(ඩියුටි ෆ්‍රී) නීති විරෝධී අන්දමින් විදේශ මත්පැන් බෝතල් 35ක් ලබාගත් බව කියන ජනාධිපති ආරක්ෂක අංශයේ නිලධාරීන් 07 දෙනකු වහාම ක්‍රියාත්මක වන පරිදි මාරුකර යවා ඔවුන්ට එරෙහිව විනය පරීක්ෂණ ආරම්භ කර ඇත.
වැඩබලන පොලිස්පති ප්‍රියන්ත වීරසූරිය ගේ නියෝග මත මෙම නිලධාරීන් 07 දෙනා ගාල්ල, මාතර, ඇල්පිටිය කොට්ඨාස වෙත වහාම ක්‍රියාත්මක වන පරිදි මාරුකර යවා තිබේ.
ගුවන්තොටුපළ තීරුබදු රහිත වෙළෙඳසල්වලින් භාණ්ඩ මිලදී ගත හැක්කේ විදේශගතව සිට පැමිණෙන පුද්ගලයන්ට පමණක් බවත්, විශේෂ රාජකාරියක් සඳහා ගුවන්තොටුපළට පැමිණි ජනාධිපති ආරක්ෂක අංශයේ නිලධාරීන් මේ ආකාරයට මත්පැන් බෝතල් ලබාගත්තේ කෙසේ ද යන්න විමර්ශන කරන බවත් පොලිසිය පවසයි.
මෙම නිලධාරීන්ගේ ක්‍රියාකලාපය පිළිබඳව වැඩබලන පොලිස්පතිවරයාට ලැබුණු තොරතුරක් මත ඔවුන් මෙසේ මාරුකර යැවීමට කටයුතු කර තිබිණි.
මේ සම්බන්ධයෙන් කළ විමසීමකදී වැඩබලන පොලිස්පති ප්‍රියන්ත වීරසූරිය කියා සිටියේ මෙය ඉතාම නරක පූර්වාදර්ශයක් බවත් මෙවැනි ක්‍රියා ඉදිරියේදී සිදු නොවීමට කටයුතු කරන බවත්ය.
ජනාධිපතිවරයාගේ ආරක්ෂාවට පැමිණි නිලධාරීන් සිය රාජකාරිය පසෙක දමා මේ ආකාරයට ඩියුටි ෆ්‍රී වෙළෙඳසල්වල සංචාරය කරමින් මත්පැන් මිලදී ගැනීම ඉතාම නරක ක්‍රියාවක් බවත් එම නිලධාරීන්ට එරෙහිව දැඩි ක්‍රියාමාර්ග ගැනීමට කටයුතු කරන බවත් පොලිස්පතිවරයා පැවසීය.
( divaina | හේමන්ත රන්දුණු)
