය.
ඔහු එම්.කේ ස්ටාලින්ගේ පක්ෂයේ සභාපතිවරයාගේ සමීපතමයෙකු වන අතර එම පක්ෂය නියෝජනය කරමින් 2006 වසරේදී පුරසවල්කම් ආසනය ජයගත්තේය.
බහුතරයක් තරුණ ඡන්දදායකයින්...
තමිල්නාඩු ඉතිහාසයේ වාර්තාගත 85.1% ක ඡන්ද ප්‍රතිශතයක් මෙවර සටහන් වූ අතර, එයින් බහුතරයක් තරුණ ඡන්දදායකයින් වේ.
දශක ගණනාවක ද්‍රවිඩ ද්වි-පක්ෂ දේශපාලනය අවසන් කරමින් "තුන්වන බලවේගයක්" ලෙස විජේ පැමිණීම ඉන්දියානු දේශපාලනයේ දැවැන්ත පෙරලියක් ලෙස සැලකේ.
මේ වන විට විජේගේ නිවස ඉදිරිපිට සහ පක්ෂ මූලස්ථානයේ දහස් සංඛ්‍යාත පාක්ෂිකයින් රතිඤ්ඤා පත්තු කරමින් සහ රසකැවිලි බෙදා දෙමින් ජයග්‍රහණය සමරමින් සිටින බව චෙන්නායි නුවරින් ලැබෙන ආරංචි මාර්ග උපුටා දක්වන ඉන්දීය මාධ්‍ය වාර්තා කරයි.
