සුඛෝපභෝගී මෝටර් රථයකින් මෙම පරවියන් ප්‍රවාහනය කළ මධුරෙයි ප්‍රදේශයේ පදිංචි පුද්ගලයන් දෙදෙනෙකුද මෙහිදී කොටු වී ඇත.
රාමනාදපුරම්, මණ්ඩපම් සහ තලෙයිමන්නාරම් මුහුදු තීරය ඔස්සේ කංසා, මත්ද්‍රව්‍ය, කේරළ ගංජා, මුහුදු කූඩැල්ලන් මෙන්ම ලංකාවේ සිට රත්තරන් සහ රිදී ජාවාරම් සිදුවීම සාමාන්‍ය ප්‍රවෘත්තියක් වුවද, ඉන්දියාවේ සිට ශ්‍රී ලංකාවට මෙලෙස සංවිධානාත්මකව රේස් පරවියන් ප්‍රවාහනය කිරීමට තැත් කර හසු වූ පළමු අවස්ථාව මෙයයි.
ලංකාවේ මෑතකාලීනව බෙහෙවින් ජනප්‍රිය වෙමින් පවතින මිල අධික පරවි තරඟ (Pigeon Racing) සහ අභිජනන කටයුතු ඉලක්ක කර ගනිමින් මෙම ජාවාරම සිදුවන්නට ඇති බව බුද්ධි අංශ සැක කරයි.
වැටලීම සහ පලාගිය මෙරට ඩෙංගි බෝට්ටුව
රහසිගත ඔත්තුව:
පාම්බන් වෙරළ තීරයෙන් සාම්ප්‍රදායික ධීවර බෝට්ටුවක් මාර්ගයෙන් ලංකාවට පරවියන් තොගයක් පටවන බවට රාමනාදපුරම් Q ශාඛාවේ පරීක්ෂක ජීවමණි වෙත රහසිගත තොරතුරක් ලැබී තිබුණි.
සැකකටයුතු රථය:
ඒ අනුව ක්‍රියාත්මක වූ නිලධාරීන් පාම්බන් පාලම අසල රැකසිටි අතර, අලුයම් කාලයේදී අධික වේලාවක් පාලම මත නවතා තිබූ මෝටර් රථයක් පරික්ෂාවට ලක් කර ඇත. එහි සිටි පුද්ගලයන්ගේ ප්‍රකාශ එකිනෙකට පටහැනි වීම නිසා රථය සෝදිසි කිරීමේදී, විශේෂ යකඩ කූඩු 6ක් තුළ සඟවා සිටි පරවියන් 120 දෙනා සොයාගෙන තිබේ.
බෝට්ටුව පලා යයි:
පොලිස් කණ්ඩායම් වෙරළට ළඟා වන විට, පරවි තොගය රැගෙන යාමට පැමිණ තිබූ මෙරට බෝට්ටුවක් ක්ෂණිකව ගැඹුරු මුහුද දෙසට පලා ගොස් ඇති අතර, නාවික පොලිසිය (Marine Police) සහාය ඇතිව එම බෝට්ටුව සෙවීමේ මෙහෙයුම් ක්‍රියාත්මකයි.
අත්අඩංගුවට පත් වූයේ මධුරෙයි, සෝලවන්දාන් ප්‍රදේශයේ පදිංචි නවාබ් ෂෙරිෆ් (22) සහ කාමරාජපුරම්හි කුමරේසන් (39) යන අයයි. ඔවුන් පරවියන් ලංකාවට යැවීම සඳහා මධුරෙයි සිට රැගෙන ආ බව පිළිගෙන ඇති අතර, වැඩිදුර විමර්ශන සඳහා ඔවුන් රාමේෂ්වරම් රේගු කාර්යාලය වෙත භාර දී ඇත.
මේ පරවියන් මෙච්චර වටින්නේ ඇයි ?
ජාත්‍යන්තර මට්ටමේ හොඳ රුධිර පරම්පරාවක් (Bloodlines) තියෙන එක රේසිං පරවියෙක් ලංකාවේ වගේම ඉන්දියාවේ මුදලින් රුපියල් ලක්ෂ ගණනක්, සමහර විට මිලියන ගණනක් දක්වා මිල අධික වේ.
ක්‍රීඩාවේ ජනප්‍රියත්වය:
ශ්‍රී ලංකාව තුළ වර්තමානයේ පරවි තරඟ (Pigeon Racing) ක්‍රීඩාව ඉතාම වේගයෙන් ව්‍යාප්ත වෙමින් පවති. කිලෝමීටර් සිය ගණනක් දුර ගුවන් ගත කර, තමන්ගේ නිවසට වේගයෙන්ම පැමිණෙන පරවියා තෝරන මේ තරඟ සඳහා ලොකු මුදල් තෑගි වගේම ඔට්ටු තැබීම් ද සිදුවේ.
නීතිමය බාධා:
විදේශ රටකින් සතෙක් නීත්‍යානුකූලව ගෙන්වීමේදී දැඩි නිරෝධායන නීති (Quarantine regulations) සහ ඉහළ රේගු බදු ගෙවන්න සිදුවේ. ජාවාරම්කරුවන් මේ මිල අධික සතුන් මුහුදු මාර්ගයෙන් පන්නන්න උත්සාහ කරන්නේ ඒ බදු සහ නීති මඟහැර, ලංකාවේ කළු කඩයට ඉහළ මිලකට විකිණීමටය.
සතුන් නීතිවිරෝධී ලෙස රටින් රටට ප්‍රවාහනය කිරීම (Animal Smuggling) හරහා කුරුළු උණ වැනි දරුණු වෛරස් රෝග නිරෝධායන පරීක්ෂාවකින් තොරව රට තුළට ඇතුළු වීමේ බරපතළ අවදානමක් පවති.
(මුල් සටහන | ෆාරුක් සිහාන්)
Journalist-මාධ්‍යවේදී
FAROOK SIHAN(SSHASSAN)
sihanfarook@yahoo.com
