'හොලිවුඩ් සිනමාවෙන් මාලිමා ආණ්ඩුව අල්ලන ඇමරිකාවේ නිදහස් දින රාජ්‍ය තාන්ත්‍රික මෙහෙයුම!'

ජාතික ජන බලවේග (NPP) රජය සමඟ පවතින සබඳතා තවදුරටත් පුළුල් කිරීමට වොෂින්ටනයේ සෘජු කැමැත්ත

ප්‍රධාන ආරාධිතයා ලෙස සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස කොළඹ ඇමරිකානු තානාපති කාර්යාලයට පැමිණෙයි


ඇමරිකා එක්සත් ජනපදයේ 250 වැනි අභිමානවත් නිදහස් දින සංවත්සරය (Freedom 250) නිමිත්තෙන් කොළඹ පිහිටි ඇමරිකානු තානාපති කාර්යාලය විසින් සංවිධානය කරන ලද සුවිශේෂී රාජ්‍ය තාන්ත්‍රික සැමරුම් උත්සවයකදී, ශ්‍රී ලංකාවේ වත්මන් ජාතික ජන බලවේග (NPP) රජය සමඟ පවතින ද්විපාර්ශ්වික සබඳතා සහ ප්‍රජාතන්ත්‍රවාදී වටිනාකම් තවදුරටත් ශක්තිමත් කිරීමට ඇමරිකාව පියවර ගෙන තිබේ.

"ඇමරිකානු සිනමාව" (American Cinema) තේමාව කරගනිමින් තානාපති කාර්යාල පරිශ්‍රයේ පැවැති මෙම උත්සවයේ ප්‍රධාන ආරාධිත අමුත්තා ලෙස සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස සහභාගී වූ අතර, ජ්‍යෙෂ්ඨ රාජ්‍ය නිලධාරීන්, රාජ්‍ය තාන්ත්‍රිකයන් සහ ව්‍යාපාරික ප්‍රජාවේ නියෝජිතයන් රැසක් ඊට එක්ව සිටියහ.

හොලිවුඩ් ඉතිහාසය සහ ලංකාවේ සිනමා සබැඳියාව

ඇමරිකානු භාරකාර නිලධාරිනී (Chargé d'Affaires) ජේන් හවෙල් (Jayne Howell) මෙහිදී ප්‍රකාශ කළේ, අදහස් ප්‍රකාශ කිරීමේ නිදහස, නිර්මාණශීලිත්වය සහ නවෝත්පාදනය මත ගොඩනැඟුණු සිනමාව යනු ලෝකයට ඇමරිකාව දුන් විශාලතම දායකත්වයක් බවයි.

ලංකාවේ හොලිවුඩ් සලකුණ:
ලෝක සිනමා ඉතිහාසයේ සුවිශේෂී සන්ධිස්ථානයක් සනිටුහන් කළ "The Bridge on the River Kwai" චිත්‍රපටය ලංකාව තුළ රූගත කිරීම හරහා හොලිවුඩය සහ ශ්‍රී ලංකාව අතර අතීතයේ සිටම නොබිඳුණු සංස්කෘතික සබැඳියාවක් නිර්මාණය වී ඇති බව ඇය සිහිපත් කළාය.

සිනමාවේ විකාශනය:
1896 වසරේ නිව් ඕර්ලියන්ස් හි ලොව ප්‍රථම සිනමා ශාලාව ආරම්භ වීමේ සිට Snow White, The Matrix, The Dark Knight, Avatar, Star Wars සහ Jurassic Park වැනි සිනමා කෘති හරහා මානව ඔරොත්තු දීමේ හැකියාව, එකමුතුකම සහ බලාපොරොත්තුව ලොව පුරා ප්‍රසිද්ධ කළ ආකාරය මෙහිදී ඇගයීමට ලක් විය.

විවෘත සිනමා අත්දැකීම සහ රාජ්‍ය තාන්ත්‍රික සබඳතා

මෙම නිදහස් දින සැමරුම හුදු ජාතික සංවත්සරයකට එහා යමින් දෙරට අතර පවතින ආර්ථික සහ සාමාජයීය හවුල්කාරිත්වය ප්‍රදර්ශනය කෙරෙන අවස්ථාවක් බව තානාපති කාර්යාලය අවධාරණය කරයි.

ඩිජිටල් තාක්ෂණික සංදර්ශන:
නිශ්ශබ්ද සිනමාවේ සිට නවීන ඩිජිටල් සිනමාව දක්වා පරිණාමය සහ සිනමා ක්ෂේත්‍රයේ සිදු වූ තාක්ෂණික විප්ලවයන් විදහා දැක්වෙන සුවිශේෂී විවෘත කලාපීය සිනමා දර්ශන (Open-air film presentation) සහ දෘශ්‍ය සංදර්ශන මෙහිදී අමුත්තන්ට ප්‍රදර්ශනය කෙරුණි.

සංගීතය සහ ඇමරිකානු නිෂ්පාදන:
"III Marine Expeditionary Force" හමුදා තූර්ය වාදක කණ්ඩායම විසින් ඉදිරිපත් කළ සුප්‍රසිද්ධ ඇමරිකානු සංගීත නිර්මාණ සහ කොළඹ අහස සිසාරා ගිය ආකර්ෂණීය ගිනිකෙළි සංදර්ශනයකින් උත්සවය වර්ණවත් විය. මීට අමතරව ඇමරිකානු ආහාර සහ කෘෂිකාර්මික නිෂ්පාදන ද මෙහිදී හඳුන්වා දී තිබේ.

අනාගත සහයෝගීතාව:
වත්මන් මාලිමා රජය ජාත්‍යන්තර හවුල්කරුවන් සමඟ කටයුතු කරන වටපිටාවක, අධ්‍යාපන, වෙළෙඳ, ආයෝජන, ආරක්ෂක, තාක්ෂණික සහ පුද්ගලාන්තර සබඳතා (People-to-people exchanges) පුළුල් කරමින්, අන්‍යෝන්‍ය විශ්වාසය මත පදනම් වූ දිගුකාලීන සහයෝගීතාවක් ශ්‍රී ලංකාව සමඟ පවත්වාගෙන යාම වොෂින්ටනයේ අපේක්ෂාව බව මෙම උත්සවයෙන් පිළිඹිබු වේ.

(සටහන | සම්පත් ධීරසේකර )

මුලාශ්‍රය :

America Marks Historic Milestone While Deepening Sri Lanka Friendship Further