- ඇමරිකාව ඉරාන හමුදා ඉලක්ක 300කට පහර දෙද්දී, කලාපයේ ඇමරිකානු කඳවුරු සහ ගුවන් යානා වාහක නෞකා ඉලක්ක කරමින් ඉරානයෙන් දැවැන්ත ප්‍රතිප්‍රහාර
පියාගේ ඝාතනයට පළිගන්නා බවට නව උත්තරීතර නායක අයතොල්ලා මොජ්තබා ඛමෙනිගෙන් සපථයක්; ලෝක ආර්ථිකයේ මර්මස්ථානයක් බඳු නාවික මාවත අගුල් වැටෙයි
මැදපෙරදිග කලාපය දැඩි යුද අර්බුදයකට ඇද දමමින්, එක්සත් ජනපද සන්නද්ධ බලකායන් සහ ඉරානය අතර අතිශය විනාශකාරී මිසයිල සහ ඩ්‍රෝන ප්‍රහාර මාලාවක් ආරම්භ වී තිබේ.
හෝර්මුස් සමුද්‍ර සන්ධිය (Strait of Hormuz) හරහා ගමන් කළ ජාත්‍යන්තර වාණිජ නෞකා කිහිපයකට ඉරානය ප්‍රහාර එල්ල කිරීමත් සමඟ, මෙතෙක් පැවති සටන් විරාමය නිල වශයෙන් අවසන් බව ප්‍රකාශ කිරීමට එක්සත් ජනපද ජනාධිපති ඩොනල්ඩ් ට්‍රම්ප් පියවර ගෙන ඇත. ඊට ප්‍රතිචාර ලෙස ගල්ෆ් කලාපයේ ඇමරිකානු ඉලක්ක වෙත ප්‍රහාර එල්ල කරමින් හෝර්මුස් සමුද්‍ර සන්ධිය සම්පූර්ණයෙන්ම වසා දැමීමට ටෙහ්රාන් පාලනය කටයුතු කර තිබේ.
ඇමරිකානු මධ්‍යම විධානයේ ගුවන් ප්‍රහාර
ලෝක මුහුදු මඟ හරහා සිදුවන නිදහස් නාවික ගමනාගමනය ආරක්ෂා කිරීමේ අරමුණින් එක්සත් ජනපද හමුදා ඉරානයට එරෙහිව දැවැන්ත ගුවන් මෙහෙයුමක් දියත් කර ඇත.
ඉලක්ක 300ක් සුණු විසුණු වෙයි:
පසුගිය දින තුන තුළ පමණක් ඉරානය ස්ථානගත කර තිබූ හමුදා ඉලක්ක 300කට ඇමරිකානු හමුදා ප්‍රහාර එල්ල කර තිබේ. ඉන් ඉලක්ක 140ක් වෙතම ප්‍රහාර එල්ල කර ඇත්තේ ඊයේ (ජූලි 11) දිනයේදීය.
වරාය නගර ධූලි වෙයි:
මෙම ප්‍රහාරයන්ගෙන් ඉරානයේ උපායමාර්ගික වරාය නගර කිහිපයක පිහිටි හමුදා මධ්‍යස්ථාන දැඩි ලෙස විනාශ වී ඇති අතර, එහි මහා පරිමාණ පිපිරීම් රැසක් සිදුව ඇති බව ඉරාන රාජ්‍ය මාධ්‍ය පවා පිළිගෙන තිබේ.
ඉරාන විප්ලවීය ආරක්ෂක බලකායේ (IRGC) ප්‍රතිප්‍රහාර
ඇමරිකානු ගුවන් ප්‍රහාරවලට පිළිතුරු ලෙස ඉරානය විසින් මැදපෙරදිග පුරා විහිදී ඇති ඇමරිකානු ආරක්ෂක ව්‍යුහයන් සහ කඳවුරු ජාලය වෙත දරුණු මිසයිල ප්‍රහාර එල්ල කර ඇත.
කලාපීය කඳවුරු වටලයි:
ජෝර්දානයේ පිහිටි ඇමරිකානු අණ සහ පාලන මධ්‍යස්ථානය මෙන්ම ඩ්‍රෝන කඳවුර ද, කුවේටයේ පිහිටි ඇමරිකානු රේඩාර් පද්ධතිය ද ඉරාන ප්‍රහාර හමුවේ විනාශ වී තිබේ.
කටාර් සහ ඕමාන් ඉලක්ක:
කටාර් රාජ්‍යයේ පිහිටි ඇමරිකානු ප්‍රහාරක ජෙට් යානා නඩත්තු මධ්‍යස්ථානයට සහ ඕමානයේ පිහිටි ඇමරිකානු ප්‍රහාරක ගුවන් යානා වාහක නෞකා පහසුකම් (Carrier facilities) මෙන්ම ඉන්ධන සැපයුම් මධ්‍යස්ථාන වෙත ද තීරණාත්මක හානි සිදු කළ බව ඉරානය නිවේදනය කරයි.
ඛමෙනිගේ පළිගැනීමේ සපථය
මෙම යුදමය වාතාවරණය තවදුරටත් උත්සන්න වී ඇත්තේ ඉරානයේ නව උත්තරීතර නායක අයතොල්ලා මොජ්තබා ඛමෙනි විසින් නිකුත් කරන ලද විශේෂ ප්‍රකාශයක් හේතුවෙනි. ඇමරිකානු ප්‍රහාර හමුවේ ඝාතනයට ලක්වූ සිය පියා (හිටපු උත්තරීතර නායක අයතොල්ලා අලි ඛමෙනි) වෙනුවෙන් එක්සත් ජනපදයෙන් සහමුලින්ම පළිගන්නා බවට ඔහු සපථ කර තිබේ. යුද්ධය ආරම්භ වූ තැන් සිට මෙතෙක් නව උත්තරීතර නායකයා ආරක්ෂක හේතූන් මත ප්‍රසිද්ධියේ පෙනී සිට නැත.
(සටහන: රොයිටර් (Reuters) පුවත් සේවය ඇසුරින් හර්ෂ උදයකාන්ත පීරිස්)
7/12/2026
harshaprs@yahoo.com)
මුලාශ්‍රය
US strikes Iran, Tehran hits Gulf states, says Strait of Hormuz closed
