1984 සිට 2013 දක්වා වාම දේශපාලනයේ සහ මාධ්‍ය ක්ෂේත්‍රයේ පාවාදීම් නම ගම් සහිතව හෙට (07) එළිදකී
"වරලත් මාධ්‍ය ආයතන නෙවෙයි, මාධ්‍යවේදීන්ට අවශ්‍ය සාධාරණ වැටුප් සහ වෘත්තීය ආරක්ෂාවයි"
ශ්‍රී ලංකා වෘත්තීය පත්‍රකලාවේදීන්ගේ සංගමයේ හිටපු සභාපති සහ නව සම සමාජ පක්ෂයේ (NSSP) හිටපු දේශපාලන මණ්ඩල සාමාජිකයෙකු වන ජ්‍යෙෂ්ඨ මාධ්‍යවේදී ඥානසිරි කොත්තිගොඩ විසින් රචිත "නව සම සමාජ පක්ෂයේ මුල මැද අග සහ මම" කෘතිය හෙට (07) දින පස්වරු 3:00 ට කොළඹ ජාතික පුස්තකාල හා ප්‍රලේඛන සේවා මණ්ඩල ශ්‍රවණාගාරයේදී දොරට වැඩීමට නියමිතය.
වසර 29ක් පුරා වාමාංශික දේශපාලනයේ පූර්ණකාලීනයෙකු ලෙස මෙන්ම මාධ්‍ය ක්‍රියාකාරිකයෙකු ලෙස තමන් ලැබූ අත්දැකීම්, පාවාදීම් සහ යුද සමයේ එල්ල වූ දරුණු රාජ්‍ය මර්දනය පිළිබඳව කතුවරයා 'Insidevoice' යූටියුබ් නාලිකාව සමඟ විශේෂ සංවාදයකට එක්වෙමින් කරුණු රැසක් හෙළි කර තිබේ.
යුද සමයේ මර්දනය, පාවාදීම් සහ සරණාගත ජීවිතය
2005 වසරෙන් පසු මෙරට පැවති දරුණු යුද වාතාවරණය තුළ සාමය වෙනුවෙන් පෙනී සිටීම නිසා මහින්ද රාජපක්ෂ පාලනය (ITN විමසුම) සහ ජනතා විමුක්ති පෙරමුණ (JVP) ඇතුළු පාර්ශව තමන්ව "කොටියෙක්" සහ "දේශද්‍රෝහියෙක්" ලෙස හංවඩු ගසමින් දරුණු මාධ්‍ය ප්‍රහාර එල්ල කළ බව කොත්තිගොඩ පවසයි.
BBC සේවයෙන් ඉවත් කිරීම:
පැවති දැඩි ජීවිත තර්ජන හමුවේ තමන් සේවය කළ බී.බී.සී. (BBC) සංදේශය සිංහල සේවය පවා තමන්ගේ ආරක්ෂාව තහවුරු කළ නොහැකි බව පවසමින් රැකියාවෙන් ඉවත් කිරීමට කටයුතු කළ බව හෙතෙම අනාවරණය කරයි.
ස්විට්සර්ලන්තයට පලායාම:
එල්ල වූ පැහැරගැනීමේ උත්සාහයන් හේතුවෙන් ස්විට්සර්ලන්ත තානාපති කාර්යාලයේ මැදිහත්වීම මත 2012 දෙසැම්බර් 31 දින ලංකාවෙන් පිටව ගොස් එරට සරණාගතයෙකු වීමට ඔහුට සිදු විය. ඔහු මෙරටට නැවත පැමිණ ඇත්තේ වසර 14ක පිටුවහල් ජීවිතයකින් පසුවය.
වත්මන් රජය, වමේ දේශපාලනය සහ මාධ්‍ය ව්‍යුහය
එදා තමන් පමණක් සැබෑ වාමාංශිකයන් යැයි පැවසු ජනතා විමුක්ති පෙරමුණ (වත්මන් මාලිමා රජය) අද බලය ලබාගෙන ක්‍රියාත්මක කරන්නේ ලෝක බැංකුවේ සහ ජාත්‍යන්තර මූල්‍ය අරමුදලේ (IMF) ධනපති වට්ටෝරුවම බව කතුවරයා විවේචනය කරයි.
රාජ්‍ය අපරාධ සෙවීම:
උතුරේ සහ දකුණේ සිදු වූ යුද අපරාධ මෙන්ම මාධ්‍යවේදීන් ඝාතනය කිරීම් වැනි දරුණු රාජ්‍ය අපරාධ පිළිබඳව නිසි පරීක්ෂණ කර යුක්තිය ඉටු කිරීමට වත්මන් පාලනයට නොහැකි වනු ඇතැයි ඔහු සැක පළ කරයි.
සුළු ධනේශ්වර චින්තනය:
මාධ්‍ය ක්ෂේත්‍රයේ සිටින බහුතරයක් පොදු වෘත්තීය සමිති ව්‍යාපාරයකට එකතු වීමට වඩා පෞද්ගලික ලාභ ප්‍රයෝජන තකා ලොක්කන්ට ගැති වීම (සුළු ධනේශ්වර චින්තනය) නිසා ඔවුන්ගේ අයිතිවාසිකම් දිනා ගැනීමට අපොහොසත් වී ඇති බව පෙන්වා දෙන හෙතෙම, රජය ගෙන එන "වරලත් මාධ්‍ය ආයතන" වෙනුවට මාධ්‍යවේදීන්ට නිදහස, සාධාරණ වැටුප් සහ වෘත්තීය ආරක්ෂාව දීම අත්‍යවශ්‍ය බව අවධාරණය කරයි.
හෙට (07) පැවැත්වෙන කෘතිය දොරට වැඩීමේ උත්සවය
න්‍යායාත්මක කරුණුවලින් තොරව 1984 සිට 2013 දක්වා ලංකාවේ වාම දේශපාලනයේ සහ මාධ්‍ය ක්ෂේත්‍රයේ අභ්‍යන්තර හැලහැප්පීම් නම ගම් සහිතව සැබෑ සිදුවීම් හරහා විග්‍රහ කෙරෙන මෙම උත්සවයේදී ප්‍රමුඛ පෙළේ විද්වතුන් රැසක් විශේෂ දේශන පැවැත්වීමට නියමිතය.
- මහාචාර්ය ජයදේව උයන්ගොඩ: ජාතික ප්‍රශ්නයට ස්වයං තීරණ අයිතිය ලංකාවට වලංගු නැද්ද?
- රණත් කුමාරසිංහ: වමේ දේශපාලන පක්ෂවල බෙදීම්, බිඳීයෑම් උපන්ගෙයි සන්නියක්ද?
- රෝහිත භාෂණ අබේවර්ධන (Zoom): "නව සම සමාජ පක්ෂයේ මුල මැද අග සහ මම" කෘතිය පිළිබඳව
- අනූප නන්දුල: ලංකාවේ කම්කරු පංතිය දුර්වල වුණේ රාජ්‍ය පාලනයට යෑමද? ජාතිවාදයට යටවීමද?
