එහෙත්, කොන්දේසිවලට අනුගත නොවන්නේ නම්, ප්‍රහාර යළි අරඹන බවටත්, ඉරාන නිලධාරීන් ඝාතනය කරන බවටත් එක්සත් ජනපද ජනපති, ඩොනල්ඩ් ට්‍රම්ප් අනතුරු ඇඟවීය.
ප්‍රංශයට රැස්වූ ජාත්‍යන්තර නායකයින් හා 'ජී 7' සමුළුවට සහභාගී වෙමින් එම අදහස් දැක්වූ ජනපති ට්‍රම්ප්, ටෙහ්රානයට බැලස්ටික් මිසයිල නොතිබිය යුතුමය යන කොන්දේසිය, "එච්චර සාධාරණ නෑ නේ," යනුවෙන්ද පැවසීය. ඉරානයට මුලින් පහරදෙන අවස්ථාවේ, එරට සතුව කිසිදු බැලස්ටික් මිසයිලයක් නොපැවතිය යුතු බවට ට්‍රම්ප් විසින් තර්ජනය කර තිබිණි.
"ඔය ගිවිසුම උල්ලංඝනය කළහොත්, ඉරානය අපායක් වෙන තැනට බෝම්බ හෙළනවා," පුවත්පත් සාකච්ඡාවකට එක්වෙමින් ඔහු කීය. "මට එහෙම කරන්න අවශ්‍ය නෑ. හැබැයි, ඔවුන් ගිවිසුමට අනුගත විය යුතුයි. ඔය අය හරි අංකූරෝ, හරි ශූක්ෂ්මයි ," ජනපති ට්‍රම්ප් කීය. සටන් විරාමය තිරසර ගිවිසුමක් බවට පත් කරගැනීම, ඉදිරි දින 60ක ඉරාන - එක්සත් ජනපද නියෝජිත සාකච්ඡා හි අරමුණ ය. එය සමස්ත මැද පෙරදිග කලාපයටම වැදගත් වනු ඇතැයි ද, ඒ හා ලෝක ඉන්දන මිල තවත් පහළ යනු ඇතැයි ද ඔහු සඳහන් කළේය.
එක්සත් ජනපද නායකයාගේ නව තර්ජනය පිලිබඳ ඉරාන නායකත්වය වෙතින් මෙතෙක් කිසිදු ප්‍රකාශයක් නැත. ඒ වෙනුවට, ඔවුහු දෙරට ජනපතිවරුන් විසින් අත්සන් කරන ලද නව ගිවිසුමේ ඡායාරූප, මාධ්‍යයට මුදා හැර තිබිණි. 1979 වසරේ ඉස්ලාමීය සමූහාණ්ඩුව පිහිටුවීමෙන් අනතුරුව, දෙරට නායකයින් විසින් අත්සන් කරන්නට යෙදුණු, පළමු ගිවිසුම එය බව වාර්තා වේ.
"අප සන්නද්ධ ව්‍යාපාරයෙන් ජය ගැන්මට උත්සාහ කළ බොහෝ දෑ, අවස්ථා කිහිපයකදීම සාකච්ඡාවෙන් ජය ගැනීමට හැකි වුණා. එය අසමසමයි," ඉරාන පාර්ශ්වයේ ප්‍රධාන සාකච්ඡා නියෝජිත, මොහම්මඩ් බඛෙර් ඛලිබෆ්, ඉරාන රාජ්‍ය රූපවාහිනියේ කියා සිටියේය.
පෙබරවාරි 28 දා, ඊශ්‍රායල සහ එක්සත් ජනපද හමුදා, 86 හැවිරිදි ඉරාන උත්තරීතර නායක, අයතොල්ලා අලි ඛමෙනි සහ තවත් හමුදා නායකයින් කිහිපදෙනෙක් ඝාතනය කරමින් ඉරාන යුද්ධය ආරම්භ කළහ. එය සැණින්, කලාපීය යුද්ධයක් තෙක් ව්‍යාප්ත විය. එම ගැටුමින්, මිනිස් ජීවිත 7000කට අධික සංඛ්‍යාවක් අහිමි වූ අතර ඉන් බහුතරය ඉරාන සහ ලෙබනන ජාතිකයින් ය. යුද්ධයේ ප්‍රති විපාක වශයෙන්, බලශක්ති මිල නොසිතූ සේ ඉහළ ගිය අතර ලෝක උද්ධමනය ද අහස උසට නැග්ගේය. සංවර්ධනය වෙමින් පවතින රටවල ආහාර සැපයුමද බරපතල අර්බුදයකට ලක් විය.
(සටහන: හර්ෂ උදයකාන්ත පීරිස්)
6/18/2026
(harshaprs@yahoo.com)
මුලාශ්‍රය :
US and Iran presidents sign ceasefire agreement, but Trump says he could still resume attacks
