අවුරුදු තිස් දෙකක් වයසැති හන් සේ-හී (Han Se-hee) නිවසට ගොඩවන්නේ වෙහෙසකර රැකියා මුරයකින් පසුවය. ඇගේ සැමියා ඇයට වඩා සිව් වසරකින් බාල තරුණයෙකි. එහෙත් නිවසේ කටයුතු පිළිවෙළට තබාගැනීම, උයන පිහින කටයුතු සහ මානසිකව ඇයට ශක්තියක් වීම අතින් ඔහු වඩාත් පරිණත බව ඇය පවසන්නීය.
දකුණු කොරියානු සාම්ප්‍රදායික පීතෘමූලික සමාජ රාමුව තුළ මීට දශක කිහිපයකට පෙර මෙවැනි යුගලයක් දැකීම අතිශය දුර්ලභ දසුනක් විය. එහෙත් අද තත්ත්වය මුළුමනින්ම කණපිට පෙරළී හමාරය.
විවාහ පහෙන් එකක මනාලිය වැඩිමල්
දකුණු කොරියානු සංඛ්‍යාලේඛන කාර්යාංශය නිකුත් කළ නවතම වාර්තාවලට අනුව, 2025 වසරේ එරට ලියාපදිංචි කළ මුල් විවාහයන් අතුරින් 20.2%කම මනාලිය මනාලයාට වඩා වයසින් වැඩි බව සටහන්ව තිබේ. මෙය එරට ඉතිහාසයේ එම ප්‍රතිශතය සියයට විස්ස ඉක්මවා ගිය ප්‍රථම අවස්ථාවයි.
පසුගිය වසරේ එරට සිදු වූ සමස්ත මුල් විවාහ 198,500න් 40,000කට ආසන්න ප්‍රමාණයක් අයත් වූයේ මෙම කාණ්ඩයටයි.
පරම්පරා ගණනාවක් පුරා කොරියානු විවාහ වෙළෙඳපොළේ ආධිපත්‍යය දැරුවේ වයසින් වැඩි පිරිමින්ය. වයසින් මුහුකුරා යෑම යනු ස්ථාවර වෘත්තියක් සහ ආර්ථික ශක්තියක් පැවතීම ලෙස සමාජය අර්ථකථනය කළේය. එහෙත් අද වන විට කාන්තාවන් රැකියා වෙළෙඳපොළ තුළ අත්පත් කරගෙන ඇති ශක්තිමත් ආර්ථික ස්වාධීනත්වය හමුවේ පැරණි මිමි වෙනස් වෙමින් පවතී.
පිරිමියා 'මුදල් සපයන්නා' පමණක් නොවේ
දෙදෙනාම රැකියාවල නියුතු (Dual-income) පවුල් ඒකක බිහිවීමත් සමඟ, පවුලේ එකම ආර්ථික සම්පාදකයා පිරිමියා විය යුතුය යන සාම්ප්‍රදායික මතය වේගයෙන් දියවී යමින් පවතී. 2025 දත්ත අනුව, කොරියාවේ සමස්ත විවාහක පවුල් මිලියන 12.65න් 48.6%ක්ම දෙදෙනාම උපයන පවුල් වේ. විශේෂයෙන් අවුරුදු තිහේ දශකයේ පසුවන පවුල්වල මෙම අගය 63.3%ක් තරම් ඉහළ මට්ටමක පවතී.
ආර්ථික රැකවරණය තනිව සපයාගත හැකි මට්ටමකට කාන්තාව දියුණු වන විට, ඇය සහකරුවෙකුගෙන් අපේක්ෂා කරන්නේ මුදල් පමණක් නොවේ. සුහදශීලී බව, මානසික ගැළපීම, ශාරීරික යෝග්‍යතාව සහ ජීවිතයේ නැවුම් ජවය වැනි මානව ගුණාංග කෙරෙහි ඇය වැඩි බරක් තබයි.
අනෙක් අතට, කාන්තාව මෙන්ම පිරිමියා ද ප්‍රමාද වී විවාහ වන ප්‍රවණතාවක් දකින්නට ලැබේ. 1990 දී පිරිමියෙකුගේ පළමු විවාහයේ සාමාන්‍ය වයස අවුරුදු 27.8ක් වූ අතර එය අද වන විට අවුරුදු 34 දක්වා ඉහළ ගොස් ඇත. කාන්තාවන්ගේ සාමාන්‍ය වයස අවුරුදු 24.8 සිට 31.6 දක්වා ඉහළ ගොස් තිබේ. දෙපාර්ශ්වයම සමාන වෘත්තීය සහ ජීවන අත්දැකීම් සහිත පරිණත මට්ටමක පසුවන විට වයස් පරතරය තවදුරටත් බාධකයක් නොවන බව විවාහ සම්බන්ධීකාරක ආයතන නිරීක්ෂණය කරයි.
ශ්‍රී ලංකාවට සහ දකුණු ආසියාවට ඇති පණිවිඩය
කොරියාවේ සිදුවන මෙම විපර්යාසය හුදෙක් එක් රටකට සීමා වූවක් නොවේ. ශ්‍රී ලංකාව ඇතුළු දකුණු ආසියාතික රටවල ද කාන්තා අධ්‍යාපනය සහ වෘත්තීය සහභාගීත්වය ඉහළ යාමත් සමඟ සාම්ප්‍රදායික විවාහ සංකල්ප ක්‍රමයෙන් ප්‍රශ්න කිරීමට ලක්වෙමින් තිබේ.
විවාහයකදී පිරිමියා අනිවාර්යයෙන්ම වැඩිමහල් විය යුතුය යන සාම්ප්‍රදායික ආකල්පය වෙනුවට, ආර්ථික ස්ථාවරත්වය, ගෞරවය සහ අන්‍යෝන්‍ය සමානාත්මතාවය මත පදනම් වූ සහකරු තේරීම් ඉදිරි සමාජ ප්‍රවණතාවල ප්‍රධාන සාධකය බවට පත්වන ලකුණු මෙයින් මනාව පැහැදිලි වේ.
වැඩිදුර තොරතුරු ඇතුළත් මූලාශ්‍ර