විදුලි බලාගාරයේ ප්‍රධාන දුර්වලකමක් වූයේ රට පුරා විදුලිය බිඳ වැටීමකදී බලාගාරයේ සිසිලන පද්ධතියට සහ බොයිලර් පෝෂක ජල සැපයුම් පද්ධතියට ආධාරක විදුලි සැපයුම අකර්මන්‍යය වීම යි; එවැනි තත්වයක දී සිසිලනය සඳහා දින හතරක හෝ පහක කාලයක් මෙහෙයුම් කටයුතු අත්හිටුවීමට සිදු වීමයි. එ'නිසා සැලකිය යුතු මූල්‍ය අලාභයක් ද සිදු වේ.
මෙම තත්ත්වය වළක්වා ගැනීම සඳහා බලශක්ති අමාත්‍යවරයා ගේ උපදෙස් අනුව තාක්ෂණික වශයෙන් යෝග්‍ය විසඳුමක් සොයා බැලීම පිණිස කමිටුවක් පත්කළ අතර එකී කමිටුව විසින් අත්‍යවශ්‍යය පද්ධති සඳහා කෙටි කාලයක් තුළ ක්‍රියාත්මක කළ හැකි සහ නොකඩවා ක්‍රියාත්මක වන ආධාරක උප විදුලිබල සැපයුමක් හඳුන්වාදීම සුදුසු බව යෝජනා කරන ලදී.
ඒ අනුව ලංකා විදුලිබල මණ්ඩලයේ අරමුදල් යොදා ගනිමින් ධාරිත්‍රික සිසිලන පද්ධතිය සහ බොයිලර් පෝෂක ජල සැපයුම් පද්ධතිය සඳහා ආධාරක විදුලිබල සැපයුමක් ක්‍රියාවට නැංවීමේ ව්‍යාපෘතියක් ක්‍රියාත්මක කිරීම පිණිස බලශක්ති අමාත්‍ය ඉංජිනේරු කුමාර ජයකොඩි ඉදිරිපත් කළ යෝජනාව කැබිනට් මණ්ඩලය අනුමත කර ඇත.
තව ද පසුගිය 2025-08-21 දින පාර්ලිමේන්තුවේදී පැන නැඟුණු ප්‍රශ්නයකට පිළිතුරු දෙමින් ජාතික විදුලිබල පද්ධතියේ ස්ථායිතාවය පවත්නාගෙන යාම සඳහා ගතයුතු අත්‍යවශ්‍ය පියවරක් ලෙස අමාත්‍යවරයා මෙම කරුණද ඉදිරිපත් කළ බව සඳහන් කළ යුතු ය.
(සටහන | ශාන් මොහොමඩ්)
