ඕස්ට්‍රේලියානු ආධාර මඟ හැරුණු, 2021ට පෙර ලියාපදිංචි කළ බහුදින බෝට්ටුවලට රජයේ වියදමෙන් VMS උපකරණ.
“ලංකාවට ජාත්‍යන්තර තහනමක් ඒමේ අවදානමක්” - ඉන්දියානු සාගර ටූනා කොමිසමේ නීති රකින්න කැබිනට් අනුමැතිය.
ශ්‍රී ලංකාව සතු සාගර කලාපය තුළ සිදුවන නීතිවිරෝධී, වාර්තා නොවන සහ නියාමනය නොවන (IUU) ධීවර කටයුතු මෙන්ම මුහුද මැද සිදුවන මහා පරිමාණ ජාවාරම් මුළුමනින්ම පාලනය කිරීම සඳහා රජය විසින් විශේෂ ආරක්ෂක පියවරක් ගෙන ඇත.
ඒ අනුව, මෙතෙක් කිසිදු නිරීක්ෂණ පද්ධතියකට හසු නොවී මෙහෙයුම් සිදුකළ ලංකාවේ බහුදින ධීවර යාත්‍රා 1,500ක් සඳහා චන්ද්‍රිකා තාක්ෂණයෙන් ක්‍රියාත්මක වන "යාත්‍රා නිරීක්ෂණ පද්ධති" (VMS - Vessel Monitoring Systems) සවිකිරීම අමාත්‍ය මණ්ඩලය විසින් වහාම අනිවාර්ය කර තිබේ.
ධීවර බෝට්ටු පිටුපස සැඟවුණු අපරාධ ජාල
සාමාන්‍ය ධීවර කටයුතු සඳහා භාවිත කරන ඇතැම් බහුදින යාත්‍රා, නීත්‍යානුකූල සීමාවන්ගෙන් ඔබ්බට ගොස් ජාත්‍යන්තර අපරාධකරුවන් විසින් අවභාවිත කරන බවට ආරක්ෂක අංශ වෙත තොරතුරු ලැබී ඇත.
ත්‍රිවිධ ජාවාරම්:
මත්ද්‍රව්‍ය ප්‍රවාහනය (Drug trafficking), මිනිස් ජාවාරම් සහ නීතිවිරෝධී සංක්‍රමණිකයන් මුහුද හරහා වෙනත් රටවලට පැටවීම සඳහා මෙම බෝට්ටු යොදාගැනීම.
ගුවන් විදුලි සහ ට්‍රැකර් ක්‍රියාවිරහිත කිරීම:
ආරක්ෂක අංශවලට හසුනොවන සන්නිවේදන සීමාවලින් බැහැරව (Silent Seas) ගමන් කරමින් නාවික හමුදා සෝදිසි කිරීම් මඟහැරීම.
යාත්‍රා 1500ක තාක්ෂණික හිඩැස වැසීම
ශ්‍රී ලංකාවේ දැනට ලියාපදිංචි බහුදින ධීවර යාත්‍රා 5,200ක් පවතින අතර ඉන් වැඩි ප්‍රමාණයක ආරක්ෂාව දැනටමත් තහවුරු කර ඇත.
ඕස්ට්‍රේලියානු ආධාර:
යාත්‍රා 4,200ක් සඳහා ඕස්ට්‍රේලියානු රජයෙන් ලැබුණු ප්‍රදානයක් මඟින් VMS ට්‍රැකර් උපකරණ කලින්ම සවිකර තිබුණි.
අනතුරේ පවතින 1500:
2021 ජනවාරි 1 වැනිදාට පෙර ලියාපදිංචි කළ ඉතිරි යාත්‍රා 1,500 මෙතෙක් ක්‍රියාත්මක වූයේ කිසිදු නිරීක්ෂණයකින් තොරවය.
අන්තර්ජාතික අවදානම:
මෙම යාත්‍රා අතරින් අඩි 34කට වඩා දිගින් වැඩි බෝට්ටු 400කට ජාත්‍යන්තර මුහුදට (International Waters) යාමේ පූර්ණ ධාරිතාව ඇත. ආණ්ඩුව මෙවර මුදල් ප්‍රතිපාදන වෙන් කරන්නේ මෙම අවදානම් සහගත බෝට්ටු 1,500ම චන්ද්‍රිකා ජාලයට යා කිරීම සඳහාය.
ජාත්‍යන්තර රෙගුලාසි සහ අපනයන තර්ජනය
ලංකාව ඉන්දියානු සාගර ටූනා කොමිසමේ (IOTC) නිල සාමාජිකයෙකු වන බැවින්, ජාත්‍යන්තර මුහුදේ මසුන් අල්ලන සියලුම යාත්‍රා අඛණ්ඩව නිරීක්ෂණය කිරීමේ නෛතික වගකීමක් රටට ඇත. නිසි ට්‍රැකර් පද්ධති නොමැතිව බෝට්ටු ගමන් කිරීම නිසා ලංකාව "වගකීම් විරහිත ධීවර රටක්" ලෙස නම් වුවහොත්, මෙරට මත්ස්‍ය අපනයනයට ජාත්‍යන්තර තහනමක් වැටීමේ සහ සාමාන්‍ය ධීවරයන්ගේ ආදායම් මාර්ග මුළුමනින්ම අහිමි වීමේ බරපතළ අනතුරක් පැවතුණි.
මෙම ට්‍රැකර් උපකරණ සවිකිරීමෙන් පමණක් මුහුදේ ආරක්ෂාව 100%ක් තහවුරු කළ නොහැකි බව නාවික අංශ පෙන්වා දෙයි. චන්ද්‍රිකා මඟින් සැකකටයුතු යාත්‍රා මාර්ග (Unusual routes) නිරීක්ෂණය වූ සැණින්, එම ස්ථාන වෙත කඩිනමින් ගොස් වැටලීම් සිදුකිරීම සඳහා නාවික හමුදා මුරසංචාරක යාත්‍රා (Naval patrol vessels), චන්ද්‍රිකා රේඩාර් පද්ධති සහ ගුවන් නිරීක්ෂණ ඒකක ඒකාබද්ධ කෙරෙන නවතම සමුද්‍රීය ආරක්ෂක මෙහෙයුම් පද්ධතියක් ඉදිරි මාස කිහිපය තුළ දියත් කිරීමට නියමිතය.
(සටහන | සම්පත් ධීරසේකර )
මුලාශ්‍රය :
Silent Seas Under Threat: Sri Lanka’s Battle against Illegal Fishing Networks
