අමෙරිකානු ස්වදේශ ආරක්ෂක දෙපාර්තමේන්තුවේ රහසිගත මෙහෙයුම් සහ ඔත්තු සේවා නිලධාරීන් 40,000කට වැඩි පිරිසකගේ පෞද්ගලික තොරතුරු අන්තර්ජාලයට මුදාහැර ඇති බවට වාර්තා වීමත් සමඟ එරට රාජ්‍ය බුද්ධි ක්ෂේත්‍රය කැළඹීමට පත්ව තිබේ.
රහසිගත දත්ත ප්‍රසිද්ධියට පත් කරන 'Distributed Denial of Secrets' වෙබ් අඩවිය මෙම අනාවරණය සිදු කර ඇත.
අමෙරිකානු අභ්‍යන්තර ආරක්ෂාව භාර ප්‍රධානම ආයතනය වන ස්වදේශ ආරක්ෂක දෙපාර්තමේන්තුව (DHS) පවසන්නේ, සිදුව ඇතැයි පැවසෙන මෙම දත්ත කාන්දුව පිළිබඳව සොයාබලමින් සිටින බවත් කාර්ය මණ්ඩලයේ ආරක්ෂාව තහවුරු කිරීමට කඩිනම් පියවර ගන්නා බවත්ය.
රහස් මෙහෙයුම් සහ සයිබර් විමර්ශකයෝ
අන්තර්ජාලයට මුදාහැර ඇති ලේඛන අතර ආගමන හා රේගු බලාත්මක කිරීමේ අංශය (ICE), රේගු හා දේශසීමා ආරක්ෂණ අංශය (CBP) සහ සයිබර් ආරක්ෂණ ආයතනය (CISA) යන ප්‍රධාන ආයතනවල නිලධාරීන්ගේ තොරතුරු ඇතුළත් වේ.
එම ලැයිස්තුවල නිලධාරීන්ගේ නම්, දුරකථන අංක සහ ඊමේල් ලිපින පමණක් නොව, විශේෂ මෙහෙයුම්, පරිගණක අධිකරණ වෛද්‍ය පරීක්ෂණ සහ රහස් ඔත්තු බැලීම් (Undercover work) ආදී සංවේදී අංශවල සේවය කරන නිලධාරීන් කවුරුන්ද යන්නත් සටහන්ව තිබීම වඩාත් අවදානම් සහගත තත්ත්වයක් මතු කර ඇත.
සංවේදී ක්ෂේත්‍රවල සේවයේ නියුතු මෙවැනි නිලධාරීන්ගේ අනන්‍යතාව හෙළිදරව් වීම ඔවුන්ගේ ජීවිතවලට මෙන්ම ක්‍රියාත්මක වන ජාතික ආරක්ෂක මෙහෙයුම්වලටද සෘජු තර්ජනයක් වන බව ආරක්ෂක විශ්ලේෂකයෝ පෙන්වා දෙති.
'තොරතුරු සාධාරණීකරණය' සහ මහමොළකරුවන්
'Department of Peace' නමින් පෙනී සිටින කණ්ඩායමක් විසින් මෙම දත්ත ලබාගෙන ඇති අතර, ඕනෑම අයෙකුට පහසුවෙන් සෙවිය හැකි පරිදි සෙවුම් පද්ධතියක්ද අන්තර්ජාලයට එක්කර තිබේ.
"ඔවුන් සතුව අපේ තොරතුරු තිබේ නම්, අප සතුව ඔවුන්ගේ තොරතුරු තිබීමත් සාධාරණයි" යනුවෙන් එම කණ්ඩායම ප්‍රකාශ නිකුත් කරමින් දත්ත මංකොල්ලය සාධාරණීකරණය කිරීමට උත්සාහ දරා ඇත.
ස්වදේශ ආරක්ෂක දෙපාර්තමේන්තුව භාවිත කරන 'Okta' නමැති පිවිසුම් සේවා පද්ධතිය හරහා මෙම දත්ත ලබාගත් බවට ප්‍රකාශ වුවද, තම පද්ධතිවල කිසිදු අනාරක්ෂිත බවක් හෝ අනවසර පිවිසුමක් සිදුව නොමැති බව Okta සමාගම අවධාරණය කරයි.
නිලධාරීන් පවා නොදත් තොරතුරු කාන්දුව
රොයිටර්ස් පුවත් සේවය මෙම දත්ත ලැයිස්තුවේ සඳහන් නිලධාරීන් කිහිපදෙනෙකුගේ තොරතුරු බාහිර වාර්තා සමඟ සැසඳීමේදී ඒවා සත්‍ය තොරතුරු බවට තහවුරු කරගෙන තිබේ.
අදාළ ලැයිස්තුවේ සිටි නිලධාරීන් තිදෙනෙකුට දුරකථනයෙන් කතා කිරීමටද රොයිටර්ස් වාර්තාකරුවන්ට හැකිවී ඇති අතර, තමන්ගේ පුද්ගලික තොරතුරු මෙලෙස ප්‍රසිද්ධියට පත්ව ඇති බවට ඔවුන් දැනුවත්වී ඇත්තේද මාධ්‍යවේදීන් කළ එම ඇමතුමෙන් පසුවය.
තොරතුරු අතරින් ඇතැම් කරුණු සමාජ මාධ්‍ය හරහා සොයාගත හැකි මට්ටමේ පැවතියද, ආයතනයේ මෙතෙක් හෙළි නොවූ අභ්‍යන්තර ව්‍යුහය සහ රහස් වැඩසටහන් රැසක තොරතුරුද ඊට ඇතුළත් බව වාර්තා වේ.
මසක් තුළ එල්ල වූ තෙවන මහා ප්‍රහාරය
ඇමෙරිකානු ආරක්ෂක සහ නීතිය බලාත්මක කිරීමේ ප්‍රධානම ආයතන ඉලක්ක කර ගනිමින් මාසයක් තුළ වාර්තා වූ තෙවන ප්‍රධාන දත්ත අනාවරණය මෙයයි.
පසුගිය සැප්තැම්බර් මාසයේදී FBI ආයතනයේ කාර්ය මණ්ඩල තොරතුරු සයිබර් ප්‍රහාරයකට ලක්වූ අතර, ආරක්ෂක දෙපාර්තමේන්තුවේ (Pentagon) මිලියන සංඛ්‍යාත හමුදා සාමාජිකයින්ගේ දත්ත අනාරක්ෂිත වීම සම්බන්ධයෙන් පසුගිය සතියේ නඩු පැවරීමක්ද සිදුවිය.
ලොව බලවත්ම රාජ්‍යයක අභ්‍යන්තර බුද්ධි සහ ආරක්ෂක ජාලයන්හි සයිබර් ආරක්ෂණ විධිවිධාන කෙතරම් දුරට විශ්වාසදායකද යන්න පිළිබඳව මෙම සිදුවීම් මාලාවත් සමඟ බරපතල ප්‍රශ්නාර්ථයක් මතුව තිබේ.
වැඩිදුර තොරතුරු ඇතුළත් මූලාශ්‍ර සබැඳියක්
Reuters පුවත් වාර්තාව: Leak website releases data on thousands of US Homeland Security employees