තායිවාන මව් සමාගමේ, සිංගප්පූරු අනු සමාගමකට අයත්, 'එවර් ලව්ලි' (Ever Lovely) නම්, නෞකාවට එම ප්‍රහාරය එල්ල විය. ප්‍රහාරයෙන් නෞකාවේ දකුණු ඇල පස පාලන මැදිරි වීදුරු බිඳී ගියේය. නෞකාව එම අවස්ථාවේ, UKMTO බ්‍රිතාන්‍ය නාවුක ඒජන්සියේ මාර්ගෝපදේශන යටතේ යාත්‍රා කරමින් පැවති බව, තායිවාන සමාගම සඳහන් කරයි.
හෝර්මුස් සමුද්‍ර සන්ධියේ තහනම් කලාපයන්හි යාත්‍රා කෙරෙන නෞකා වෙත, ටෙහ්රානය විසින් අනතුරු අඟවා පැය කිහිපයකට පසුව, එම ප්‍රහාරය එල්ල වී තිබේ. එය ඉරානය විසින්ම එල්ල කළ ප්‍රහාරයක් බව, එක්සත් ජනපද නිලධාරීන් උපුටා දක්වන රොයිටර්ස් පුවත් සේවය කියයි. මේ අතර, හෝර්මුස් කලාපයේ අනුමත පෙදෙස් වෙතින් ඉවත්ව යාත්‍රා කරන නෞකා ආරක්ෂාව සම්බන්ධයෙන් වග නොවන බව, එම සමුද්‍ර සන්ධිය ඔස්සේ නෞකා ගමනාගමනය කළමනාකරණය පිණිස ස්ථාපිත කරන ලද, ඉරානයේ පර්සියානු ගල්ෆ් සමුද්‍ර සන්ධි අධිකාරිය විසින් නිවේදනය කර තිබේ.
හෝර්මුස් කලාපයේ තහනම් මාවත් ඔස්සේ යාත්‍රා කෙරෙන නෞකා සම්බන්ධයෙන් සියලු වගකීම නෞකා හිමිකාරීත්වය, මෙහෙයුම්කරු සහ එහි කපිතාන් සතු බව, එම නිවේදනයේ දැක්වේ.
ප්‍රහාරයෙන් 'එවර් ලව්ලි' නෞකාවේ කාර්ය මණ්ඩලයට සහ භාණ්ඩවලට හානියක් නැතැයි, නෞකාව හිමි සමාගම පැවසීය. ඉරාන ඩ්‍රෝන යානයක් මගින් එම ප්‍රහාරය සිදු කළ බවට සැක කරන බව ද එම සමගම කීය. කෙසේ වෙතත්, නෞකාව නිරුප්‍රදිතව, හෝර්මුස් සමුද්‍ර සන්ධියෙන් පිට වීමට සමත් වූවාය.
ප්‍රහාරය සම්බන්ධයෙන් එක්සත් ජනපද රජය මෙතෙක් කිසිදු නිල ප්‍රකාශයක් සිදු කර නොමැත. යුද්ධය අවසන් කිරීම පිණිස අත්සන් තැබුණු මූලික ගිවිසුම ප්‍රකාරව, ඉරාන නිලධාරීන් කටයුතු නොකරන්නේ නම්, සහ හෝර්මුස් සමුද්‍ර සන්ධිය විවෘත කිරීමට පියවර නොගන්නේ නම්, ඉරානයට යළි බෝම්බ හෙළන බව එක්සත් ජනපද ජනපති ඩොනල්ඩ් ට්‍රම්ප් විසින් පෙර සිට අනතුරු අඟවා තිබේ.
පෙබරවාරි 28, ඉරාන යුද්ධය ඇරඹි තැන් සිට, ගල්ෆ් කලාපයේ සහ හෝර්මුස් සමුද්‍ර සන්ධියේ සිරවී හෝ අතරමංව ඇති නෞකා සිය ගණනක්, ආරක්ෂිතව එම කලාපයෙන් පිට කිරීමේ වගකීම එක්සත් ජාතීන්ගේ ජාත්‍යන්තර සමුද්‍රීය සංවිධානය විසින් ස්වේච්ඡාවෙන් භාර ගෙන තිබේ. එම නෞකා මුදා ගැනීමේ ක්‍රියාන්විතයේ ආරක්ෂාව තහවුරු කෙරෙන තෙක්, සිය මෙහෙයුම අත්හිටුවන බව, එම සංවිධානය විසින් දැනුම් දී ඇත. කෙසේ වෙතත්, නවතම ප්‍රහාරයට බඳුන් වූ නෞකාව, එම සංවිධානයේ මුදා ගැනීමේ ලේඛනයේ සඳහන් නොවන නෞකාවක් බවද දන්වා තිබේ.
එම සංවිධානයේ මාර්ගෝපදේශන සහ එක්සත් ජනපද අධීක්ෂණය යටතේ, සමුද්‍ර මාර්ග දෙකක් ඔස්සේ ගල්ෆ් කලාපයේ සිරවී ඇති නෞකා මුදා ගැනීමේ මෙහෙයුම් ක්‍රියාත්මකය. ඉරාන සමුද්‍ර පිවිසුම සහ ඕමාන සමුද්‍ර පිවිසුම එම මාර්ග දෙක වේ.
ඕමාන පිවිසුම ඔස්සේ යාත්‍රා කරමින් පැවති නෞකාවක් වෙත එල්ල වූ මෙම නවතම ප්‍රහාරය, හෝර්මුස් කලාපයේ ඉදිරි ඉරාන ආධිපත්‍ය ව්‍යාප්තිය පිලිබඳ පූර්ව අනතුරු ඇඟවීමකි.
එම නවතම සිදුවීමට පෙර, ගල්ෆ් රාජ්‍ය වෙත සංචාරයක් අවසන් කරමින් මාධ්‍ය ඇමතූ එක්සත් ජනපද රාජ්‍ය ලේකම්, මාර්කෝ රුබියෝ, හෝර්මුස් සමුද්‍ර සන්ධියේ යාත්‍රා කරන නෞකාවන්ට ඉරානය යළි තර්ජන එල්ල කළහොත් තත්ත්වය දරුණු වනු ඇතැයි, අනතුරු ඇඟවීය.
කෙසේ වෙතත්, එම සමුද්‍ර සන්ධියේ පාලනය සියත තබා ගන්නා බව ඉරානය විසින් අවධාරණය කර තිබේ. ඒ ඔස්සේ ආරක්ෂිතව යාත්‍රා කළ හැක්කේ, අනුමත මුහුදු මාර්ගයේ පමණක් බවත්, එම නීති උල්ලංඝනය කරන නෞකාවන්ට එරෙහිව ක්‍රියාත්මක වන බවත්, ඉරාන විප්ලවීය ආරක්ෂක බලකාය ඊයේ දන්වා සිටියේය.
(සටහන: Reuters ඇසුරින්; හර්ෂ උදයකාන්ත පීරිස්)
6/26/2026
(harshaprs@yahoo.com)
UN halts escort of ships through Hormuz after vessel comes under attack
