කොංග්‍රස් ජය සහ ධවල මන්දිර ඉලක්කය
නොවැම්බර් මැදවාර මැතිවරණයේදී වොෂින්ටන් බල තුලනය උඩුයටිකුරු කරමින් කොංග්‍රස් මණ්ඩලයේ පාලනය නතු කරගැනීමට ඩෙමොක්‍රටික් පක්ෂය සමත් විය.
හකීම් ජෙෆ්රීස් ප්‍රමුඛ ඩෙමොක්‍රටික් නායකත්වය මේ වන විට ලැබූ ජයග්‍රහණය සමරමින් සිටියද, දෙපාර්ශ්වයේම සැබෑ අවධානය යොමුව ඇත්තේ වසර දෙකකින් එළැඹෙන 2028 ජනාධිපතිවරණ සටන දෙසටයි.
ඩෙමොක්‍රටික් පිලේ ඇතුළාන්ත මතගැටුම
ඩිමොක්‍රටික් පක්ෂය වෙනුවෙන් මෙවර පෙරමුණ ගත් තනි අපේක්ෂකයෙකු දක්නට නොමැති අතර, ප්‍රධාන පෙළේ දේශපාලනඥයින් තිහකට අධික පිරිසක් තරග බිමට පිවිසීමේ මූලික සාකච්ඡා අරඹා ඇති බව දේශපාලන ක්‍රමෝපායඥ ඩග් සොස්නික් පෙන්වා දෙයි.
පක්ෂය ඉදිරියේදී ගමන් කළ යුත්තේ මධ්‍යස්ථ මාවතේද නැතහොත් වාමාංශික ප්‍රගතිශීලී ප්‍රතිපත්ති මතද යන්න පිළිබඳ අභ්‍යන්තර විවාදය යළි කරලියට පැමිණ තිබේ.
අමෙරිකානු සෙනෙට් මණ්ඩලයට තේරී පත් වූ ප්‍රථම මුස්ලිම් ජාතිකයා බවට පත්වෙමින් මිචිගන් ප්‍රාන්තය ජයගත් අබ්දුල් එල්-සයිඩ් ප්‍රමුඛ ප්‍රගතිශීලී පිල මෙම ජයග්‍රහණයෙන් දැඩි පන්නරයක් ලබා සිටියි.
හිටපු උප ජනාධිපතිනි කමලා හැරිස්, කැලිෆෝනියා ආණ්ඩුකාර ගැවින් නිව්සම්, පීට් බුටිජෙජ් සහ ඇලෙක්සැන්ඩ්‍රියා ඔකාසියෝ-කෝර්ටේස් ආදී ප්‍රබල චරිත මේ වන විටත් ප්‍රාන්ත මට්ටමින් ඡන්දදායකයින් හා ව්‍යාපාරික පරිත්‍යාගශීලීන් සමඟ සාකච්ඡා අරඹා ඇති බව වාර්තා වේ.
රිපබ්ලිකන් කඳවුරේ ට්‍රම්ප් සෙවණැල්ල
ව්‍යවස්ථාපිත නීති අනුව ජනාධිපති ඩොනල්ඩ් ට්‍රම්ප්ට තෙවන ධුර කාලයක් සඳහා තරග කළ නොහැකිය. රිපබ්ලිකන් පක්ෂයේ ඉදිරි අපේක්ෂකත්වය වෙනුවෙන් උප ජනාධිපති ජේ.ඩී. වෑන්ස් සහ රාජ්‍ය ලේකම් මාර්කෝ රූබියෝගේ නම් ප්‍රමුඛව සාකච්ඡා වුවද, ඔවුන් දෙදෙනාම තවමත් ඒ පිළිබඳ නිල ප්‍රකාශ සිදු කර නැත.
ආර්ථික පීඩනය සහ ඉරාන යුද ගැටුම් හමුවේ පාලක රිපබ්ලිකන් පක්ෂය කෙරෙහි මැදවාර ඡන්දයේදී එල්ල වූ ජනතා අප්‍රසාදය කළමනාකරණය කරගැනීම ඉදිරි අපේක්ෂකයින්ට බරපතල අභියෝගයකි.
විශේෂයෙන්ම ට්‍රම්ප්ගේ ‘MAGA’ පාක්ෂික පදනම රඳවාගනිමින්, මැදවාරයේදී පක්ෂයෙන් ඈත්වූ තරුණ හා සුළුතර ඡන්දදායකයින් යළි දිනාගැනීමේ උභතෝකෝටිකයකට රිපබ්ලිකන් පක්ෂය මුහුණ දී සිටියි.
වැඩිදුර තොරතුරු සහ මූලාශ්‍ර සබැඳිය :
Reuters: Midterms over, Democrats plunge into wide-open 2028 presidential race