කලින් නිදහස් කිරීමේ තීරණ සහ කාර්ය මණ්ඩල හිඟය ගැන විවිධ පාර්ශ්වවලින් දැඩි අවධානයක්
එංගලන්තය සහ වේල්සය පුරා පිහිටි බන්ධනාගාරවල පවතින දැඩි තදබදයට පිළියමක් ලෙස දැනට පවතින බන්ධනාගාර තුළම භාවිතයට නොගත් පරිශ්‍ර සිර මැදිරි බවට පරිවර්තනය කිරීමට එරට අධිකරණ අමාත්‍යාංශය පියවර ගෙන තිබේ.
මේ යටතේ පවතින බන්ධනාගාර පරිශ්‍රවල භාවිතයට නොගෙන පවතින කාර්යාල කාමර, රෙදි සෝදන කාමර (Laundry rooms) සහ ගබඩා කාමර සිර මැදිරි බවට පත් කිරීමට සැලසුම් කර ඇති අතර, ඒ සඳහා දැනට වෙන් කර ඇති අයවැය ප්‍රතිපාදනවලින් පවුම් මිලියන 110ක මුදලක් ආයෝජනය කෙරෙනු ඇත.
ඉඩකඩ කළමනාකරණය සහ රජයේ ස්ථාවරය
බන්ධනාගාරවල උපරිම ධාරිතාව ඉක්මවා යෑම වළක්වා ගැනීම වෙනුවෙන් මෙම පියවර ගන්නා බව අධිකරණ ලේකම් ඇලෙක්ස් නොරිස් (Alex Norris) සඳහන් කරයි. මෙම නව සැලැස්ම යටතේ අතිරේක සිර මැදිරි 200 ත් 900 ත් අතර ප්‍රමාණයක් අලුතින් නිර්මාණය කර ගැනීමට අපේක්ෂිතය.
රෙදි සෝදන කාමර සිර මැදිරි බවට පත්කිරීම සම්බන්ධයෙන් අදහස් දැක්වූ අමාත්‍යවරයා සඳහන් කළේ, බන්ධනාගාරවල දෛනික ක්‍රියාකාරීත්වයට බාධාවක් නොවන පරිදි පවතින සම්පත් නිර්මාණශීලීව හා ප්‍රමුඛතාව මත ප්‍රතිව්‍යුහගත කිරීම මෙහි අරමුණ බවයි. රජය පසුගිය වසර දෙක තුළ සිරකරුවන් 3,200කට අධික පිරිසකට අවශ්‍ය ඉඩකඩ සලසා දී ඇති අතර, 2031 වන විට සිරකරුවන් 14,000කට අවශ්‍ය ඉඩ පහසුකම් නිර්මාණය කිරීම සඳහා පවුම් බිලියන 7ක ප්‍රාග්ධන ආයෝජන සැලැස්මක් ද ක්‍රියාත්මක වෙමින් පවතී.
කාර්ය මණ්ඩල ගැටලුව සහ වෘත්තීය සමිති අනතුරු ඇඟවීම
කෙසේ වෙතත්, මෙම තීරණය සම්බන්ධයෙන් බන්ධනාගාර නිලධාරීන්ගේ සංගමය (Prison Officers' Association - POA) සිය අවධානය යොමු කර තිබේ. එහි සභාපති මාර්ක් ෆෙයාර්හර්ස්ට් (Mark Fairhurst) පෙන්වා දෙන්නේ අවශ්‍ය තරම් අලුත් ඉඩකඩ හෝ නව බන්ධනාගාර ඉදිකළ ද, එම රැඳවියන් අධීක්ෂණය කිරීම සඳහා ප්‍රමාණවත් කාර්ය මණ්ඩලයක් බඳවා ගැනීමේ දැඩි අභියෝගයක් පවතින බවයි. සේවා කොන්දේසි හා පවතින තත්ත්වයන් හමුවේ බන්ධනාගාර නිලධාරී වෘත්තියට එක්වීමට ඇති උනන්දුව අඩුවීම මීට ප්‍රධාන හේතුවක් ලෙස ඔහු පෙන්වා දෙයි.
