යුක්රේන ඩ්‍රෝන් ප්‍රහාරවලින් රුසියාව පුරා තෙල් හිඟයක් මතු වෙද්දී, නේටෝ (NATO) කඳවුරුවලට වැදීමට රුසියානු ජනරාල්වරුන්ගෙන් සැලසුම්; රොයිටර් පුවත් සේවයෙන් විශේෂ අනාවරණයක්
ඇමරිකානු ජනාධිපති ඩොනල්ඩ් ට්‍රම්ප් විසින් යුක්රේන යුද්ධය නිමා කිරීම සඳහා ආරම්භ කර ඇති හදිසි සාම සාකච්ඡා වට සහ සටන් විරාම යෝජනා සියල්ල රුසියානු ජනාධිපති ව්ලැඩිමීර් පුටින් විසින් සහමුලින්ම ප්‍රතික්ෂේප කර ඇති බව ක්‍රෙම්ලිනයට සම්බන්ධ අභ්‍යන්තර ආරංචි මාර්ග උපුටා දක්වමින් රොයිටර් පුවත් සේවය විශේෂ වාර්තාවක් මඟින් අනාවරණය කරයි.
යුද්ධය පස්වැනි වසරටත් (5th Year) ඇතුළු වී ඇති පසුබිමක, යුක්රේනය විසින් රුසියාවේ තෙල් පිරිපහදු මධ්‍යස්ථාන සහ වරායන් ඉලක්ක කර ගනිමින් එල්ල කරන ඩ්‍රෝන් ප්‍රහාර හේතුවෙන් පුටින් දැඩි සේ කෝපයට පත්ව සිටින අතර, සාමයකට එළඹෙනු වෙනුවට ඉදිරි මාස කිහිපය තුළ යුද්ධය උපරිම මට්ටමකින් (Escalation) දරුණු කිරීමට ඔහු තීන්දු කර ඇතැයි පුටින්ව නිතිපතා හමුවන ඉහළ පෙළේ දේශපාලන බලධාරීහු පවසති.
ට්‍රම්ප්ගේ ප්‍රකාශය සහ පුටින්ගේ දැඩි ස්ථාවරය
පසුගියදා ට්‍රම්ප් ප්‍රකාශ කළේ පුටින්ට යුද්ධය නැවැත්වීමට අවශ්‍ය වී ඇති බවත්, විසඳුමකට පැමිණීමට ඉතා ආසන්න බවත්ය. එහෙත් ක්‍රෙම්ලිනයේ ඇතුළාන්ත තත්ත්වය ඊට හාත්පසින්ම වෙනස්ය.
දේශපාලන ප්‍රතික්ෂේප කිරීම:
යුක්රේනයේ නැගෙනහිර දොන්බාස් (Donbas) කලාපයේ මෙතෙක් අත්පත් කර නොගත් ඉතිරි කොටස සම්පූර්ණයෙන්ම යටත් කරගැනීම පුටින්ගේ ප්‍රධානතම අරමුණ වී තිබේ. පවතින සීමාවන් මත සටන් විරාමයකට යමු යැයි තමන්ට උපදෙස් දුන් උපදේශකයන් කණ්ඩායමකට ද පුටින් මෑතකදී දැඩි ලෙස දොස් පවරා ඇත.
යුක්රේන බුද්ධි තොරතුරු:
යුක්රේන ජනාධිපති ව්ලැඩිමීර් සෙලෙන්ස්කිගේ කාර්යාලය පවසන්නේ පුටින් සාමයකට සූදානම් නොවන බවත්, යුක්රේනය තුළ නව මෙහෙයුම් ඇරඹීමට හෝ වෙනත් යුරෝපීය රටකට ප්‍රහාර එල්ල කිරීමට රුසියාව සේනා සංවිධානය කරමින් සිටින බව බුද්ධි අංශ තහවුරු කර ඇති බවත්ය.
