'සර්වජන බලය' නායකයාගෙන් අනතුරු ඇඟවීමක්
ඩොලර් බිලියන 103ක ණය කන්දක් සහ කඩා වැටුණු රුපියල හංගන්න බොරු ආර්ථික ඉලක්ක පෙන්වන ආණ්ඩුවේ පටු උපක්‍රම ගැන හෙළිදරව්වක්
"මැදිරිගිරියේ පාසල් දරුවොත් කුඩුවලට අහුවෙලා" - බෝඩ් ලෑලි සහ මාධ්‍ය සංදර්ශනවලින් මත්ද්‍රව්‍ය උවදුර මර්දනය කළ නොහැකි බවට විවේචනයක්
'දේශපාලන පළිගැනීම්වලින් විතරක් රටක් චූන් කරන්න බෑ'
මීගමුව බන්ධනාගාරය තුළ සිදු වූ බිහිසුණු ලේ වැගිරීම වත්මන් සමාජයේ පවතින සැබෑ ඛේදජනක යථාර්ථය සහ රට තුළ නිර්මාණය වෙමින් පවතින මහා අරාජිකත්වයක ආරම්භක ලකුණක් බව සර්වජන බලයේ නායක, පාර්ලිමේන්තු මන්ත්‍රී ව්‍යවසායක දිලිත් ජයවීර අද (07) පාර්ලිමේන්තුවේදී ප්‍රකාශ කළේය.
මීගමුව බන්ධනාගාර ගැටුම සම්බන්ධයෙන් පැවැති සභාව කල්තැබීමේ විවාදයට එක්වෙමින් ඔහු චෝදනා කළේ, වත්මන් ආණ්ඩුව සිය මුළු ශක්තිය සහ කාලයම පටු දේශපාලන අරමුණු සහ දේශපාලන පළිගැනීම් සඳහා පමණක් වැය කරමින් සිටින බවයි.
නිලධාරීන් 7 දෙනෙකුගේ මරණය සහ සමාජ යථාර්ථය
මීගමුව බන්ධනාගාරය තුළ සිදු වූ සිදුවීම දේශපාලන මඩ ගැසීම් හෝ පටු වාසි සඳහා භාවිත නොකර, එහි පවතින සැබෑ සමාජයීය බරපතළකම වටහා ගත යුතු බව මන්ත්‍රීවරයා පෙන්වා දුන්නේය.
ඉතිහාසයේ නොවූ විනාශයක්:
ලංකා ඉතිහාසය පුරා බන්ධනාගාර කැරලි සහ ගැටුම් රැසක් වාර්තා වී තිබුණ ද, රාජකාරියේ නිරතව සිටි බන්ධනාගාර නිලධාරීන් හත්දෙනෙකු එකම ස්ථානයකදී ඝාතනය වූ පළමු අවස්ථාව මෙය බව දිලිත් ජයවීර සිහිපත් කළේය. 1700 ගණන්වල ජීවත් වූ සමාජ සේවකයෙකු වන ජෝන් හෝඩ්ගේ ප්‍රකාශයක් උපුටා දක්වමින් ඔහු කියා සිටියේ, සිරකඳවුරුවල පවතින තත්ත්වයෙන් නිරූපණය වන්නේ එම රටේ පවතින සමස්ත සමාජයේ සැබෑ බිඳවැටීම බවයි.
'මල් පැල' පාර්ලිමේන්තුවේ ප්‍රවේශය:
වත්මන් පාර්ලිමේන්තුවට උගත් බුද්ධිමත් පිරිසක් පැමිණ ඇති බවට 'මල් පැල' යන වචනයෙන් හැමෝම ආඩම්බරයෙන් කතා කළ ද, රටේ ප්‍රගතිය තීරණය කරන කිසිදු නිර්ණායකයකින් රට ඉදිරියට ගෙන යාමට වත්මන් පාලකයන්ට බුද්ධිමත් හෝ උගත් ප්‍රවේශයක් නොමැති බව ඔහු පැවසීය. බන්ධනාගාරගතව සිටි සියලු දෙනා කුඩුකාරයන් ලෙස හංවඩු නොගසා, රටේ පවතින නීති පද්ධතියේ අඩුපාඩු නිසා එහි ගිය මිනිසුන් ද සිටින බව වටහා ගැනීම යුක්තිගරුක බව හෙතෙම සඳහන් කළේය.
