'සේවක අරමුදල් දේශපාලන සූදුවකට තබන්න බෑ!' - EPF සහ ETF එකතු කිරීමේ රජයේ නව සැලැස්මට වෘත්තීය සමිතිවලින් දැඩි විරෝධයක්!

"අරමුදල් දෙකේ අරමුණු සම්පූර්ණයෙන්ම වෙනස්" - කැබිනට් පත්‍රිකාව ජාතික ශ්‍රම උපදේශක සභාවට (NLAC) ඉදිරිපත් කරන ලෙස කම්කරු ඇමති අනිල් ජයන්ත ප්‍රනාන්දුට බලපෑම්

මහ බැංකුවේ පාලනයෙන් ඉවත් කර ත්‍රෛපාර්ශවික මණ්ඩලයකට පැවරීමෙන් දේශපාලන අතපෙවීම් වැඩිවන බවට වෘත්තීය සමිති නායක ඇන්ටන් මාකස්ගෙන් අනතුරු ඇඟවීමක්


ශ්‍රී ලංකාවේ පුද්ගලික අංශයේ සේවකයන්ගේ විශාලතම විශ්‍රාම වැටුප් සහ ඉතුරුම් අරමුදල් දෙක වන සේවක අර්ථසාධක අරමුදල (EPF) සහ සේවක භාරකාර අරමුදල (ETF) ඒකාබද්ධ කර, තනි ත්‍රෛපාර්ශවික පාලන ව්‍යුහයක් (Unified Tripartite Governance Structure) යටතට පත් කිරීමට රජය ගෙන ඇති උත්සාහයත් සමඟ මෙරට ශ්‍රම වෙළඳපොළ තුළ දැඩි දේශපාලන හා සමාජයීය සංවාදයක් නැවත මතුව තිබේ.

මේ සම්බන්ධයෙන් විධිමත් නීති සම්පාදනය කිරීමට පෙර, අදාළ යෝජනා පිළිබඳව පුළුල් මහජන සහ සේවක උපදෙස් ලබාගත යුතු බව පවසමින් වෘත්තීය සමිති ඊට එරෙහිව සිය සෘජු විරෝධය පළ කර ඇත.

වෘත්තීය සමිති බලපෑම සහ කැබිනට් පත්‍රිකාව

පසුගියදා පැවැති ජාතික ශ්‍රම උපදේශක සභාවේ (NLAC) රැස්වීමේදී මෙම මාතෘකාව දීර්ඝ ලෙස සාකච්ඡාවට බඳුන් වූ අතර, එහිදී වෘත්තීය සමිති නියෝජිතයන් තීරණය කළේ අදාළ ප්‍රතිසංස්කරණ (Restructuring) කැබිනට් යෝජනාව ඊළඟ සභා වාරයේදී තමන් වෙත නිල වශයෙන් ඉදිරිපත් කරන ලෙස කම්කරු අමාත්‍ය අනිල් ජයන්ත ප්‍රනාන්දු ගෙන් ඉල්ලා සිටීමටයි.

වාර්තා රහසිගතව තබාගැනීම:
මෙම ප්‍රතිසංස්කරණ අධ්‍යයනය කිරීම සඳහා කැබිනට් මණ්ඩලය විසින් මේ වන විටත් ජ්‍යෙෂ්ඨ නිලධාරීන්ගේ කමිටුවක් (Senior Officials Committee) පත් කර ඇත. වෘත්තීය සමිති අවධාරණය කරන්නේ එම කමිටුවේ නිර්දේශ මත පදනම්ව කෙටුම්පත් සකස් කිරීමට පෙර, එම වාර්තාව සේවක විවේචනය සඳහා ප්‍රසිද්ධ කළ යුතු බවයි.

නෛතික ආරක්ෂාව අවදානමේ:
නිදහස් වෙළඳ කලාප සහ පොදු සේවා සේවක සංගමයේ සම ලේකම් ඇන්ටන් මාකස් පෙන්වා දෙන්නේ, සේවක අරමුදල් ආරක්ෂා කිරීම සඳහා දැනට පවතින නෛතික ප්‍රතිපාදන දුර්වල කරන කිසිදු නව පාලන ව්‍යුහයකට තමන් එකඟ නොවන බවයි.