නේටෝ (NATO) කඳවුරු ඉලක්ක කිරීමේ අවදානම
යුද්ධයේ ඉදිරි අදියර ලෙස යුක්රේනයෙන් ඔබ්බට ගොස් නේටෝ සංවිධානයට අයත් යුරෝපීය කඳවුරුවලට ප්‍රහාර එල්ල කිරීමේ හැකියාව පිළිබඳව රුසියානු මිලිටරි විශේෂඥයන් මේ වන විට ප්‍රසිද්ධියේ සාකච්ඡා කරමින් සිටිති.
රොමේනියා සහ බෝල්ටික් තර්ජනය:
රුසියානු ආරක්ෂක අමාත්‍යාංශයේ හිටපු නිලධාරියෙකු වන ඇන්ඩ්‍රි ඉල්නිට්ස්කි (Andrei Ilnitsky) පෙන්වා දෙන්නේ ඊළඟ පියවර ලෙස යුක්රේනයට දිගුදුර මිසයිල සපයන රොමේනියාවේ සහ බෝල්ටික් කලාපයේ පිහිටි නේටෝ කඳවුරුවලට මෙන්ම යුරෝපා සංගමයේ අවි නිෂ්පාදනාගාරවලට රුසියාව ප්‍රහාර එල්ල කරනු ඇති බවයි.
නේටෝව බෙදීමේ උපක්‍රමය:
ලන්ඩන් නුවර ආරක්ෂක පර්යේෂණ ආයතනයක් (RUSI) පවසන්නේ රුසියාව නේටෝව සමඟ සෘජු යුද්ධයකට නොගිය ද, නේටෝ සාමාජික රටවල් අතර මතභේද ඇති කිරීම සඳහා මෙවැනි හුදෙකලා ප්‍රහාර (මෑතකදී රොමේනියාවට එල්ල වූ ඩ්‍රෝන් ප්‍රහාරය වැනි) යොදාගනු ඇති බවයි.
දැවැන්ත මිනිස් ජීවිත හා වත්කම් හානිය
CSIS පර්යේෂණ ආයතනයේ නවතම දත්තවලට අනුව 2022 වසරේ සිට මේ දක්වා දෙපාර්ශ්වයේම මිලිටරි නිලධාරීන් සහ සෙබළුන් මිලියන දෙකක් (2 Million) පමණ මියගොස්, තුවාල ලබා හෝ අතුරුදන් වී ඇති අතර ඉන් මිලියන 1.4ක්ම රුසියානු සෙබළුන් වේ.
රුසියාවේ තෙල් අර්බුදය:
යුක්රේනය දිගින් දිගටම රුසියානු පිරිපහදුවලට ගැසීම නිසා රුසියාව පුරා මේ වන විට දැඩි ඉන්ධන හිඟයක් නිර්මාණය වී ඇත. මේ හේතුවෙන් 2022න් පසු පුටින්ගේ දේශපාලන ජනප්‍රියතාවය (Approval Rating) අවම මට්ටමට වැටී තිබේ.
ආරක්ෂිත කලාප බොරුව:
යුක්රේනය තමන්ගේ බලශක්ති පද්ධතියට ප්‍රහාර එල්ල කිරීම හේතුවෙන්, දොන්බාස් කලාපයට අමතරව යුක්රේන දේශසීමාවේ තවත් විශාල භූමි ප්‍රමාණයක් අත්පත් කරගෙන "ආරක්ෂිත කලාපයක්" (Security Zone) හැදීමට සිදුවන බව පුටින් සිය ජනරාල්වරුන්ට ප්‍රකාශ කර ඇත.
දොන්බාස් කලාපයේ කොස්ටියන්ටිනිව්කා (Kostiantynivka) නගරය තමන් යටත් කරගත් බව රුසියාව පැවසුව ද යුක්රේනය එය ප්‍රතික්ෂේප කරයි. ක්‍රෙම්ලිනයේ ප්‍රකාශක දිමිත්‍රි පෙස්කොව් ප්‍රකාශ කරන්නේ යුරෝපය යුදකරණය වීම හමුවේ රුසියාවට තම ආරක්ෂාව වෙනුවෙන් ස්වාධීනව හමුදා මෙහෙයුම් ඉදිරියටම ගෙන යාමට සිදුවන බවයි.
මුලාශ්‍රය :
EXCLUSIVE
Putin likely to escalate Ukraine war, despite Trump peace push, sources say
