දෙවැනි අදියරේ කැනීම් කටයුතු සිදු කළ 34 වැනි දිනය වු අගෝස්තු 26 වැනි අගහරුවාදා හවස් යාමය වන විට චෙම්මනි සිත්තුපාත්ති සමූහ සුසානයෙන් තවත් පුද්ගලයන් 16 දෙනකුට අයත් අස්ථි අලුතින් මතු කරගත් බව වින්දිතයන් වෙනුවෙන් පෙනී සිටින නීතිඥ රනිතා ඥානරාජා පවසයි. ඒ අතර කුඩා දරුවන් කිහිප දෙනකුගේ බවට සැක කළ හැකි අස්ථිද එහි ගිය මාධ්‍යවේදීන් දැක තිබේ. ඒ බව සැකහැර දැනගත හැකිවන්නේ වෝහාරික පරීක්ෂණයකින් පසු බව නීතිඥ ඥානරාජා පවසන්නීය.
එක් දිනකදී චෙම්මනි සමූහ සුසානයෙන් වැඩිම සිරුරු ගණනක් පාදාගෙන ඇත්තේ ඊයේ දිනයේය.
චෙම්මනි සමුහ සුසාන සංකීර්ණයෙන් මේ වන විට කුඩා දරුවන්ගේ ඇතුළු පුද්ගලයන් 166 දෙනකුට අයත් ඇටසැකිලි මතු කරගෙන තිබේ.
දෙවැනි අදියරේ කැනීම් කටයුතු දින 32 ක් පුරා සිදු කිරීමෙන් පසු කැනීම් කාර්ය මණ්ඩලයට විවේකයක් ලබා දීම සදහා අගෝස්තු 06 වැනිදා සිට විමර්ශන කටයුතු තාවකාලිකව නතර කරන විට චෙම්මනි සිත්තුපාත්ති සමූහ සුසානයේ කරන ලද කැනීම්වලින් කුඩා දරුවන්ගේ ඇතුළු පුද්ගලයන් 150 දෙනෙකුට අයත් ඇටසැකිලි ගොඩ ගෙන අධිකරණයට බාර දී තිබු තිබුනි.
සමූහ සුසාන සංකිර්ණයේ කැනීම් කටයුතු දින දහ අටක විවේකයෙන් පසු අගෝස්තු 25 වැනිදා යළි ආරම්භ කළ අතර එදින සිදු කර තිබුනේ කැනීම් භුමියේ වපසරිය පුළුල් කිරීමයි.
ශ්‍රී ලංකාවෙන් මේ තාක් හමු වු විශාලතම සමුහ සුසානය ලෙස සැලකෙන්නේ බාල දරුවන් 28ක ඇතුළු මිනිස් සිරුරු කොටස් 376 ක් සොයාගත් මන්නාරම සතොස සමුහ මිනී වලයි.
*2013 වසරේ දී මාතලේ රෝහල ආසන්නයේ භූමියකින් මළසිරුරු 155 ක් ගොඩගන්නා ලද අතර එය ශ්‍රී ලංකාවෙන් හමුවු තෙවැනියට විශාලතම සමුහ සුසානය ලෙස සැලකේ.
* ශ්‍රී ලංකාවේ සිව්වැනියට විශාලතම සමුහ සුසානය ලෙස සැලකෙන්නේ මේ වන විට විට අවම වශයෙන් පුද්ගලයන් 88 දෙනකුට අයත් අස්ථි මතු කරගෙන ඇති කොළඹ වරාය හමුහ මිනි වළයි. එහි කැනීම් කටයුතු තවමත් සම්පුර්ණයෙන්ම අවසන් කර නැත.
* පස්වැනියට විශාලතම සමුහ සුසානය ලෙස දැන් පිලිගැනෙන්නේ 2013 වසරේදීම මිනිස් සිරුරු 82 ක අස්ථි කොටස් ගොඩ ගත් මන්නාරම, තිරුකේතීස්වරම් සමූහ මිනී වලයි. කොක්කුතොඩුවායි සමුහ සුසානයෙන් කැනීම් කටයුතු අවසන් වන විට පුද්ගලයන් 52 දෙනකුට අයත් අස්ථි කොටස් ගොඩ ගෙන තිබුනි.
මේ සියළු සමුහ සුසාන හමුව තිබුනේ අහම්බයෙන් මිස රජයේ විමර්ශනවලින් නොවේ.
