රුසියානු බලශක්ති ක්ෂේත්‍රයට එරෙහිව දැඩි සම්බාධක පැනවීමේ නව පනත් කෙටුම්පතට ඇමෙරිකානු සෙනෙට් සභාවේ අනුමැතිය
වෝෂින්ටන් නුවරදී පැවැති විශේෂ හමුවකදී ඇමෙරිකා එක්සත් ජනපද ජනාධිපති ඩොනල්ඩ් ට්‍රම්ප් සහ යුක්‍රේන ජනාධිපති වොලොඩිමීර් සැලෙන්ස්කි අතර ද්විපාර්ශ්වික සාකච්ඡා වටයක් පවත්වා තිබේ. රුසියාව සහ යුක්‍රේනය අතර අත්හිටුවා ඇති සාම සාකච්ඡා නැවත ආරම්භ කිරීම සහ යුක්‍රේනය තුළම 'පැට්‍රියට්' (Patriot) ගුවන් ආරක්ෂණ මිසයිල නිෂ්පාදනය කිරීම සඳහා බලපත්‍ර ලබා දීම සම්බන්ධයෙන් මෙහිදී නායකයන් දෙපළගේ ප්‍රධාන අවධානය යොමුවී ඇත.
යුක්‍රේනයේ හිතවාදියකු වූ ප්‍රබල ඇමෙරිකානු සෙනෙට් සභික ලින්ඩ්සි ග්‍රෑම්ගේ අභාවයෙන් පසු පැවැති අවමංගල්‍ය උත්සවයට සහභාගී වීම සඳහා වොෂින්ටන් නුවරට පැමිණි යුක්‍රේන ජනාධිපතිවරයා, ධවල මන්දිරයේ ඕවල් කාර්යාලයේදී ජනාධිපති ට්‍රම්ප් හමු විය. මෙම හමුවෙන් අනතුරුව හෙතෙම ෆින්ලන්ත ජනාධිපති ඇලෙක්සැන්ඩර් ස්ටබ් සහ ඇමෙරිකානු සෙනෙට් සභිකයන් පිරිසක් ද හමුවී සාකච්ඡා පවත්වා තිබේ.
රුසියානු මිසයිල ප්‍රහාරවලින් ආරක්ෂාවීම සඳහා යුක්‍රේනයට 'පැට්‍රියට්' මිසයිල පද්ධති සහ එහි නාශක මිසයිල (interceptors) අත්‍යවශ්‍ය සාධකයක් බව සෙනෙට් සභිකයන් හමුවේ අවධාරණය කළ සැලෙන්ස්කි, එම පද්ධති යුක්‍රේනය තුළම නිෂ්පාදනය කිරීමට ට්‍රම්ප් පරිපාලනය එකඟ වූ බව මාධ්‍ය වෙත ප්‍රකාශ කළේය. එමෙන්ම ඇමෙරිකානු ආරක්ෂක නිෂ්පාදන සමාගමක් වන 'ලොක්හීඩ් මාටින්' (Lockheed Martin) නිලධාරීන් හමුවී එම මිසයිල සම-නිෂ්පාදනය කිරීමේ කටයුතු කඩිනම් කිරීම පිළිබඳව ද සාකච්ඡා කළ බව හෙතෙම සඳහන් කළේය.
මීට අමතරව, පස් වසරක් තිස්සේ ඇදී යන මෙම යුද්ධය නිමා කිරීම සඳහා වන රාජ්‍යතාන්ත්‍රික ක්‍රියාමාර්ග කඩිනම් කිරීම පිළිබඳව ද දෙරටේ නායකයන්ගේ අවධානය යොමුවී ඇත. මෙහි පියවරක් ලෙස, රුසියාව සහ යුක්‍රේනය අතර මැදිහත්කරුවන් ලෙස කටයුතු කරන ඇමෙරිකානු නියෝජිතයන් වන ස්ටීව් විට්කොෆ් සහ ජැරඩ් කුෂ්නර් ඉදිරියේදී පළමු වරට යුක්‍රේනයේ සංචාරයක නිරත වීමට නියමිත බව වාර්තා වේ.
මේ අතර, හිටපු සෙනෙට් සභික ලින්ඩ්සි ග්‍රෑම් විසින් ඉදිරිපත් කරන ලද රුසියානු බලශක්ති ක්ෂේත්‍රයට එරෙහි නව සම්බාධක පනත සෙනෙට් සභාවේදී වැඩි ඡන්දයෙන් සම්මත වී තිබේ. රුසියානු තෙල් සහ ගෑස් මිලදී ගන්නා ප්‍රධාන රටවලට එරෙහිව දැඩි බදු පැනවීමට මෙම පනත මගින් ඇමෙරිකානු ජනාධිපතිවරයාට බලය හිමිවන අතර, එය මොස්කව් පාලනයට එල්ල වන විශාල ආර්ථික බලපෑමක් වනු ඇතැයි විශ්ලේෂකයෝ පෙන්වා දෙති.
ජනාධිපති ට්‍රම්ප්ගේ දෙවන ධුර කාලය ආරම්භයේදී දෙරට අතර පැවැති යම් මතභේදාත්මක තත්ත්වයන් මෑත කාලීනව සමනය වී ඇති අතර, මෙම වොෂින්ටන් සංචාරය හරහා යුක්‍රේනයට ලැබෙන ඇමෙරිකානු හමුදාමය හා රාජ්‍යතාන්ත්‍රික සහයෝගය තවදුරටත් තහවුරු වී ඇති බව වාර්තා වේ.
මුලාශ්‍රය :
Trump, Zelenskiy discuss Patriot deal and reviving talks with Russia