ඩොලර් බිලියන 103ක ණය කන්ද සහ ව්‍යාජ ආර්ථික අංක
ආණ්ඩුව සංදර්ශන පවත්වමින් රට ඉදිරියට යන බව පැවසුව ද, රටේ පවතින සැබෑ මූල්‍ය සහ ආර්ථික අර්බුදය ජනතාවගෙන් වසන් කරමින් සිටින බව දිලිත් ජයවීර අනාවරණය කළේය.
ණය බර සහ වෙළඳ ශේෂය:
මේ වන විට ශ්‍රී ලංකාව ගෙවීමට ඇති සමස්ත විදේශීය ණය ප්‍රමාණය ඩොලර් බිලියන 103ක් දක්වා ඉහළ ගොස් ඇත. එමෙන්ම රටේ වෙළඳ ශේෂය (Trade Balance) පසුගිය වසරේ පැවැති ඩොලර් බිලියන 2.5 සිට මේ වන විට බිලියන 4.7 දක්වා අහිතකර ලෙස ඉහළ ගොස් තිබේ.
රුපියල කඩාවැටීම සහ ආර්ථික ප්‍රසාරණය:
රට තුළ අලුතෙන් ධනයක් නිර්මාණය වන, අපනයන හෝ රැකියා උත්පාදනය වන කිසිදු නව කර්මාන්ත ශාලාවක් හෝ ගොඩනැගිල්ලක් ඉදිවන්නේ නැත. රුපියල ශක්තිමත් කරගැනීමට අපොහොසත් වීම නිසා සමස්ත අපනයන සහ ව්‍යාපාරික ක්ෂේත්‍රයම බිඳ වැටී ඇති පසුබිමක, ආණ්ඩුව කවුරුන් හෝ ලබාදුන් ව්‍යාජ ආර්ථික අංක කිහිපයක් පෙන්වමින් ජනතාව මුලා කරන බව මන්ත්‍රීවරයා පැවසීය.
"දේශපාලන පළිගැනීම්වලින් විතරක් රටක් කරන්න බෑ"
ආණ්ඩුවේ එකම කාර්යය වී ඇත්තේ දිනපතා ප්‍රවෘත්ති මවමින්, කතන්දර හදමින් සහ දේශපාලන පළිගැනීම් පෙන්වමින් ජනතාව තාවකාලිකව 'චූන්' කිරීම පමණක් බව දිලිත් ජයවීර චෝදනා කළේය.
පාසල් දරුවන් අතර මත්ද්‍රව්‍ය ව්‍යාප්තිය:
පසුගිය වසර එකහමාරක කාලය තුළ රට තුළ මත්ද්‍රව්‍ය උවදුර බරපතළ ලෙස වර්ධනය වී ඇති බව පැවසූ මන්ත්‍රීවරයා, පසුගිය සතියේ තමා පොළොන්නරුව, මැදිරිගිරිය බිසෝ බණ්ඩාර මහා විද්‍යාලයේ සංචාරය කළ අවස්ථාවකදී, පාසල් දරුවන් අතර මත්ද්‍රව්‍ය භාවිතය ශීඝ්‍රයෙන් වර්ධනය වන බව ගුරුවරියක් තමාට සංවේගයෙන් ප්‍රකාශ කළ බව සිහිපත් කළේය. මත්ද්‍රව්‍ය වළක්වමු කියා බෝඩ් ගැසීමෙන් හෝ සංදර්ශන පැවැත්වීමෙන් මෙයට විසඳුම් ලැබෙන්නේ නැත.
යම ලෝකයට යන තුන්වැනි ලෝකයේ රටක්:
හිටපු අධිකරණ ඇමති අලි සබ්රි ප්‍රකාශ කළ පරිදි, ආණ්ඩුව තමන්ගේ දේශපාලන පැවැත්ම සඳහා පමණක් පටු උපකරණ භාවිත කරමින් සිටින බවත්, දූෂිතයන්ට දඬුවම් දිය යුතු වුව ද එය රටේ ප්‍රධානම මාතෘකාව විය නොහැකි බවත් මන්ත්‍රීවරයා පැවසීය. ලෝකය ඉදිරියේ අද ශ්‍රී ලංකාව අවඥාවට සහ විහිළුවට ලක්වෙමින් තුන්වැනි ලෝකයේ සිට 'යම ලෝකයට' ඉතා වේගයෙන් ගමන් කරමින් සිටින බවත්, පටු දේශපාලනයෙන් මිදී තරුණයන්ට රට ගැන බලාපොරොත්තුවක් තැබිය හැකි ධනාත්මක සංවාදයක් ඇති කිරීමට එක්වන ලෙසත් ඔහු සහෝදර දේශපාලනඥයන්ගෙන් ඉල්ලා සිටියේය.
