පෞද්ගලික බස් රථ සමග ඒකාබද්ධ කාලසටහනකට අනුව ධාවනය කිරීමට ගෙන ඇති තීරණයට විරෝධය පළ කරමින් සහ තවත් ඉල්ලීම් කිහිපයක් හේතුවෙන් මෙම වර්ජනය ආරම්භ කළ බව ලංගම සමගි සේවක සංගමයේ සභාපති නිරෝෂන් සම්පත් ප්‍රේමරත්න පැවසුවේය.
එම වර්ජනයට හේතු වූ කරුණු සම්බන්ධයෙන් ඔහු 'නෙත් නිව්ස්' වෙත මෙලෙස අදහස් දැක්විය.
හඳුන්වා දී ඇති ඒකාබද්ධ කාලසටහන සම්බන්ධයෙන් ගැටලු රැසක් පවතින බව ලංකා පෞද්ගලික බස්රථ හිමියන්ගේ සංගමයේ සභාපති ගැමුණු විජේරත්න ද සඳහන් කළේය.
කෙසේවෙතත් සියලු පාර්ශවයන්ගේ අදහස් මත ඒකාබද්ධ කාලසටහන සකස් කිරීමේ කටයුතු සිදුකළ බව ජාතික ගමනා ගමන කොමිෂන් සභාවේ සභාපති පී.ඒ චන්ද්‍රපාල පැවසුවේය.
ලංගම පෞද්ගලික ඒකාබද්ධ බස් ධාවන කාල සටහන සම්බන්ධයෙන් එල්ල වූ චෝදනාවලට ඔහු 'නෙත් නිව්ස්' වෙත මෙසේ පිළිතුරු ලබාදුන්නේ ය.
වෘත්තීය සමිති විසින් සිදුකරන ඉල්ලීම් බහුතරයක් මේ වන විටත් ලබා දී අවසන් බැවින් මෙම වර්ජනය අසාධාරණ බව ප්‍රවාහන නියෝජ්‍ය අමාත්‍ය ප්‍රසන්න කුමාර ගුණසේන පැවසුවේය.
ලංකා ගමනා ගමන මණ්ඩලයේ වෘත්තීය සමිති කිහිපයක් වැඩ වර්ජනයක් ආරම්භ කළ ද ලංගම බස් ධාවනය අද දිනයේ සාමාන්‍ය පරිදි ක්‍රියාත්මක කිරීමට අවශ්‍ය පියවර ගන්නා බව ද ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන කියා සිටියේ ය.
ඒකාබද්ධ කාලසටහන කඩාකප්පල් කිරීම සඳහා ඉල්ලා සිටින කිසිදු ඉල්ලීමකට හෝ සාකච්ඡාවකට එකඟ නොවන බවද ප්‍රවාහන නියෝජ්‍ය අමාත්‍ය වෛද්‍ය ප්‍රසන්න ගුණසේන වැඩිදුරටත් සඳහන් කළේය.
වර්ජනය ක්‍රියාත්මක කරන බවට ලංකා ගමනා ගමන මණ්ඩලයට අයත් වෘත්තීය සමිති ප්‍රකාශ කළ ද ඊයේ මධ්‍යම රාත්‍රී සිට කොළඹ මධ්‍යම බස් නැවතුම්පොළෙන් ධාවන කටයුතු ආරම්භ කරන බස් රථ සාමාන්‍ය පරිදි ගමන් ආරම්භ කළ බව වාර්තාකරුවන් සඳහන් කළේය.
එහිදී ලංකා ගමනා ගමන මණ්ඩලයට අයත් රියදුරෙකු සඳහන් කළේ, කිසිදු ගැටලුවකින් තොරව අද දිනයේ බස් රථ ධාවනය කිරීමට කටයුතු යොදා ඇති බවය.
