*සාම්ප්‍රදායික 'ටෙරොයිඩ්' (Terroir) සංකල්පය සහ නිෂ්පාදනවල ප්‍රමිතිය ආරක්ෂා කර ගනිමින් මෙම තීරණය ක්‍රියාත්මක කර තිබේ.
ප්‍රංශයේ ඇති වූ දැඩි ගිම්හාන නියඟය හේතුවෙන් කිරි ආශ්‍රිත නිෂ්පාදන සඳහා අවශ්‍ය තෘණ බිම් හිඟවීම නිසා, එරට ප්‍රසිද්ධ චීස් නිෂ්පාදන නීති රීති තාවකාලිකව ලිහිල් කිරීමට රජය පියවර ගෙන තිබේ. මෙම තීරණයත් සමඟ අබොන්ඩාන්ස් (Abondance), බියුෆෝට් (Beaufort) සහ කොන්ටේ (Comté) වැනි නැගෙනහිර ප්‍රංශ කඳුකර ප්‍රදේශවල නිෂ්පාදනය කෙරෙන ලෝක ප්‍රසිද්ධ චීස් වර්ග සඳහා රජයේ විශේෂ අවසර පත්‍ර ලබා දී ඇත.
ප්‍රංශ සහ යුරෝපා සංගමයේ නීතිවලට අනුව, සුවිශේෂී කාලගුණික තත්ත්වයන් පවතින අවස්ථාවන්හිදී මෙවැනි තාවකාලික නිදහස් කිරීම් ලබා දීමට ප්‍රතිපාදන පවතී. මීට පෙර 2022 වසරේ ඇති වූ වියළි ගිම්හාන සමයෙන් පසුද මෙවැනිම පියවර අනුගමනය කරනු ලැබීය
දැඩි නියඟය සහ නිෂ්පාදන අභියෝග
ප්‍රංශයේ ජාතික සම්භවය සහ ගුණාත්මකභාවය පිළිබඳ ආයතනය (INAO) විසින් මෙම නියඟය 'ඓතිහාසික' තත්ත්වයක් ලෙස හඳුන්වා දී තිබේ. දැඩි උණුසුම සහ වර්ෂාපතනය අඩුවීම හේතුවෙන් ප්‍රංශයේ තෘණ බිම් විශාල ප්‍රමාණයක් වියළී යාමෙන්, කිරි දෙන ගවයන් සඳහා අවශ්‍ය ස්වභාවික තෘණ ලබා දීම බරපතල අභියෝගයක් වී ඇත.
සාමාන්‍යයෙන් ප්‍රංශයේ 'AOC' සහ 'AOP' වැනි නිෂ්පාදන සහතික මඟින් එම ආහාරවල නිශ්චිත භූගෝලීය පිහිටීම සහ සාම්ප්‍රදායික නිෂ්පාදන ක්‍රම දැඩි ලෙස නියාමනය කරයි. මෙහි අරමුන වී ඇත්තේ එක් එක් ප්‍රදේශයට ආවේණික වූ සුවිශේෂී රසය සහ අනන්‍යතාව ආරක්ෂා කිරීමයි. කෙසේ වෙතත්, වත්මන් තත්ත්වය හමුවේ මෙම දැඩි නීති තාවකාලිකව ලිහිල් කිරීමට බලධාරීන්ට සිදුව ඇත.
නව නිදහස් කිරීම් සහ නිෂ්පාදන වෙනස්කම්
නව රජයේ නියෝග යටතේ, ඇල්ප්ස් කඳුකරයේ අබොන්ඩාන්ස් චීස් නිෂ්පාදකයින්ට තම සතුන්ගේ දෛනික ආහාර වේලෙහි අඩංගු විය යුතු ස්වභාවික තෘණ ප්‍රමාණය 50% සිට 15% දක්වා අඩු කර ගැනීමට අවසර ලැබී ඇත. එසේම, නියමිත භූගෝලීය කලාපයෙන් පිටතින් සත්ව ආහාර (forage) ගෙන්වා ගැනීමට සහ විශේෂ අතිරේක පෝෂ්‍ය ද්‍රව්‍ය භාවිතා කිරීමටද ඔවුන්ට හිමිකම ලැබී තිබේ.
ජුරා කඳුකරයේ කොන්ටේ චීස් නිෂ්පාදකයින්ටද තම ගවයන්ට සාමාන්‍යයෙන් ලබා දෙන ප්‍රාදේශීය කොළ පැහැති ඉරිඟු වෙනුවට වෙනත් ප්‍රදේශවලින් ගෙන්වාගත් ඉරිඟු ලබා දීමට අවසර දී ඇත.
මෙම සහන කන්ටල් (Cantal), බ්ලූ ඩොවර්න් (Bleu d'Auvergne), ෆෝම් ඩොම්බර්ට් (Fourme d'Ambert), රෙබ්ලොචොන් (Reblochon) සහ එළුවන්ගේ කිරිවලින් සාදන රොකමාඩූර් (Rocamadour) ඇතුළු තවත් චීස් වර්ග කිහිපයකටම ක්‍රියාත්මක වනු ඇතැයි අපේක්ෂා කෙරේ. මීට අමතරව, නොර්මන්ඩි ප්‍රදේශයේ කැල්වඩොස් සහ සයිඩර්, අල්සේස් ප්‍රදේශයේ ක්‍රීමන්ට් වයින් සහ පෝටු-චැන්ටෙස් බැටළු මස් වැනි වෙනත් ආරක්ෂිත නිෂ්පාදන කිහිපයක නීති ද මෙම කාලගුණික බලපෑම හේතුවෙන් සංශෝධනය කර තිබේ.
අනාගත අභියෝග සහ 'ටෙරොයිඩ්' සංකල්පය
මෙම තාවකාලික වෙනස්කම් හේතුවෙන් චීස්වල රසයේ, ගුණාත්මකභාවයේ හෝ නිෂ්පාදන ප්‍රමාණයේ සහ මිල ගණන්වල යම් වෙනසක් සිදුවේද යන්න ඉදිරියේදී අධ්‍යයනය කළ යුත්තකි. කෙසේ වෙතත්, දිගුකාලීන දැක්මකින් යුතුව සලකා බැලීමේදී, මෙම තත්ත්වය මඟින් ප්‍රංශයේ මෙන්ම ජාත්‍යන්තර මට්ටමින් පවතින සාම්ප්‍රදායික නිෂ්පාදන සහතිකවල පැවැත්ම පිළිබඳ බරපතල ප්‍රශ්නාර්ථයක් මතු කර තිබේ.
දේශගුණික විපර්යාස හේතුවෙන් යම් යම් ආහාර ද්‍රව්‍ය ඒවායේ සාම්ප්‍රදායික ප්‍රදේශ තුළ තවදුරටත් නිෂ්පාදනය කිරීමට නොහැකි වන තත්ත්වයක් උද්ගත වුවහොත්, ප්‍රංශ සංස්කෘතියේ මූලික කුළුණක් වන 'ටෙරොයිඩ්' (Terroir) සංකල්පය දැඩි පරීක්ෂාවකට ලක් වනු ඇතැයි විශේෂඥයෝ පෙන්වා දෙති.
වැඩිදුර කියවීම සඳහා:
BBC News - France relaxes strict cheese-making rules after prolonged drought