දත්ත වාර්තාවලට අනුව එංගලන්තය සහ වේල්සය ආශ්‍රිත බන්ධනාගාර මේ වන විට සිය උපරිම ධාරිතාවයෙන් සියයට 97ක මට්ටමක පවතී. නිල ධාරිතාව 90,000කට ආසන්න සීමාවක පවතින අතර, සිරගතව සිටින මුළු පිරිස 86,000ත් 88,000ත් අතර ඉහළ අගයක පවතී.
කලින් නිදහස් කිරීමේ ක්‍රමවේදය සහ නිර්ණායක
බන්ධනාගාර තදබදය අවම කිරීමේ තවත් පියවරක් ලෙස සුදුසුකම් ලත් සිරකරුවන් කලින් නිදහස් කිරීමේ (Early release scheme) වැඩපිළිවෙළක් ද ක්‍රියාත්මක කෙරේ. ඒ යටතේ ලබන ඔක්තෝබර් මාසයේ සිට රැඳවියන් 4,500ක් පමණ අදියර කිහිපයකින් මුදාහැරීමට සැලසුම් කර ඇත.
එහෙත් එම ක්‍රමවේදය යටතේ ස්ත්‍රී දූෂණ වැරදිකරුවන්, බරපතළ ළමා ලිංගික අපරාධකරුවන් මෙන්ම මනුෂ්‍ය ඝාතන (Manslaughter) සම්බන්ධයෙන් වරදකරුවන් වූවන් නිදහස් නොකිරීමට තීරණය කර තිබේ. කලින් නිදහස් කෙරෙන රැඳවියන්ට ඉලෙක්ට්‍රොනික ටැග් පැළඳවීම (Tagging) සහ පාපන්දු තරග නැරඹීම තහනම් කිරීම වැනි දැඩි සීමාවන් පනවන බවත්, වින්දිතයන්ගේ ආරක්ෂාව සහතික කිරීම සඳහා විශේෂ පියවර ගන්නා බවත් බලධාරීහු සහතික කරති. ඊට අමතරව වින්දිතයන්ට සහන සැලසීමේ සේවාවන් වෙනුවෙන් තවත් පවුම් මිලියන 18.9ක මුදලක් වෙන් කිරීමට ද පියවර ගෙන ඇත.
විදේශීය සිරකරුවන් පිටුවහල් කිරීම සහ ඉදිරි සැලසුම්
පවතින ඉඩකඩ හිඟය කළමනාකරණය කරගැනීම සඳහා විදේශීය ජාතික රැඳවියන් ඔවුන්ගේ මව් රටවලට පිටුවහල් කිරීමේ ක්‍රියාවලිය ද වේගවත් කර තිබේ. වාර්තාවලට අනුව පසුගිය ජුනි මාසය දක්වා වූ වසරක කාලය තුළ විදේශීය වැරදිකරුවන් 5,962 දෙනෙකු පිටුවහල් කර ඇති අතර, එය පෙර වසරට වඩා 12% ක වර්ධනයකි.
දිගුකාලීන විසඳුමක් ලෙස ලැන්කෂයර් (Lancashire) ප්‍රදේශයේ රැඳවියන් 1,700කට පහසුකම් සහිත නව බන්ධනාගාරයක් ඉදිකිරීමේ කොන්ත්‍රාත්තුවට ද අධිකරණ අමාත්‍යාංශය පසුගියදා අත්සන් තබා ඇත.
වැඩිදුර තොරතුරු කියවීම සඳහා:
BBC News - Laundry rooms to be turned into cells to tackle prison overcrowding
UK Ministry of Justice - Prison capacity and population statistics
