සෞදිය සහ ඇමෙරිකාව එක්ව ඉරාකයේ ඉරාන හිතවාදී ඉලක්කවලට ගුවන් ප්‍රහාර

කලාපීය නොසන්සුන්තාව තීව්‍ර වන අතරතුර ඉරානය චෝදනා ප්‍රතික්ෂේප කරයි


එක්සත් ජනපද මධ්‍යම බළකායේ (CENTCOM) සම්බන්ධීකරණය සහිතව ඉරාකයේ පිහිටි ඉරාන හිතවාදී සන්නද්ධ කණ්ඩායම් ඉලක්ක කරගනිමින් විශේෂිත ගුවන් ප්‍රහාර මාලාවක් එල්ල කළ බව සෞදි අරාබිය නිල වශයෙන් නිවේදනය කර ඇත. සෞදි අරාබියේ පෙරදිග පළාතේ (Eastern Province) පිහිටි බලශක්ති යටිතල පහසුකම් සහ තෙල් නිපදවන ස්ථාන ඉලක්ක කරගනිමින් පසුගිය දින කිහිපය පුරා එල්ල වූ ඩ්‍රෝන ප්‍රහාරවලට පිළිතුරු ලෙස මෙම හමුදා මෙහෙයුම ක්‍රියාත්මක කර තිබේ.

එක්සත් ජනපද මධ්‍යම බළකාය සඳහන් කරන්නේ පසුගිය පැය 72 ක කාලය තුළ සෞදි බලශක්ති පද්ධති සහ කලාපයේ රැඳී සිටින ඇමෙරිකානු බලඇණි ඉලක්ක කරගනිමින් ඩ්‍රෝන ප්‍රහාර 30 කට වැඩි ප්‍රමාණයක් එල්ල වී ඇති බවයි. ඉරානයේ ඉස්ලාමීය විප්ලවීය ආරක්ෂක බලකායේ (IRGC) උපදෙස් මත මෙම ප්‍රහාර එල්ල කර ඇති බවට ඇමෙරිකානු ආරක්ෂක අංශ චෝදනා කරයි.

කෙසේවෙතත්, ප්‍රහාර සම්බන්ධයෙන් තමන් වෙත එල්ල වන චෝදනා ඉරානය තරයේ ප්‍රතික්ෂේප කර ඇත. ඉරාන රාජ්‍ය නාලිකාව වන IRIB ඔස්සේ අදහස් දැක්වූ ඉරාන උසස් හමුදා නිලධාරියෙකු සඳහන් කළේ, කලාපයේ ඇමෙරිකානු සහ සෞදි ඉලක්ක වෙත එල්ල වන ප්‍රහාරවල වගකීම ඉරානය පිට පැටවීම පදනම් විරහිත සහ "විශාල ගණන් හැදීමේ වැරැද්දක්" (major miscalculation) බවයි.

සෞදි ආරක්ෂක අමාත්‍යාංශ ප්‍රකාශක ටර්කි අල්-මල්කි ප්‍රකාශ කළේ ඉරාක භූමියේ සිට සෞදි අරාබිය දෙසට එල්ල කරන ලද ඩ්‍රෝන යානා කිහිපයක්ම සෞදි ගුවන් ආරක්ෂණ පද්ධති මගින් අහසේදීම විනාශ කර දැමූ බවයි. සෞදි අරාබිය කලාපීය උත්සන්න වීමක් අපේක්ෂා නොකරන නමුත්, තම භූමියට සහ සම්පත්වලට එල්ල වන ඕනෑම ප්‍රහාරයකට සුදුසු වේලාවේදී සහ සුදුසු ස්ථානයේදී පිළිතුරු දීමට ස්වෛරී අයිතියක් පවතින බව සෞදි බලධාරීහු අවධාරණය කරති.

මෙම ගුවන් ප්‍රහාරවලින් ඉරාකයේ බස්රා (Basra) නගරයේ පිහිටි ජනප්‍රිය බලමුලු ගැන්වීමේ බලකායේ (PMF - Popular Mobilization Forces) ප්‍රධාන කාර්යාලයකට හානි සිදුව ඇති අතර එහි සාමාජිකයින් දෙදෙනෙකු තුවාල ලබා ඇති බව ඉරාකයේ INA පුවත් සේවය වාර්තා කරයි. ෂියා සන්නද්ධ කණ්ඩායම් කිහිපයකින් සමන්විත මෙම PMF බලකාය ඉරාක රාජ්‍ය ආරක්ෂක අංශවලට අනුයුක්තව ක්‍රියාත්මක වන අතර, ඉන් ප්‍රබල කණ්ඩායම් කිහිපයක්ම ඉරාන මතවාදයන්ට හිතවාදීව කටයුතු කරයි.

කලාපීය තත්ත්වය පිළිබඳව අවධානය යොමු කරමින් ඉරාක අගමැති අලි අල්-සයිදි සඳහන් කර ඇත්තේ අසල්වැසි රටවලට ප්‍රහාර එල්ල කිරීම සඳහා ඉරාක භූමිය භාවිත කිරීමට කිසිසේත්ම ඉඩ නොදෙන බවයි. මේ සම්බන්ධයෙන් වහාම පූර්ණ පරීක්ෂණයක් පවත්වන ලෙසද ඔහු අදාළ අංශවලට නියෝග කර ඇත.

මුලාශ්‍රය :

Saudi Arabia says it struck Iran-backed groups in Iraq with U.S. coordination