මෙට්‍රෝ දුම්රිය ස්ථාන 17ක් වසා දැමෙයි; අධ්‍යාපන අමාත්‍යවරයාගේ ඉල්ලා අස්වීම ප්‍රධාන ඉල්ලීමක්
ඉන්දියාවේ ජාතික මට්ටමේ විභාග ප්‍රශ්න පත්‍ර වගකීම් විරහිත ලෙස කාන්දු වීමේ සිදුවීම්වලට එරෙහිව හටගත් දැවැන්ත තරුණ සහ ශිෂ්‍ය විරෝධතා ව්‍යාපාරයේ ("කැරපොතු" අරගලය) නායකයින් සහ ඉන්දීය මධ්‍යම රජයේ නියෝජිතයින් අතර විශේෂ සාකච්ඡාවක් අද (24) පැවැත්වීමට නියමිතව තිබේ.
එසේ වුවද, විභාග පද්ධතියේ මුළුමනින්ම සිදුකරන ව්‍යුහාත්මක සංශෝධනයක් සහ අධ්‍යාපන අමාත්‍යවරයාගේ ඉල්ලා අස්වීම ඇතුළු ප්‍රධාන ඉල්ලීම් ඉටුවන තෙක් සමස්ත දේශය පුරා ක්‍රියාත්මක විරෝධතා ව්‍යාපාරය කිසිසේත්ම නතර නොකරන බව අරගලයේ නායකයෝ අවධාරණය කරති.
සාකච්ඡා සහ විරෝධතාවල පසුබිම
මෙම සාකච්ඡා වටය ආරම්භ වන්නේ සිසු අරගලයට ක්‍රියාකාරීව එක්ව සිටි ප්‍රකට පාරිසරික සහ සමාජ ක්‍රියාකාරී සෝනම් වන්ග්චුක් (Sonam Wangchuk) දින 26ක් පුරා නිරාහාරව සිටි උපවාසය අවසන් කිරීමෙන් අනතුරුවය. 2014 වසරෙන් පසුව අග්‍රාමාත්‍ය නරේන්ද්‍ර මෝදිගේ රජය හමුවේ මතුවූ විශාලතම තරුණ නැගී සිටීම ලෙස සැලකෙන මෙම විරෝධතාවයට දස දහස් සංඛ්‍යාත තරුණ තරුණියන් සහ විශ්වවිද්‍යාල සිසුන් එක්ව සිටිති.
පසුගිය දින කිහිපය පුරා නව දිල්ලි නුවර ජන්තර් මන්තර් ඇතුළු මධ්‍යම ප්‍රදේශයන්හි පැවැති විරෝධතා අතරතුරදී පොලිසිය සහ අරගලකරුවන් අතර දැඩි උණුසුම් තත්ත්වයන් සහ ගැටුම් හටගත්තේය. විරෝධතාකරුවන් ඉන්දීය පාර්ලිමේන්තුව මෙන්ම අග්‍රාමාත්‍ය නරේන්ද්‍ර මෝදි ගේ නිල නිවස දෙසට ගමන් කිරීමට උත්සාහ කිරීමත් සමඟ පොලිසිය විසින් කඳුළු ගෑස් සහ බලප්‍රහාර එල්ල කරමින් ඔවුන් පාලනය කිරීමට කටයුතු කළේය.
අගනුවර යටිතල පහසුකම් අඩපණ වීම
විරෝධතා උග්‍රවීමත් සමඟ ආරක්ෂක පියවරක් ලෙස නව දිල්ලියේ ප්‍රවාහන ජීවනාලිය බඳු මෙට්‍රෝ දුම්රිය ස්ථාන 17ක් වසා දැමීමට බලධාරීන් පියවර ගෙන තිබේ. ඊට අමතරව, මධ්‍යම දිල්ලියේ ප්‍රධාන ව්‍යාපාරික ස්ථාන වසා දමා ඇති අතර ඇතැම් කලාපයන්හි ජංගම අන්තර්ජාල සේවා ද සීමා කිරීමට පියවර ගෙන ඇත.
රාහුල් ගාන්ධි ගේ නායකත්වයෙන් යුත් ඉන්දීය කොන්ග්‍රස් පක්ෂය ඇතුළු විපක්ෂ දේශපාලන සන්ධානය ද මෙම සිසු අරගලයට පූර්ණ සහය පළ කරමින් පාර්ලිමේන්තු සභා වාරයන්හිදී ද ප්‍රශ්න පත්‍ර කාන්දුව සම්බන්ධයෙන් රජයට දැඩි ලෙස චෝදනා එල්ල කරමින් සිටියි.
රජයේ යෝජනා සහ අරගලකරුවන්ගේ ස්ථාවරය
අද දිනයේ පැවැත්වෙන සාකච්ඡාවලදී, විභාග ප්‍රශ්න පත්‍ර කාන්දු කිරීමට වගකිව යුත්තන්ට දැඩි දඬුවම් පැමිණවීම සඳහා නව නීති කෙටුම්පතක් පාර්ලිමේන්තුවට ඉදිරිපත් කිරීමට සූදානම් බව මධ්‍යම රජය ප්‍රකාශ කර ඇත.
කෙසේ වෙතත්, අරගලයේ නියුතු තරුණ නායකයින් පෙන්වා දෙන්නේ හුදෙක් නව නීති පැනවීමෙන් පමණක් ප්‍රශ්නය විසඳිය නොහැකි බවයි. ප්‍රශ්න පත්‍ර කාන්දු වීමට ඇති ඉඩකඩ මුළුමනින්ම අහෝසි වන පරිදි සමස්ත විභාග සහ බඳවාගැනීමේ පද්ධතියම විනිවිදභාවයෙන් යුතුව ප්‍රතිසංස්කරණය කිරීම සහ අසාර්ථක වූ අධ්‍යාපන බලධාරීන් වගවීම භාරගත යුතු බව ඔවුන්ගේ ප්‍රධාන ඉල්ලීම වී තිබේ.
ජාතික මට්ටමේ අධ්‍යාපනික සහ රැකියා පරීක්ෂණවලදී සිදුවන අක්‍රමිකතා හේතුවෙන් ලක්ෂ සංඛ්‍යාත ඉන්දීය තරුණ තරුණියන්ගේ අනාගතය අඳුරු වී ඇති බවට නැගී ඇති චෝදනා හමුවේ, මෙම තරුණ නැගී සිටීම වත්මන් පාලනාධිකාරිය හමුවේ ඇති අතිශය තීරණාත්මක දේශපාලනික හා සමාජීය අභියෝගයක් බවට පත්ව තිබේ.
(සටහන: Reuters ඇසුරින්; හර්ෂ උදයකාන්ත පීරිස්)
7/24/2026
(harshaprs@yahoo.com)
මුලාශ්‍රය
India's youth leaders to talk with government but press on with nationwide protests
