මුළු ඕස්ට්‍රේලියාවම එක තත්පරයකට නිහඬ කරවන ‘ලෙක්සස් මෙල්බර්න් කුසලාන’ (Melbourne Cup) තුරඟ තරගය නිමාව දුටුවේ ගෝලීය ක්‍රීඩා ලෝකයේ දැඩි කතාබහක් නිර්මාණය කරමිනි.
මෙවර තරග කිරුළ හිමි කරගත්තේ බ්‍රිතාන්‍යයේ තුන්වන චාල්ස් රජු සතුව සිට ඕස්ට්‍රේලියානු ව්‍යාපාරිකයින් පිරිසකට විකුණා දැමූ ‘පොයින්ට් ඔෆ් ලෝ’ (Point of Law) නම් තුන්හැවිරිදි අශ්වයායි.
පවුම් මිලියන 4.5ක (ඕස්ට්‍රේලියානු ඩොලර් මිලියන 8කට අධික) දැවැන්ත ත්‍යාග මුදලින් ජයග්‍රාහී පුහුණුකරු සියාරොන් මේහර්ගේ කණ්ඩායමට හිමි වූ මුදල පමණක් පවුම් මිලියන 2.25කි.
චාල්ස් රජුගේ පවුම් මිලියන 3ක තීරණය
පසුගිය ජූලි මාසයේදී බ්‍රිතාන්‍යයේ පැවති තරගයක් ජයග්‍රහණය කිරීමෙන් පසු, රාජකීය අශ්ව ගාලේ ඉහළ යන නඩත්තු වියදම් පියවා ගැනීම සඳහා මෙම අශ්වයා විකුණා දැමීමට රාජකීය උපදේශකයෝ තීරණය කළහ.
ව්‍යාපාරික කටයුත්තක් ලෙස පවුම් මිලියන 3කට ආසන්න මුදලකට අලෙවි වූ මෙම අශ්වයා, ඕස්ට්‍රේලියානු හිමිකරුවන් යටතේ සහභාගී වූ දෙවන තරගයෙන්ම මෙවැනි ජයග්‍රහණයක් වාර්තා කරනු ඇතැයි කිසිවෙකුත් අපේක්ෂා කළේ නැත.
අශ්වයෙකුගේ සැබෑ දක්ෂතාවය කලින් අනාවැකි කිව නොහැකි ක්ෂේත්‍රයක, 'ලාභයක් ලබන මොහොතේ විකිණීම' සාමාන්‍ය නීතියක් වුවද, මෙම විකිණීම රාජකීය ඉතිහාසයේ කැපී පෙනෙන පසුතැවීමක් බවට පත්වීමේ ඉඩක් පවතින බව විචාරකයෝ පෙන්වා දෙති.
මීටර් ගණනක පසුපස සිට ආ පෙරළිකාර ජය
තරගයේ වැඩි කාලයක් පෙරමුණ ගෙන සිටි ‘රෝයල් සුප්‍රමසි’ සෙසු අශ්වයින්ට වඩා අශ්ව සිරුරු 20ක් තරම් ඉදිරියෙන් දිව ආවේ ජයග්‍රහණය තමන් සතු කරගන්නා විලාසයෙනි.
තරග වටය නිමාවීමට මීටර් කිහිපයක් තිබියදී මැද පෙළින් මතුවූ ‘පොයින්ට් ඔෆ් ලෝ’, ඇදහිය නොහැකි වේගයකින් ඉදිරියට පැමිණ ප්‍රතිවාදීන් සියල්ල අභිබවා අශ්ව සිරුරු තුනහමාරක පරතරයකින් තරගය නිමා කළේය.
මෙම ජයත් සමඟ, වසර 166ක මෙල්බර්න් කුසලාන ඉතිහාසයේ පළමු, දෙවන සහ තෙවන ස්ථාන තුනම එකම පුහුණුකරුවෙකුගේ අශ්වයින් විසින් හිමිකරගත් පළමු අවස්ථාව වාර්තා කිරීමට පුහුණුකරු සියාරොන් මේහර් සමත් විය
ඛේදවාචකයකින් බිඳුණු පියෙකුට දැනුණු දියණියගේ ආශිර්වාදය
කෝටි ගණනක ත්‍යාග මුදලට එහා ගිය සංවේදී කතාව දිගහැරෙන්නේ අශ්වයාගේ සම හිමිකරුවෙකු වන කෙරී ගුඩ් (Kerry Good) වටාය.
2024 වසරේ සිඩ්නි සාප්පු සංකීර්ණයේදී සිදු වූ ම්ලේච්ඡ පිහි ප්‍රහාරයෙන් තම මාස 9ක බිලිඳිය බේරාගැනීමට ගොස් ඝාතනයට ලක්වූ 38 හැවිරිදි ඈෂ්ලී ගුඩ්, කෙරීගේ දියණියයි.
"පසුගිය වසර දෙක මට අතිශය වේදනාකාරී වුණා. මගේ දුව අහසේ ඉඳන් මා දිහා බලන් ඉන්නවා. මාව මේ තැනට අරන් ආවේ එයා," යැයි කඳුළු පිරි දෙනෙතින් කෙරී පැවසීය.
මරණයේ මුවවිටින් ආ අසරුවා
අශ්වයා මෙහෙයවූ ඊතන් බ්‍රවුන් (Ethan Brown) නම් ජොකීවරයාගේ කැපවීමද සුළුපටු නොවේ. මීට වසර තුනකට පෙර තරග බිමේ සිදු වූ දරුණු අනතුරකින් මරණයේ මුවවිටට ගිය ඔහු, බියෙන් තරග දිවිය අතහැර දැමීමට සිතූ අයෙකි.
යළිත් පුහුණුකරුගේ ඇරයුමෙන් පිටියට පැමිණි ඔහු, මෙම තරගයේ නියමිත කිලෝග්‍රෑම් 53ක බර පවත්වා ගැනීම සඳහා සති ගණනාවක් දැඩි දුෂ්කරතාවලට මුහුණ දුන්නේය.
"මේක හැම ජොකී කෙනෙකුගේම සිහිනයක්. මගේ ජීවිතේ අනතුරට ලක්වුණාම ක්‍රීඩාව අත්හරින්න හැදුවා. ඒත් මට කරන්න පුළුවන් හොඳම දේ මේක කියලා මම තේරුම් ගත්තා," යැයි ජයග්‍රහණයෙන් පසු ඊතන් පැවසීය.
වැඩිදුර තොරතුරු ඇතුළත් විශ්වාසනීය මූලාශ්‍ර සබැඳි :
The Telegraph - Horse sold by the King wins Melbourne Cup
Racing.com - Melbourne Cup Official Coverage and Replay Highlights