ආධ්‍යාත්මිකව ද ගෞරවයට ආදරයට පාත්‍රවන සතුන් විශේෂයක් යැයි හිටපු අමාත්‍ය ඩයනා ගමගේ පැවසුවා ය.
ඇය මෙම අදහස් පළ කළේ ඉකුත්දා කතරගම පුහුල්ආර ප්‍රදේශයේ සංචාරයක නියැළී සිටිය දී වන අලි පොලිතින් සහ ප්ලාස්ටික් කොටස් අනුභව කරනු දැක මේ පිළිබඳව අදාළ බලධාරීන් දැනුවත් කිරීමෙන් ඉක්බිතිව මාධ්‍ය හමුවේ අදහස් දක්වමනි.
එම අවස්ථාවේ දී වැඩි දුරටත් අදහස් දැක්වූ හිටපු අමාත්‍ය ඩයනා ගමගේ...
අලි ඇතුන් සිටි බවට මතකයක් විතරක් ඉතිරි වේවි ද...?
''කතරගම සහ අවට අලි ඇතුන් බහුල ප්‍රදේශයක්. බොහෝ මිනිසුන් සිතූ මනාපෙට රක්ෂිත වනාන්තර අත්පත් කර ගනිමින් අලින්ට විදුලි රැහැන් දමා එම සතුන් යන එන මාර්ග හරස් කරලා. එපමණක් නෙවෙයි කූට ලෙස රක්ෂිත අල්ලා ගනිමින්, වන රක්ෂණ දෙපාර්තමේන්තුව ද නොමග හරිමින්, එම ඉඩම් වල හේන් වගාවට යැයි කියමින් එක් එක් පුද්ගලයාට අතින් අත විකිණීමේ කූඨ ජාවාරමක්ද ක්‍රියාත්මක වෙනවා. මේ බව ප්‍රකාශ කළේ ඒ ප්‍රදේශවාසින් ම යි.
එම කරුණු විමර්ශනය කිරීම වත්මන් ආණ්ඩුව සතු කාර්යයක්. එහෙත් අනියම් ලෙස ඉදිරියේදී සිදුවීමට ඇති මහා කැලෑ අලි සංහාරය හේතුකොට ඉදිරියේ දී මෙම ප්‍රදේශයේ අලි ඇතුන් සිටි බවට මතකයක් විතරක් ඉතිරි වේවි. ඒ බව දැනටමත් තහවුරු වෙමින් පවතිනවා.
අලි සංහාරය පිළිබඳ දැඩි අවධානය යොමු විය යුතුයි
පුහුල්ආර ප්‍රදේශයට පැමිණෙන අලි ඇතුන් නිරීක්ෂණය කිරීමේදී තහවුරු වන්නේ කුසගින්න ඉවසා ගත නොහැකි වන අලීන් පොලිතින් සහ ප්ලාස්ටික් අපද්‍රව්‍ය ආහාරයට ගන්නා බව යි. මෙම ක්‍රියාදාමය ඉදිරියට ද මේ විදියට සිදු අනොත් මෙම අලි මරණයට පත්වීම බොහෝ දුරට සිදුවිය හැකි යි.
බොහෝ පරිසර විචාරකයින්ගේ වගේ ම මමත් එහෙම විශ්වාස කරනවා. ඒ නිසා මෙම අලි සංහාරය ගැන දැඩිව අවධානය යොමු කරන ලෙසත්, වන රක්ෂිතයට අයත් ඉඩම් කූට ලෙස අත්පත් කර ගැනීම වැළැක්වීම පිළිබඳව ද රජයේ අවධානය යොමු කරන ලෙසත් ජනාධිපතිවරයාගෙන් ඉතා ගෞරවයෙන් ඉල්ලා සිටිනවා.
(සටහන | ජේ.මුණසිංහ)