ට්‍රිලියන 5.5ක අරමුදල්වල සැබෑ හිමිකාරිත්වය

වත්මන් ආරවුලට මුල් වී ඇත්තේ පුද්ගලික අංශයේ සේවකයන් මිලියන ගණනකගේ දායකත්වයෙන් එකතු වී ඇති රුපියල් ට්‍රිලියන 5.5ක (Rs. 5.5 Trillion) දැවැන්ත ධනස්කන්ධයයි.

EPF වටිනාකම:
සාමාජිකයන් ලක්ෂ 25ක් පමණ සිටින සේවක අර්ථසාධක අරමුදලේ (EPF) වත්මන් වටිනාකම රුපියල් ට්‍රිලියන 4.9කි. දැනට එහි ආයෝජන සහ ආරක්ෂණ වගකීම මහ බැංකුව සතු වන අතර, නීතිමය අනුකූලතාව අධීක්ෂණය කරන්නේ කම්කරු දෙපාර්තමේන්තුවයි.

ETF වටිනාකම:
සාමාජිකයන් ලක්ෂ 30ක් පමණ නියෝජනය කරන සේවක භාරකාර අරමුදල (ETF) රුපියල් බිලියන 637කට අධික වත්කම් ප්‍රමාණයකින් සමන්විත වන අතර, එය ස්වාධීන ව්‍යවස්ථාපිත මණ්ඩලයක් මඟින් පාලනය වේ.

වෙනස් අරමුණු දෙකක් එකක් කිරීමේ ගැටලුව

රජයේ යෝජනාව වන්නේ මෙම වෙන් වෙන් පාලන ක්‍රමවේදයන් වෙනුවට රජය, සේවා යෝජකයන් සහ සේවක නියෝජිතයන්ගෙන් සමන්විත පොදු මණ්ඩලයක් පත් කිරීමයි. රජය පවසන්නේ මෙමඟින් දේශපාලන අතපෙවීම් වළක්වා ගත හැකි බව වුවද, වෘත්තීය සමිති පෙන්වා දෙන්නේ ආයතන දෙකෙහි කාර්යභාරය සම්පූර්ණයෙන්ම වෙනස් බැවින් ඒවා එකම මට්ටමකින් සැලකිය නොහැකි බවයි.

විශ්‍රාමික ඉතුරුම් සහ කෙටි කාලීන ප්‍රතිලාභ:
සේවා යෝජකයන් ආයතන දෙකටම දායක මුදල් ලබා දුන්නද, EPF යනු සේවකයෙකු දශක ගණනාවක් තිස්සේ රැස් කරන විශ්‍රාමික ඉතුරුම් වේ. එහෙත් ETF යනු සේවයේ නිරතව සිටින කාලය තුළ කෙටි කාලීන ප්‍රතිලාභ, වෛද්‍ය පහසුකම් සහ නිවාස ණය වැනි අවශ්‍යතා සඳහා භාවිත කරන අරමුදලකි.

මහ බැංකුව වැනි වගකිවයුතු ආයතනයක පාලනයෙන් මෙම අරමුදල් ඉවත් කර නව මණ්ඩලයකට පැවරීම මඟින්, අනාගතයේදී බලයට පත්වන ආණ්ඩුවලට සේවක කැමැත්තෙන් තොරව තම දේශපාලන ව්‍යාපෘති සඳහා මෙම මුදල් ඉතා පහසුවෙන් භාවිත කිරීමට මඟ පෑදෙනු ඇතැයි වෘත්තීය සමිති නායකයෝ සැක කරති. ඉදිරි සති කිහිපය තුළ මෙම නව නීති කෙටුම්පතේ අනාගතය තීරණය වීමට නියමිතය.

(සටහන | සම්පත් ධීරසේකර )

මුලාශ්‍රය :

Workers Challenge Government Bid to Reshape Rs.5.5 Trillion Retirement Savings