ගෝලීය ඉන්ධන සැපයුමෙන් 7%ක් අඩපණ වීමේ අවදානමක්: අර්බුදය මැද ඉරානය සහ ඇමෙරිකාව අතර රහසිගත රාජ්‍යතාන්ත්‍රික සාකච්ඡා!
එක්සත් ජනපදය සහ ඉරානය අතර පවතින දැඩි යුදමය උණුසුම තවදුරටත් වර්ධනය කරමින්, යේමනයේ ඉරාන හිතවාදී හුති (Houthi) සංවිධානය විසින් සෞදි අරාබියට එරෙහිව සමුද්‍රීය වෙළඳ තහනමක් ප්‍රකාශයට පත් කර ඇත. මෙම පියවරත් සමඟ ගෝලීය බලශක්ති වෙළෙඳපොළට සහ ජාත්‍යන්තර ඉන්ධන සැපයුමට බරපතල බලපෑමක් එල්ල විය හැකි බවට ජාත්‍යන්තර විචාරකයෝ අනතුරු අඟවති.
එක්සත් ජනපදය විසින් ඉරානයේ ප්‍රධාන බලශක්ති මර්මස්ථාන වෙත එල්ල කරන ප්‍රහාර වහා නතර නොකරන්නේ නම්, රතු මුහුදේ පිහිටි තීරණාත්මක බබ් එල්-මන්දෙබ් (Bab el-Mandeb) සමුද්‍ර සන්ධිය සම්පූර්ණයෙන්ම වසා දමන බවට හුති සංවිධානය තර්ජනය කර තිබේ.
සෞදියට එරෙහි නාවික තහනම සහ ගෝලීය බලපෑම
යේමනයට එරෙහිව සෞදි අරාබිය සිදුකරන යුදමය මැදිහත්වීම්වලට ප්‍රතිචාරයක් ලෙස "ඇසට ඇසක්" යන පදනම මත පිහිටා මෙම නාවික තහනම පනවන බව හුති හමුදා ප්‍රකාශ කළහ. කෙසේ වෙතත්, මෙම හදිසි නිවේදනය සම්බන්ධයෙන් සෞදි අරාබි රජය මෙතෙක් කිසිදු නිල ප්‍රකාශයක් නිකුත් කර නොමැත.
භූ-දේශපාලනික සහ නාවික විශ්ලේෂකයන් පෙන්වා දෙන්නේ, බබ් එල්-මන්දෙබ් සමුද්‍ර සන්ධිය පූර්ණ වශයෙන් වසා දැමුවහොත් ගෝලීය ඉන්ධන සැපයුමෙන් සියයට 7ක (7%) පමණ ප්‍රමාණයක් සෘජුවම බිඳ වැටෙන බවයි. එමඟින් සෞදි අරාබියෙන් ජාත්‍යන්තරයට කෙරෙන ප්‍රධාන තෙල් අපනයන මාර්ග අඩපණ වන අතර, දැනටමත් පවතින ගල්ෆ් කලාපීය නොසන්සුන්තාව හේතුවෙන් සමුද්‍රීය ඉන්ධන ප්‍රවාහනයට එල්ල වී ඇති 10%ක පමණ සැපයුම් කප්පාදුව තවදුරටත් උග්‍ර වනු ඇත.
අර්බුදය මැද රාජ්‍යතාන්ත්‍රික සාකච්ඡා
මෙම නාවික තහනම ප්‍රකාශයට පත්වන්නේ, උද්ගතව ඇති යුදමය තත්ත්වයට විසඳුම් සෙවීම සඳහා ඉරානය සහ එක්සත් ජනපදය අතර මැදිහත්කරුවන් මාර්ගයෙන් රහසිගත රාජ්‍යතාන්ත්‍රික සාකච්ඡා ආරම්භ වී ඇති පසුබිමක වීම විශේෂත්වයකි. දින 10ක තාවකාලික සටන් විරාමයක් සඳහා වන යෝජනාවක් මැදහත් පාර්ශව වෙතින් ලැබී ඇති බව ඉරාන ජ්‍යෙෂ්ඨ නිලධාරියෙකු උපුටා දක්වමින් විදේශ මාධ්‍ය වාර්තා කරයි.
මේ අතර, ඉරාන අභ්‍යන්තර කටයුතු අමාත්‍ය එස්කන්දාර් මොමෙනි පාකිස්ථානයේ ඉස්ලාමාබාද් නුවර හදිසි සංචාරයක නිරත වෙමින්, එක්සත් ජනපදය සමඟ පවතින මෙම ගැටුම නිරාකරණය කර ගැනීමට නැවත මැදිහත් වන ලෙස පාකිස්ථාන රජයෙන් ඉල්ලීමක් කර ඇති බව ද රොයිටර් පුවත් සේවය වැඩිදුරටත් අනාවරණය කරයි.
(සටහන: Reuters ඇසුරින්; හර්ෂ උදයකාන්ත පීරිස්)
7/20/2026
(harshaprs@yahoo.com)
මුලාශ්‍රය
Houthis announce Saudi naval blockade, threatening new front in US-Iran war
