ඉන්දීය මුදල් අමාත්‍යවරිය සහ වාණිජ අමාත්‍යවරයා විදෙස් සංචාරවල නියැලෙමින් ඉන්දියාව “විශ්වාසනීය” ආයෝජන ගමනාන්තයක් ලෙස ප්‍රවර්ධනය කරයි.
විදේශීය ආයෝජන රටින් බැහැර වීම සහ තරුණ පරපුර මුහුණපාන විවිධ අභියෝග හේතුවෙන් උද්ගත වී ඇති ආර්ථික තත්ත්වය හමුවේ, ඉන්දියාව සිය ආර්ථික වර්ධන කතාව ගෝලීය ආයෝජකයන් වෙත ගෙන යමින් නව ප්‍රාග්ධන ආකර්ෂණය කර ගැනීමට උත්සාහ කරමින් සිටී.
ලෝකයේ වේගයෙන්ම වර්ධනය වන ප්‍රධාන ආර්ථිකයක් ලෙස සිය තත්ත්වය රඳවා ගැනීමට උත්සාහ කළද, ඉන්දියාව වෙත ස්ථාවර විදේශ ආයෝජන ආකර්ෂණය කරගැනීමේදී විවිධ දුෂ්කරතාවන්ට මුහුණ දී සිටී. විශේෂයෙන්ම ඉහළ කොටස් වෙළඳපොළ අගයන් සහ කෘත්‍රිම බුද්ධිය (AI) වැනි ක්ෂේත්‍රවලට වෙනත් රටවලින් ලැබෙන දැවැන්ත ආයෝජන හේතුවෙන් විදේශීය ආයෝජකයන් මේ වසරේදී ඉන්දීය කොටස් සහ බැඳුම්කරවලින් සිය මුදල් ඉවත් කර ගැනීමට කටයුතු කර ඇත.
ගෝලීය ආයෝජකයන් ආකර්ෂණය කරගැනීමේ රාජ්‍ය තාන්ත්‍රික ප්‍රයත්න
ඉන්දීය මූල්‍ය අමාත්‍ය නිර්මලා සීතාරාමන් කැනඩාව සහ ඇමරිකා එක්සත් ජනපදය වෙත දින නමයක සංචාරයක නිරත වන අතර, ඇයගේ න්‍යාය පත්‍රයේ වෙළඳාම, ආයෝජන සහ ආර්ථික සහයෝගීතාව ඉහළින්ම ඇත. ඇයගේ වෙළඳ අමාත්‍ය සගයා වන පියුෂ් ගෝයල් ද මේ දිනවල ජපානයේ සංචාරය කරමින් ඉන්දියාව විශ්වාසනීය ආයෝජන ගමනාන්තයක් ලෙස ඉස්මතු කර දැක්වීමට කටයුතු කරමින් සිටී.
ටොරොන්ටෝ නගරයේදී අදහස් දක්වමින් මූල්‍ය අමාත්‍යවරිය සඳහන් කළේ ගෝලීය ආයෝජකයන්ගේ සහභාගීත්වය මඟින් ඉන්දියාව වර්ධනයේ එන්ජිමක් බවට පත්කිරීමට සහ අනෙකුත් රටවලටද ඒ සමඟ ඉදිරියට යාමට අවස්ථාව සැලසෙන බවයි. පරිමාණය, ස්ථාවර වර්ධනය, තරුණ ජනගහනය, පුළුල් වන පරිභෝජනය සහ ගැඹුරු වන ප්‍රාග්ධන වෙළඳපොළ යන සංයෝජනය ඉන්දියාව හැර වෙනත් රටවලින් ලැබීම අසීරු බව ඇය වැඩිදුරටත් පෙන්වා දුන්නාය.
ඉන්දියාවේ දළ දේශීය නිෂ්පාදිතය (GDP) පසුගිය කාර්තුවේදී සියයට 8කට ආසන්න වේගයකින් වර්ධනය වී ඇති බවට ඉදිරියේදී නිකුත් වීමට නියමිත දත්ත මඟින් අනාවරණය වනු ඇතැයි අපේක්ෂා කෙරේ. කෙසේ වෙතත්, මෙම ධනාත්මක ආර්ථික දර්ශක තිබියදීත්, ඉන්දීය වත්කම් කෙරෙහි ජාත්‍යන්තර ආයෝජකයන්ගේ උද්යෝගය අපේක්ෂිත මට්ටමක නොමැති බව වෙළඳපොළ වාර්තා පෙන්වා දෙයි.
අභ්‍යන්තර අභියෝග සහ අධ්‍යාපන පද්ධතියේ දුර්වලතා
ආර්ථිකය ගෝලීය අභියෝග හමුවේ කැපී පෙනෙන ඔරොත්තු දීමේ හැකියාවක් පෙන්නුම් කරන බව ඉන්දීය මහ බැංකුව පෙන්වා දුන්නද, රට තුළ පවතින සමාජ හා ආර්ථික අභියෝග ද මතු වෙමින් පවතී. විශේෂයෙන්ම තරුණ තරුණියන් සඳහා ගුණාත්මක රැකියා අවස්ථා හිඟ වීම, ආදායම් විෂමතා සහ අධ්‍යාපන අවස්ථා සම්බන්ධයෙන් පවතින ගැටලු හේතුවෙන් මෑතකදී රටපුරා ශිෂ්‍ය විරෝධතා පැන නැඟුණි.
මෙම තත්ත්වය රටේ අධ්‍යාපන පද්ධතියේ පවතින දුර්වලතා සහ තරුණ ජනගහනය මුහුණ දෙන සැබෑ අභියෝග ලෝකයාට අනාවරණය කර දී ඇත. රජය විසින් ලබා දී ඇති පොරොන්දු ඉටු කිරීමට අපොහොසත් වී ඇති බව පවසමින් විවිධ ක්‍රියාකාරීන් යළිත් විරෝධතා සංවිධානය කිරීමට කටයුතු කරමින් සිටීම රජය මුහුණ දී ඇති තවත් අභියෝගයකි.
එසේ වුවද, ඉන්දියාවේ වර්ධනය තාවකාලික ආර්ථික චක්‍රයකට සීමා නොවන්නක් බවත්, වේගවත් නාගරීකරණය, වර්ධනය වන මධ්‍යම පාන්තික ජනගහනය සහ ඩිජිටල් යටිතල පහසුකම් වැනි ව්‍යුහාත්මක සාධක මත එය පදනම් වී ඇති බවත් මූල්‍ය අමාත්‍යවරිය අවධාරණය කරයි. අග්‍රාමාත්‍ය නරේන්ද්‍ර මෝදිගේ රජය යටතේ මෑත වසරවලදී යටිතල පහසුකම් සඳහා වන රාජ්‍ය ආයෝජන සැලකිය යුතු ලෙස ඉහළ නංවා ඇති අතර, එය රටේ දිගුකාලීන ආර්ථික ස්ථාවරත්වයට හේතු වනු ඇතැයි අපේක්ෂා කෙරේ.
මුලාශ්‍රය :
Business Times - India takes growth pitch abroad as foreign money pulls back
